2
No Kasoli no Dyos dyirad Omyan do Jerosalem
1 Ay, āngwa nakalangeb ni Āpo
so Balāsang no Sion so konem no kasoli na!
Intopak naw dayag no Israel
yapo do hanyit manda do tanaya.
Iniktokto na pabaw tokapan na*2:1 No “tokapan na,” ki ladāwan no pagyanan no Dyos mana iyaw Timplo do Jerosalem. Do kadwan saw a naiyōlog, ki “inaywanan nabaw timplo na.”
do araw a kasoli na.
2 Nayrārayaw si Āpo a abo so kāsi†2:2 Do Hebreo a chirin, ki “Nanghamon si Āpo a abo so kāsi.”
do tabo pagyanan dan kapotōtan ni Jakob.
Do soli na, ki rinakrak naw
pagkamītan saw a gwardyado no Balāsang no Joda.
Sinday na sa do tana a inasnesnekan
iyaw pagāryan kan prinsipi na sa.
3 Do taywara a kasoli na, pinodpod naw
kāda olong‡2:3 No “olong,” ki simbolo no kayit, kan masanyib a ladāwan no bīleg no bōyot. 2 Sam. 22:3 no Israel.
Kinenken naw kawanan a tachay na
do kasongad no kabōsor.
Akmay somdesdeb a apoy, ninamay naw tana ni Jakob
a namatawos so tābo do omdibon.
4 Akmay kabōsor si ĀPO, inabhok naranaw bai na.
Nakasāgana dana a magbai do kawanan a tachay na.
On, akmay kabōsor a nangdiman
so tabo a tawo a mapapateg do kapanyideb ta.
Pinado naw kasoli na a akmay apoy
do tolda no Balasāng no Sion.
5 On, si Āpo, ki nayparin a akmay kabōsor.
Inparārayaw naranaw Israel.
Inparārayaw na saw tabo palasyo na,
kan inparakrak na saw pagkamītan na a gwardyado.
Pinaypaypāngay naw kapagmamayo
kan kapagdongdong-aw no Balāsang no Joda.
6 Siraranggas a nayrakrak so timplo na
a akmay abong-ābong lang do hardin.
Pinachipanda ni ĀPO do Sion intongdo na saw
a pista kan araw saw a kapaynaynahah.
Do taywara a kasoli na,
chinaskeh naw aran āri kan pādi.
7 Chinaskeh narana ni Āpo altar na,
kan inaryan naw masantwanaw a yanan na.
Inparawat naranaw ahad saw no palasyo na sa
do tanoro no kabōsor.
Inngēngey daw nakapangābak da do timplo ni ĀPO
a akma so araw a naitongdo a pista.
8 Si ĀPO, ki inpanggep na a rakraken
ahadaw do omdibon no Balāsang no Sion.
Linonat naranaw pangrokod naw,§2:8 Nya panyinyirin a “linonat naranaw pangrokod naw”, ki maipariho do mangpaltikaw so rarakoh a bato, kan nakasagāna a akteben na sa a pangpatnek so bahay. As no ladāwan dya, ki isagāna ni ĀPO mangrārayaw so napaltikan na.
kan mapenpen aba do kapangrārayaw na.
Siraw gaganaw kan makatayrahemaw a ahad,
ki magliliday sa a dadwa, ta naloyo dana sa.
9 Siraw rowangan na, ki minned dana sa do tana.*2:9 Ladāwan nya a akmay mangay sa do tanem.
Pinotopotot kan rinārayaw na saw rihas na.
No āri na kan prinsipi na sa, ki naakaw sa dyirad nasnasyon.
Apabaw mangnanawo so linteg, as siraw propīta na,†2:9 Jer. 18:18; Esk. 7:26
ki makapagparmata sa paba so yapo di ĀPO.
10 Siraw panglakayen saw no Balāsang no Sion,
ki sioolimek sa a maydisna do tana.
Pinayokpokan da so ahbek oho da,
kan naylaylay sa so makersang.
Siraw babbalāsang do Jerosalem,
ki nagdomog sa do tana.
11 Mayayatek dana saw mata ko do katanyis ko.
Matotōok danaw pahad ko.
As iyaw pōso ko, ki somawasaway so kaliday,‡2:11 Do Hebreo a chirin, ki “napado danaw atay ko do tana.” No kapanganohed da do atay, ki iyaw kasisītaan a partis no tawo.
ta narārayaw dana saw tawotawo ko,
ta nabo danaw pōot dan adedekey kan tagtagībi
dyirad kalkalsāda do syodad.
12 Tomanyis sa dyirad ānang da sa a kon da,
“Asyo kanen kan inomen namen!”
Nyaw bata da do kakey darana mapleng do kalkalsāda
a akmas saw nabigaran do paggogobatan
do kapaybiybitos dana no byay da
a kepkepen da sa no ānang da.
13 Āngo maibahey ko maynamot dyimo?
Āngo pangiyarigan ko dyimo,
imo a Balasāng no Jerosalem?
Āngo pachiyengayan ko dyimo,
tan mahwahok koymo,
imo a birhin a Balasāng no Sion?
Iyaw bigar mo, ki akmas karahem no tāw.
Aryoriw makapapya dyimo?
14 Siraw propīta mo a nagparmata,
ki nangibahey sa so bayataw kan allīlaw.
Inparang dabaw gatos mo,
tan padichanen daymo a yapo do kabahod mo.
Siraw batahen da a naispiritwan a minsāhi a intoroh da dyimo,
ki bayataw kan mapaychawaw sa.
15 Tabo homabas do rarahan,
ki ititipat daw kakamay da a chamimyeng imo.
Tod da dyābat, kan payliylilinlin daw oho da
do Balāsang no Jerosalem a kon da,
“Iyawriw nyaw syodadaw a natawagan so
‘Abos pakapilāwan so kapintas’
a ‘Iyaw ragsak no intīro a tana’? Pi!”
16 Tabo dan kabōsor mo,
makatagāda sa a kontra dyimo.
Tod da dyābat, kan maylaylangetnget sa
a kon da, “Rinārayaw namen dana iya.
Nyaw arawaw a pinanapanaya namen.
Changori, yamen a mismo iyaw nakaboya sya.”
17 Pinarin ni ĀPO inpanggep na.
Natongpal naw chirin naw a naikeddeng kaychowa.
Hinomis naw Jerosalem a abos kāsi.
Pinachimadekeyan na iya no kabōsor na,
kan pinatobo naw olong dan kakontra na.
18 Tanyisan dan tawotawo a sipopōso si Āpo.
Imo a ahad no Balāsang no Sion,
nonolay mo a moyog hō mo a akmay oksong
do māraw kan mahep.
Paynahahen mwabaw inawan mo.
Omhes kaba tomanyis.
19 Maybangon ka a tomanyis an mahep
do kāda katatādi dan magbantay.
Pawyogen mo a akmay ranom myanaw do pōso mo
do salapen ni Āpo.
Patohosen mo saw tachay mo a machikakaāsi dya
do byay dan anak mo saya a mabobo danas pōot
do kapteng do kanto no kāda kalsāda.
20 Manyideb kam ĀPO, kan chiban mo.
Di sino linidyaliyat mo so komwan a taywara?
Machitawri a kanen dan ānang bōkod da a anak
a chinadaw da a sinapsapnyi do padang da?
Machitawri a maipadiman saw papādi kan propīta
do masantawan a yanan ni Āpo?
21 “Nayhaharag saw adedekey kan mangalkem
do ahbek do kalkalsāda.
Siraw babbaro ko kan babbalāsang ko,
ki nangoyegyeg sa a nadiman do ispāda.
Diniman mo sa do arawaw no kasoli mo.
On, diniman mo sa a abos kāsi.
22 “Akmas kapangāwis mo do naikeddeng a pista,
komwan katawag mo siras mangamomo do omdibon.
Do arawaw a kasoli ni ĀPO,
ki abaw makadichan mana makalāsat.
Siraw pinarakoh kwaw a inay-aywanan,
ki diniman no kabōsor ko.”
*2:1 2:1 No “tokapan na,” ki ladāwan no pagyanan no Dyos mana iyaw Timplo do Jerosalem. Do kadwan saw a naiyōlog, ki “inaywanan nabaw timplo na.”
†2:2 2:2 Do Hebreo a chirin, ki “Nanghamon si Āpo a abo so kāsi.”
‡2:3 2:3 No “olong,” ki simbolo no kayit, kan masanyib a ladāwan no bīleg no bōyot. 2 Sam. 22:3
§2:8 2:8 Nya panyinyirin a “linonat naranaw pangrokod naw”, ki maipariho do mangpaltikaw so rarakoh a bato, kan nakasagāna a akteben na sa a pangpatnek so bahay. As no ladāwan dya, ki isagāna ni ĀPO mangrārayaw so napaltikan na.
*2:9 2:9 Ladāwan nya a akmay mangay sa do tanem.
†2:9 2:9 Jer. 18:18; Esk. 7:26
‡2:11 2:11 Do Hebreo a chirin, ki “napado danaw atay ko do tana.” No kapanganohed da do atay, ki iyaw kasisītaan a partis no tawo.