1 Nanban so maymet rowangan saw no Jeriko tan dya makasdep Israelita saw. Abaw makahbot kan abaw makasdep. 2 Sinpangan na, binata ni ĀPO di Joswe a kāna, “Chiban pa. Inparawat ko na dyimo Jeriko kontodo āri na kan tabo mayiyit saw a soldādo na. 3 Ki imo kan siraw mahahakay saw a para gobat, ki magmarcha kamo a mangdibon do idiaya so maypisa. Komwan parinen nyo do anem a karaw. 4 Panmahen mo saw papitwaw a papādi do salapen naya no Lakāsan no Tōlag, kan tayisa sa so trompīta a olong no malloko a karniro. Do chapapito naw a karaw, dibonen nyonchi so maypapito iyaw idiaya a myan sa magtrompītaw papādi saya. 5 Anchan alopan danchi so maypisa, kan ipāot daw ōni naw, as madngey nyo, machita mangngēngey tabo tawotawo so malyak, kan maloyo anchiw ahadaw no idi. Do dāwrinchi, tabo saw mahahakayaw a para gobat, taros dana sa somdep do idyaw.”

6 Dawa, tinawagan sa ni Joswe a pōtot ni Non siraw papādi saw, kan inbahey na dyira a kāna, “Isiwen nyo Lakāsanaya no Tōlag ni ĀPO, kan mapanma kamo so papito dyinyo a manahabit so trompīta do salapenaya no lakāsan.” 7 Somarono, minandaran sa ni Joswe siraw tawotawo saw a dibonen daw idyaw, as siraw mahahakay saw a siaarmas mangidaōlo a manmanma kan Lakāsan naw no Tōlag ni ĀPO.

8 Do nakaibaheyaw syay ni Joswe dyirad tawotawo saw, siraw papitwaw a papādi a manahabit so trompīta do salapenaw ni ĀPO, ki inrogi daw nagmarcha kan nagtrompīta. As siraw mangisiw saw so Lakāsan no Tōlag ni ĀPO, ki somnarono dana sa dyira. 9 Siraw mahahakayaw a siaarmas, myan sa do panman daw no papitwaw a papādi a magtrompīta. Myan saw gwardya do panawdyanaw no lakāsanaw a ranan katongtong da so magtrompīta. 10 Ki minandaran sa ni Joswe saw tawotawowaw a kāna, “Mangngēngey kamo aba. Maylilyak kamo aba. Maychirin kamo aba aran asa chirin manda do arawaw a mandaran koynyo a mangngēngey. Nawrinchiw, kapangngēngey nyo!” 11 Dawa, inpaisiw na a inpaidibon ni Joswe iyaw lakāsanaw do idyaw so naypisa. As nakapaybidi dan tawotawowaw a minisan do kampo daw.

12 Minhep a naybangon si Joswe do kamabekasanaw. As siraw papādi saw, ki inisiw daranaw Lakāsanaw ni ĀPO. 13 Iyaw ornos da a nagmarcha, ki akmas pinarin daw do dāmwaw a araw. No nanma, siraw siaarmas saw; sinarono da no papitwaw a papādi a magtrompīta; as monot saw papādyaw a mangisiw so Lakāsan no Tōlag ni ĀPO. No nanawdyi, ki siraw gwardyaw do dichodan. Do kayan daw a magmarcha, nāw da magtrompīta. 14 Do chadadwa naw a araw, nagmarcha dana sa a nangdibon do idyaw so naypisa, as nakapaybidi da do kampo daw. Komwan pinarin da do irahem no anem a karaw. 15 Do chapapito naw a karaw, naybangon sa do kapaysesēdang, kan nagmarcha sa a nangdibon do idyaw so naypapito a akmas nakapagmarcha daw do dāmwaw. Ki do dāwri lang a araw, nakapagmarcha das naypapito a nangdibon do idyaw. 16 Do chapapito naranaw a kapangdibon da so idi daw, katayokan nakapagtrompīta da no papādyaw, inmandar ni Joswe dyirad tawotawo saw a kāna, “Mangngēngey kamo! Ta si ĀPO, ki intoroh narana dyinyo nya idi! 17 Iyaw idiaya kan aran āngo a myan do irahem na, ki machita a rārayawen nyo a tabo a pinakadāton di ĀPO. Si Rahab lang a maglaklāko so asi na kan sira tabo myanaw do bahay naw maisalākan, ta intayo na saw ispyaw a tinoboy ta. 18 Ki manghap kamo aba so aran āngo a maikeddeng a marārayaw. Ta an manghap kamo, inyo mangyangay so riribok kan karārayaw do kampo dan Israelita. 19 Tabo pirak, balitok, kan siraw naparin do bronsi mana pasek, ki mapatarek a masantwan a para di ĀPO, kan mapangay anchi do pangapyan so para di ĀPO.”

20 Do nakadngey daw sya no tawotawowaw so ōni daw no trompīta, nangngēngey sa so malyak. Do dāwri, naloyo ahadaw, kan nagtaros mahahakay saw a somindep kan sinākop daw idyaw. 21 Diniman da so ispāda da saw tabo a omyan do dawri a idi, mahahakay, mababakes, maychakatobo, kan mangalkem. Diniman da pa saw bāka, karniro, kan asno saw.

22 Binata ni Joswe dyirad dadwaw a mahahakay a nagispya so tanaw a kāna, “May kamo do bahayaw no mabakesaw a maglaklāko so asi na, kan ihbot nyo iya kan tabo pamilya naw a akmas insapata nyowaw dya.” 23 Dawa, nangay saw dadwaw, kan inihtot da si Rahab kontodo si āmang kan ānang na, kakakteh na saw a mahahakay, kan siraw tabo pamilya ni Rahab. Inyangay daw intīro a pamilya na do gagan no kampo dan Israelita.*6:23 Ta siraw Dya Jodyo, maparin saba somdep do kampo dan Israelita a naibidang a masantwan. 24 Katayoka no nya, sinosohan daw idyaw kan tabo myan daw a mandan natemtem. Ki pinangay daw pirakaw, balitok, kan siraw naparinaw do bronsi kan pasek do pangapyanaw so para di ĀPO do tabirnakolo na.†6:24Do chirin Hebreo, ki “bahay ni ĀPO”. 25 Ki insalākan ni Joswe iyaw byay ni Rahab a iyaw mabakesaw a maglaklāko so asi na kan siraw tabo pamilya na, ta intayo naw dadwaw a ispya a tinoboy ni Joswe do Jeriko. (As siraw kapotōtan ni Rahab, ki omyan do Israel a manda sichangori.)

26 Do dāwri, inbahey ni Joswe iyaw nya a ballāag a kāna, “Mabay pakono do salapen ni ĀPO iyaw tawo a mangpādas a mirwa a mapatnek so nya idi a Jeriko.

27 As dawa, myan si ĀPO di Joswe, kan naiwaras kalatak naw do intīro a tana.