Siraw Dongdong-aw
No Pakatonngan so Paytābwan no Nya Libro
Nya libro, ki maynana daniw. Kāda dadima kapitolo, ki tayisa a daniw. As do kāda kapitolo, ki taydodwa poho kan dadwa a kabirsikolo malaksid do kapitolo tres a myan anem a poho kan anem a birsikolo. Do Hebreo a chirin, kāda birsikolo do kapitolo ono, dos, kan kwatro, ki mangrogi a masarosarono do litra do abakada no Hebreo a chirin. Komwan do kapitolo tres a para do kāda maichatatdo a birsikolo.
Siraw nya daniw, ki osaren dan Jodyo do kapagdaydāyaw da do araw saw a kapagayonar kan kapagdongdong-aw a para do pakanaknakman daw so nya a naibahey a didigra do dya libro do kaychowa.
No naytolas so nya libro, ki bata da a si propīta Jeremiyah a aran abo naibahey do dyaya libro. Nachikakaāsi dyirad kaidyan naw do Jerosalem a magbabāwi kan maybidi sa do Dyos, ki chinaskeh da. Dawa, tinoboy no Dyos taga Babilonya saw a nayrārayaw kan naysosoh do syodad daw kan iyaw Timplowaw. Siraw dya nadiman, ki naakaw sa a nabahod a naiyangay do Babilonya. No nya naparin, ki do tawen a 587 sakbay naiyanak si Āpo Jeso-Kristo.
Naboya a mismo ni Jeremyas tabo nya. Dawa, naytolas a nangibahey so taywara a kaliday na. Dongdong-awan naw karārayaw no Jerosalem kan Timplowaw, kan no kalidyatan dan nakalāsat saw. Nanakem na iyaw kabīleg kan dayag no Israel do nakarahan. As do dya libro, iniktokto naw pandan dana no pagāryan dan kapotōtan ni Āri Dabid (2 Sam. 7:16). Ki aran komwan, myan iyaw namnāma kan kāsi no Dyos a naibahey do kapitolo tres.
No Naychakarwan no Nya Libro
No kaliday dan nakalāsat do Jerosalem (1:1-22)
No kasoli no Dyos dyirad omyan do Jerosalem (2:1-22)
No kapangdōsa no Dyos kan kapangnamnāma dya (3:1-66)
No kapangrārayaw dan kabōsor so Jerosalem (4:1-22)
No kapangdakdaw so kāsi no Dyos (5:1-22)
Siraw Dongdong-aw
1
No Kaliday no Syodad a Jerosalem
1 Ay, āngwa kapaychatanyi danan syodad a Jerosalem
a napno so tawotawo do nakarahan!
Ay, āngwa nakapayparin na a akmay bālo
a do napahabas, ki mabīleg dyirad nasnasyon!
Iya a prinsisa do nakarahan dyirad probinsya,
ki nayparin dana asa adīpen sichangori.
2 Taywaraw katanyis na an mahep
Moyog saw hō do pisnyi na.
Dyirad tabo saw a madaw dya,*1:2 Siraw madawaw dya, ki ladāwan dan didyosen mana siraw kinatōlag naw a gan-ganaet a nasnasyon. Hos. 2:5, 7, 10, 13
ki abaw mangahwahok sya.
Tabo dan sīt na, ki linipotan da.
Nayparin dana sa kabōsor na.
3 Naikaro dana si Joda†1:3 Joda, ki pinakainawan dan tabo tawotawo do omdibon no Jerosalem. a nabahod
a taywara natotōok kan palālo so nakaadīpen.
Machiyan dana dyirad gan-ganaet a nasnasyon.
Abaw madongso na paynahahan na.
Tabo dan nangpaskad sya, ki nadas da iya
a naiyapiki da a abo dana so kwanan.
4 Siraw rarahan a komwan do Sion, ki magdongdong-aw,
ta abaw mangay do naitongdo saw a pista na.
Tabo dan rowangan, ki nainonolay dana sa.
Magas-āsog saw papādi na.‡1:4 Joel 1:9
Siraw babbalāsang na,§1:4 Siraw babbalāsang na, mana siraw birhin, ki siraw magtamborin sa do kapagdaydāyaw do Timplo. Sal. 68:25 ki tomanyitanyis sa.
Ay, āngwa kakpad no kapagtōok na.
5 Siraw kakontra na, ki nayparin sa a āmo na.
On siraw kabōsor na, ki ikinkinakin da.
Si ĀPO, nangyangay so kapagmamayo dya
maynamot do āro a gatogatos na.
Siraw anak na, ki naikaro dana sa
a nabahod do salapen dan kabōsor na.
6 Tabo no kinadayag na, ki komnaro
a yapo do Balāsang no Sion.*1:6 No “Balāsang no Sion,” ki osaren da do daniw a asa ladāwan no syodad a Jerosalem. Isa. 1:8, 10:32; Jer. 4:31
Siraw prinsipi na,†1:6 Siraw prinsipi, ki siraw totorayen no Jerosalem. ki akma say ogsa
a dya makadongso so pagarāban da.
Nayyayo sa aran napatawos danaw kayit da
do salapen dan manglakat saw dyira.
7 Do araw sa kapagtotōok kan kapayadiyadis,
nanakem sa no Jerosalem tabo mapateg
a dyinira na do nakahabas.
Do nakaābak dan tawo na do tanoro dan kabōsor,
abaw somnidong sya.
Nangorirat saw kabōsor naw,
as nakamimyeng da sya do nakarārayaw na.
8 Jerosalem, ki taywaraw nakapakagatos na.
Dawa, nayparin dana a malapos.
Tabo no nanganyi-anyib sya, ki indadanes darana,
ta naboya daw kasilalābos na.‡1:8 No chakey na batahen no panyinyirin a “naboya daw kasilalābos na,” ki ibahey na a maynamot do nakasamsam da sira no nangsākop saw so syodad.
Mismo a iya, ki pagas-asog na,
kan itayo naranaw rōpa na do asnek na.
9 Komnoyapet danaw kalapos§1:9 No “kalapos na,” ki ladāwan no gatogatos na. Myan naitayo a chakey na batahen a akmay rodit na a nangmancha so imara na sa. na dyirad imara na,
ta iniktokto nabaw masakbayan na.
Dawa, makaam-amak nakasday na.
Abaw mangahwahok sya.
Bata na a kāna, “Chiban mom ĀPO katotōok ko,
ta nagballīgi iyaw kabōsor.”
10 No kabōsor, ki inlonat na saw tanoro na
a nangāgaw so tabo mapateg dya.*1:10 No “tabo mapateg dya,” ki siraw myan do Timplo. 2 Ār. 25:13-17
Naboya na saw soldādo dan gan-ganaet a nasnasyon
a somindep do masantwan a yanan.
On, naboya na saw binaywan ni ĀPO
a somdep do kakpekpehan dan tawotawo na.
11 Tabo no tawotawo na, ki magas-āsog
do kayan da naychichwas so kanen da.
Pinanādi da saw kinabaknang da so chabyay da
a mantinir no inawan da tan mabyay sa.
Bata no syodad a kāna, “Chiban mo pam ĀPO,
ta maidadanes ako.
12 “Abawriw bibyang nyo, inyo a tabo a homabas?†1:12 Do kadwan a naiyōlog, ki “Dyi pakono a maparin dyinyo.”
Manyideb kamo do omdibon, kan chiban nyo
a abaw kapagmamayo a akmas kapagmamayo ko
a inpasabhay dyaken ni ĀPO
do arawaw a kataywara no kasoli na.
13 “Yapo do hanyit nangasday si ĀPO so apoy
a somindep a mangsosoh so tohatohang ko.‡1:13 Malawag aba do Hebreo a chirin. Asa maparin a maawātan, ki no soli no Dyos, ki akmay apoy a mangsosoh so Timplo, palasyo, kan siraw idiidi a omdibon do Jerosalem.
Nangipākat so asdok para do kokod ko,
as pinatadyichokod na yaken a penpenen.
Ninonolay narana yaken
a makey a mapleng a maychasaryan.
14 “Nareppet saw gatos ko a nayparin a akmay pāko.
No tanoro na saw namedbed sira.
Naipasadin sa do lagaw ko,
kan sinepsep daw kayit ko.
Inparawat na yaken ni Āpo
dyirad dyi ko saw a matēnekan a abāken.
15 “Tod dana sa dyābat ni Āpo
tabo mabibīleg saw a taga-gobat a myan dyaken.
Tinawagan na saw bōyot a mangkontra dyaken
a namitapita siras babbaro ko.
Akmay pamīsan so ōbas, tinokatokapan ni Āpo
iyaw Birhin a Balāsang no Joda.§1:15 No chakey na batahen “Birhin Balāsang no Joda,” ki Jerosalem kan siraw omyan daw.
16 “Nya saw paynamotan na a tomanyis ako.
Maychawoyog hō ko yapo do mata ko.
Abaw masngen a mangahwahok dyaken.
Abaw mapaydyegegla so ispirito ko.
Nainonolay dana saw anak ko,
ta napadso darana sa no kabōsor.”
17 Patohosen no Sionaw tanoro na a mangdakdaw,
ki abaw mangahwahok sya.
Nangikeddeng si ĀPO so maikontra di Jakob
a siraw karoba na, ki mayparin sa a kabōsor na.
Jerosalem, ki nayparin dana
a akmay malapos a boboyas dyira.
18 Bata no syodad a kāna, “Malinteg si ĀPO,
ta nachiribīldi ako do chirin na.
Ki adngeyen nyo, inyo a tabo a tawotawo,
kan chiban nyo katotōok ko.
Siraw kamotdehan ko a babbaro kan babbalāsang,
ki naikaro dana sa a nabahod.
19 “Tinawagan ko saw madawaw dyaken,
ki pināay da yaken a dyi sa nangay a somnidong.
Siraw papādi ko saw kan papanglakayen ko,
ki nadiman dana sa do syodad
do kayan da a naychichwas so mākan
a mantinir no inawan da tan mabyay sa.
20 “Chiban mo pam ĀPO, ta taywara kariribok ko!
Matotōok pahad ko.
As iyaw pōso ko, ki palālo a makamikamyaba,
ta taywaraw nakapachiribīldi ko.
Do gagan do kalkalsāda, ki mapagdong-aw ispāda.
Do irahem no bahay, ki maynana kadiman daw.
21 “Nadngey dan tawotawo kapagas-āsog ko,
ki abaw mangahwahok dyaken.
Tabo dan kabōsor ko, ki nadngey daw kariribok ko.
Charagsak daw pinarin mo.
Iyangay mo na pakono arawaw a inbahey mo
tan mayparin sa a akma dyaken.
22 “Maipasalap pakono dyimo tabo karahet da.
Dosāen mo sa pakono
a akmas nakadōsa mo dyaken
maynamot do tabo gatogatos ko.
Āro danayaw kapagas-āsog ko,
kan mahah danayaw pōso ko.”
*1:2 1:2 Siraw madawaw dya, ki ladāwan dan didyosen mana siraw kinatōlag naw a gan-ganaet a nasnasyon. Hos. 2:5, 7, 10, 13
†1:3 1:3 Joda, ki pinakainawan dan tabo tawotawo do omdibon no Jerosalem.
‡1:4 1:4 Joel 1:9
§1:4 1:4 Siraw babbalāsang na, mana siraw birhin, ki siraw magtamborin sa do kapagdaydāyaw do Timplo. Sal. 68:25
*1:6 1:6 No “Balāsang no Sion,” ki osaren da do daniw a asa ladāwan no syodad a Jerosalem. Isa. 1:8, 10:32; Jer. 4:31
†1:6 1:6 Siraw prinsipi, ki siraw totorayen no Jerosalem.
‡1:8 1:8 No chakey na batahen no panyinyirin a “naboya daw kasilalābos na,” ki ibahey na a maynamot do nakasamsam da sira no nangsākop saw so syodad.
§1:9 1:9 No “kalapos na,” ki ladāwan no gatogatos na. Myan naitayo a chakey na batahen a akmay rodit na a nangmancha so imara na sa.
*1:10 1:10 No “tabo mapateg dya,” ki siraw myan do Timplo. 2 Ār. 25:13-17
†1:12 1:12 Do kadwan a naiyōlog, ki “Dyi pakono a maparin dyinyo.”
‡1:13 1:13 Malawag aba do Hebreo a chirin. Asa maparin a maawātan, ki no soli no Dyos, ki akmay apoy a mangsosoh so Timplo, palasyo, kan siraw idiidi a omdibon do Jerosalem.
§1:15 1:15 No chakey na batahen “Birhin Balāsang no Joda,” ki Jerosalem kan siraw omyan daw.