1 Bata pa ni ĀPO a Manakabalin do Tābo a kāna, “Inyo a papādi, iyaw nya ballāag, ki para dyinyo. 2 An dyi kamo a mangikāso, kan an dyi nyo a ipapōso a dayāwen ngaran ko, abayen konchi inyo, kan payparinen ko a abay siraw bindisyon a rawaten nyo. No kaoyodan na, pinarin ko na, ta inpapōso nyo abaw magdāyaw dyaken.

3 “Maynamot dyinyo, ki dosāen konchiw kapotōtan nyo. Papoten konchi do rōpa nyo tachi da no animal saw a dāton nyo do pista nyo, as kan maikaro kamonchi do salapen ko a natachan.*2:3 Siraw papādi, ki ladāwan dan dya omno a partis no animal a maidāton. No dadakay da, ki iyangay da saw do gagan no kampo a maipoha mana masosohan. 4 Tan komwan, matonngan nyo a yaken, ki nanoroh dyinyo so nya ballāag tan iyaw tōlag ko dyirad kapotōtan ni Lebi,†2:4 Si Lebi, ki pōtot ni Jakob. As iyaw tōlagaw dyirad papādi mana siraw Lebita, ki yapo di Aaron kan apoko na a si Pinehas, ta yapo sa do kapotōtan ni Lebi. Eks. 6:16-29; Nom. 25:10-13; Jer. 33:21-22 ki nāw na matongtong. 5 On, no tōlag ko dyira, ki tōlag a manoroh so byay kan kapya. Intoroh ko sa dyira tan anyiben da pakono yaken, as oyod a inanyib kan dināyaw daw ngaran ko. 6 Yapo do dangoy da, minohtot oyod a nanawo, kan abaw bayataw a nadongso do bibi da. Nachayam dyaken a sikakapya kan sililinteg, as pinatadyichokod da saw āro a yapo do gatogatos da. 7 Ta siraw bibi no asa pādi, ki machita a aywanan daw kapakatoneng. As yapo do dangoy na, machichwasan pakono no tawotawo iyaw kosto a mananawo. Ta iya, ki pachirawatan ni ĀPO a Manakabalin do Tābo.

8 “Ki inyo a papādi, ki tomnadyichokod kamwaya do kosto a kabibyay. Iyaw kapangnanawo nyowaw naynamotan nakachichadan āro a naygatos. Dyinīdo nyowayaw tōlag dyirad kapotōtan ni Lebi. 9 As dawa, payparinen koynyo a chahanyinyi kan masnesnekan do salapen tabo tawotawo maynamot do dyi nyo a nangonotan so kabibyay a chakey ko, ki basbāli a inpaboya nyo kapangitatārek nyo do kapangnanawo nyo.” Nyaw binata ni ĀPO a Manakabalin do Tābo.

10 Asa abawriw āmang ta a tabo? Asa abawriw Dyos a namarswa dyaten? Na, āngo ta dyi ta mapodno do katakatayisa dyaten do dyi ta padayāwan so tōlag da no aāmang ta? 11 Mapodno abaw Joda, kan makabābaba iyaw naparin do Israel kan do Jerosalem. Linaposan no Joda iyaw pagdaydayāwanaw di ĀPO a chadaw na a maynamot do nakapangabahay na so mabakes saw a magdaydāyaw so gan-ganaet a dyos. 12 Si ĀPO pakono mangpaksyat a mapabawa dyirad tawotawo ni Jakob so aran sino a mahakay a mamarin so nya. On, mapaksyat iya aran mangyangay so dāton di ĀPO a Manakabalin do Tābo.

13 Asa pa parinen nyo. Basahen nyo so hō nyo altaraw ni ĀPO do katanyis kan kapagdong-dong-aw nyo, ta ikaskāso na pa sabaw dāton nyo mana rawaten na pa sabaw makaay-āyo a yapo do kakamay nyo. 14 Iyahes nyo a kon nyo, “Āngo ta rawaten naba?” Maynamot ta si ĀPO, ki nangtistīgo so tōlag do payawan mo kan baket mo do kabayobayo nyo paw. On, maynamot ta rinārayaw mo kapodno mo dya a aran iya, ki rārayay kan baket mo do tōlag nyo a naychabahay.

15 Pinayparin nabawri ni Āpo imo kan baket mo a asa? On, do inawan kan ispirito, ki dyira naynyo. Āngo panggep na? No chakey na, ki madyosan no anak nyo. Dawa, aywanan mo ispirito mo, kan rarayāwen mo abaw kapodno mo do baket mo do kabayobayo nyo. 16 “Ta ipsopsok ko kapaysyay!”‡2:16 Mt. 19:3-9; Mk 10:1-12 bata ni ĀPO a Dyos no Israel. “On, ipsopsok ko kinaranggas a parinen do baket. Dawa, aywanan nyo do ispirito nyo, kan rarayāwen nyo abaw kapodno nyo do baket nyo.”

17 Hinopag nyo naw ĀPO do inchirichirin nyo sa. Ki aran komwan, iyahes nyo a kon nyo, “Maypāngo nakahopag namen sya?” Hinopag nyo na do kaibahey nyo sya a kon nyo, “Tabo mamarin so marahet, ki maganay kan makaay-āyo do kapanyideb ni ĀPO,” mana do kaiyahes nyo a kon nyo, “Dino yanan no Dyos no kinalinteg?”