No Libro A Malakyas
No Pakatonngan so Paytābwan no Nya Libro
Do nakatayoka dana no kapirwa a nakapatnek no Timplo do Jerosalem a naibahey do libro a Esra, si propīta Malakyas, ki nabakel a maynamot do kadyīdo saw no kaparin dan tawotawo a naybidi a yapo do nakaakawan da do Babilonya, naten dana saw papādyaw. Ta do dāwri, sinsīsingpet saw tawotawo a magdaydāyaw di Āpo Dyos. Kosīten daw Dyos do kaitoroh da siras dyi saw a omno a dāton. Nachikabahay sa dyirad gan-ganaet, as kan nachipagdāyaw dana sa dyirad dyos da.
Dawa, binallaāgan na sa ni Malakyas a maybidi sa do kosto a kapanganohed kan dadakay a akmas naitolasaw do linteg ni Āpo. Ipanakem na dyira a maynamot do tōlagaw no Dyos di Lebi a kapanoroh so byay kan kapya (2:5). Inbahey na dyiraw maynamot do arawaw a kangay ni Āpo a mangokom kan mangdalos siras tawotawo na. Ki manmanma a toboyen nanchiw pachirawatan na a mangisagāna so ayaman na.
No Naychakarwan no Nya Libro
No makabābaba a kaparin dan tawotawo no Dyos (1:1-2:9)
No kapaydabdab ni Malakyas siras tawotawo no Dyos (2:10-17)
No īto a kapangokom no Dyos sira (3:1-4:6)
Malakyas
1
1 Nyaw minsāhi a inpaltiing ni ĀPO dyirad tawotawo no Israel a inpakatoneng na di Malakyas.
No Adaw ni Āpo dyirad Tawotawo no Israel
2 Bata ni ĀPO dyirad tawotawo na a kāna, “Nāw koynyo a inadaw. Ki iyahes nyo a kon nyo, ‘Maypāngo nakaipaboya mo so kadaw mo dyamen?’ ”
Bata pa ni ĀPO a kāna, “Maykakteh sabawri sa Esaw kan Jakob? Ki aran komwan, chinadachadaw ko si Jakob, 3 as inipsok ko si Esaw. Pinayparin ko katokotokonan*1:3 Gen. 36:8-9 na a let-ang, kan innonolay ko tāwid na a tana dyirad bolaw saw a chito.”
4 An batahen dan kapotōtan ni Edom†1:4 Edom, ki matarek a ngaran ni Esaw. Gen. 25:30, 36:1 a kāna, “Aran nahomis kami, pirwahen namen anchi a patneken saw idiidi namen a narārayaw.”
Bata pa ni ĀPO a Dyos a Manakabalin do Tābo a kāna, “Maparin daw mapatnek, ki pirwahen konchi a rārayawen. Matawagan sanchi so Marahet a Tana, kan no tawotawo na, ki nāw da do taywara a kasoli no Dyos. 5 Inyonchiw mismo a makaboya so nya, kan batahen nyonchi a kon nyo, ‘Mabīleg si ĀPO a aran do matateng pa kan no letteng no Israel!’ ”
No Kapaydabdab ni Āpo Siras Papādi
6 Si ĀPO a Manakabalin do Tābo, batahen na dyirad papādi saw a kāna, “No anak, ki dayāwen naw āmang na. No adīpen, ki anyiben naw āmo na. An yaken āmang nyo, dino dāyaw a maiparbeng dyaken? An yaken āmo nyo, dino kaanyib a maiparbeng dyaken? Ki inyo a papādi, chahanyinyi nyo ngaran ko! Ki iyahes nyo a kon nyo, ‘Maypāngo a chinahanyinyi namen ngaran mo?’
7 “Pinarin nyo do kapangidāton nyo so dya omno a dāton‡1:7 Do Hebreo a chirin, ki ‘nalaposan a kanen’. Eks. 12:5; Leb. 1:3, 10; Deot. 15:21 do altar ko. Ki iyahes nyo a kon nyo, ‘Maypāngo a chahanyinyi namen imo?’ On, do kaibahey nyo sya a iyaw lamisaan§1:7 Iyaw “lamisaan,” ki mayengay do altaraw. ni ĀPO, ki maparin a tod a dyābat. 8 Do nakaiyangay nyo so bolsek, piday, mana maganyit a animal a idāton, kostori? Padāsen nyo paw mangyangay so komwan do gobirnador nyo! Maay-āyo paro dyinyo mana mahwahok paro dyinyo? Katēn!” batahen ni ĀPO a Manakabalin do Tābo.
9 Changori, inyo a papādi, padāsen nyo paw mangdaw do Dyos so parabor na dyaten, ta āngonchan chāsi na yaten.
Ki nya paw yahes ni ĀPO a Manakabalin do Tābo a kāna, “Do komwan saya a dāton a yapo do kakamay nyo, rawaten ko paro? 10 Ayya, myan pakono asa dyinyo a mangneb so pantaw saya no timplo tan dyi kamo a makasdep a mamyay so apoy do altar ko a abos sinpaspangan! Maay-āyo akwabaya dyinyo, as kan rawaten kwaba iyaw dāton a yapo do kakamay nyo. 11 Ta yapo do kadada no araw do dāya a manda do kasdep na do lāod, mabīleg iyaw ngaran ko dyirad nasnasyon. As do tabo logar, ki maidāton insinso kan omno a dāton a maynamot do ngaran ko. Ta no ngaran ko, ki mabīleg dyirad nasnasyon,” bata ni ĀPO a Manakabalin do Tābo.
12 “Ki padayāwan nyo abaw ngaran ko do kaibahey nyo sya a iyaw lamisaan ko a ĀPO nyo, ki maparin a tod a dyābat. As kan kaibahey nyo sya a iyaw maidāton a makan, ki maparin a chahanyinyi. 13 Ibahey nyo pa a kon nyo, ‘Makahopag danaya tabo nya!’ as kan paydadamoyong nyo,” bata ni ĀPO a Manakabalin do Tābo.
“Do kaiyangay nyo so animal a tinakaw nyo, piday, mana maganyit a idāton nyo, hahawen nyori a rawaten ko nawri do kakamay nyo? 14 Mabay pakono iyaw mangkōsitaya a aran sīgod a myan omno a malloko a karniro do arban na kan insapata na a idāton, ki basbāliaya a idāton na dyaken a ĀPO nyo myanaw so pakapilāwan. Ta yaken, ki mabīleg a āri, kan iyaw ngaran ko, ki anyiben dan tabo a nasnasyon.”