14
No Kangay kan Kapagtoray ni Āpo
1 Īto danaw araw a kapangokom ni ĀPO. As iyanchiw Jerosalem, ki masamsaman anchi, kan iyaw masamsam daw, ki bingbingāyen danchi do salapen nyo. 2 Ta si Āpo, ki akpehen nanchiw tabo nasnasyon a manggobat so Jerosalem. Abāken danchiw syodadaw, samsaman da sanchiw bahabahay saw, as kan ramesen da sanchiw mababakes saw. Kagodwa danchi no tawotawo saw, ki maakaw. Ki no kadwan dyira, matokos sanchi do syodadaw.
3 Sinpangan na, mangay anchi si ĀPO a manggobat so nawri sa nasnasyon akmas nakapachigobat naw do nakarahan. 4 Do dāwrichi a araw, maytēnek anchi si Āpo do Tokon a Olibo a myan do dayāenaw no Jerosalem. Sinpangan na, mayakchid anchiw Tokonaw a Olibo a yapo do dāya a magpalāod kan mamarin so marahawa payahosongan. Iyanchiw kakchid naw no tokonaw, ki magpaammyānan as iyaw kakchid naw, ki magpaabagātan. 5 Magtālaw kamonchi a magbalsot do payahosonganaya a machipanda do Asal.*14:5 Asal, ki chapatak aba an dino yanan na. On, magtālaw kamonchi a akma siras kapoonan nyo saw do nakapagin-ginedaw†14:5 Amos 1:1; Isa. 6:4 do chimpo ni Āri Ossias do Joda. Sinpangan na, mangay anchi si ĀPO a Dyos ko kontodo tabo anghilis naw.
6 Anchan marapit nawri a araw, apabanchiw sēdang, kahanebneb mana apon a mayparin a yilo.‡14:6 Iyaw nya birsikolo, ki malawag aba do Hebreo a chirin. 7 Machitatārek anchiw nawri a araw§14:7 Mana “nāw nanchi a tongtongen mayaraw”. a si ĀPO lang makapatak. Abaw māraw mana mahep, ki do ōras a mahep myan anchiw sēdang.
8 Anchan mangay nawri a araw, sibibyay anchi a ranom moyog*14:8 Do Hebreo a chirin, ki “sibibyay a ranom”. No chakey na batahen, ki ranom a moyog a yapo do akbod. Ese. 47:1-7; Joel 3:18; Pal. 22:1 a mohtot a yapo do Jerosalem. Iyaw godwa naw, ki moyog do Nadiman a Tāw. As iyaw kagodwa naw, ki moyog a komwan do Mediterranean a Tāw. Nāw nanchi a moyog a aran do rayon kan do ammyan.
9 As si ĀPO, ki mayparin anchi a Āri do intīro a lōbong. Do dāwrinchi a araw, Magdaydāyaw anchiw katayitayisa dya a iya lang ĀPO, as kan iyanchi lang ngaran naw bigbigen da.
10 Malantag dananchiw tabo tanaya do omdibon Jerosalem, makayapo do Geba†14:10 1 Ār. 15:22; 1 Kron. 6:60 do ammyānan no Joda mandad Rimmon‡14:10 An maynamot do Rimmon, masigorādo aba dino yanan nya idi. Jos. 19:7; Neh. 11:29 do abagātan no Jerosalem. Ki nāw na matwatohos Jerosalem kan tana saw do omdibon naw. Makarapit anchiw syodad makayapo do Rowanganaw ni Benhamin a mandad Rowangan no Sōli a naytēnekan sīgodaw a rowangan, kan makayapo do Pagwanawanan ni Hananel a mandad pamīsanaw so ōbas a dyira no āri. 11 Omyan sanchiw tawotawo saw do Jerosalem, ta apabanchiw pakarārayawan a mapaybiybinākel dyira.
12 Manoroh anchi si ĀPO so makamwamomo a ganyit do tabo nasyon saw a nanggobat so Jerosalem. Mahta anchiw asi da a aran myan sa pa sitetēnek. Masaw a mahta anchiw mata da do bahay naya. As iyaw rida da, ki mahta anchi do dangoy da.§14:12 Do kaychowa pa, no pinarin dan tawotawo do nasnasyon saw a omdibon Israel dyirad kabōsor da, ki hathaten daw kodit, bolsekan daw mata, kan akteben daw rida.
13 Do dāwrinchi a araw, itoroh anchi ni ĀPO rakoh a kāmo kan kapaychawaw do tawotawo. Tan komwan kāda asa a tawo, ki tiliwen naw katangked naw kan maydiman sa. 14 Machiggobat sanchiw tawotawo no Joda a mangisakit so Jerosalem.*14:14 Mana “Aran siraw tawotawo no Joda, ki machigobat sa dyirad tawotawo do Jerosalem.” Iyanchiw kinabaknang da saw no tabo myan saw do omdibon a nasnasyon, ki akpehen da sanchiw ārwaw a balitok, pirak, kan ayowayob da. 15 Parihonchi a makamwamomo a ganyit mangay dyirad kabalyo, molo,†14:15 An magdakep kabalyo kan asno, iyaw anak mana pōtot da, ki molo. kamilyo, asno, kan siraw tabo animal saw dyirad kampo daw no kabōsor.
16 Sinpangan na, siraw tabo kabōsoraw a nakalāsat a yapo do tabo nasnasyon saw a nachigobat do Jerosalem, tinawen anchi a somonget sa do Jerosalem. On, mangay sanchi a magdaydāyaw di Āri a iyaw ĀPO a Manakabalin do Tābo kan silibraren danchiw Pistaw no Kapaychabengbengbeng. 17 An myan saw tawotawo a yapo do nasnasyon a dya somonget do Jerosalem tan mangay a magdāyaw di Āri a ĀPO a Manakabalin do Tābo, machimoy abanchi do tana daw. 18 As an maskeh saw taga Egipto saw a somonget a mangay a mangsilibrar so Pista no Kapaychabengbengbeng, machimoy abanchi do tana daw. Mangay anchi dyiraw machipariho a ganyit do itoroh saw ni ĀPO do kāda nasyon a maskeh a mangay a machisilibrar so nya pista. 19 Iyanchiw nyaw dōsa do Egipto kan do tabo a nasnasyon a maskeh a somonget a mangsilibrar so Pistaw no Kapaychabengbengbeng.
20 Do dāwrichi a araw, aran siraw dēdekey saw a pātit a pangbisti so olodan do kabalyo saw, ki maitolas anchiw, “Naidāton para di ĀPO.”‡14:20 Mana “masantawan para di ĀPO”. As siraw banga saw do Timplo, ki masantawan a akma dana sanchis masantwan saw a sabak do salapen no altar. 21 Kāda banga do Jerosalem kan do Joda, ki mapatarek anchi a para do kapagdāyaw di ĀPO a Manakabalin do Tābo. Siraw tawo saw a mangidāton, ki osaren da sanchiw banga saw a pamakbwalan so asi no dāton da saw. Do dāwrichi a araw, apabanchiw maglaklāko§14:21 Mana “manatadi” mana “Kananeo”. Jn. 2:16 do Timplo ni ĀPO a Manakabalin do Tābo.
*14:5 14:5 Asal, ki chapatak aba an dino yanan na.
†14:5 14:5 Amos 1:1; Isa. 6:4
‡14:6 14:6 Iyaw nya birsikolo, ki malawag aba do Hebreo a chirin.
§14:7 14:7 Mana “nāw nanchi a tongtongen mayaraw”.
*14:8 14:8 Do Hebreo a chirin, ki “sibibyay a ranom”. No chakey na batahen, ki ranom a moyog a yapo do akbod. Ese. 47:1-7; Joel 3:18; Pal. 22:1
†14:10 14:10 1 Ār. 15:22; 1 Kron. 6:60
‡14:10 14:10 An maynamot do Rimmon, masigorādo aba dino yanan nya idi. Jos. 19:7; Neh. 11:29
§14:12 14:12 Do kaychowa pa, no pinarin dan tawotawo do nasnasyon saw a omdibon Israel dyirad kabōsor da, ki hathaten daw kodit, bolsekan daw mata, kan akteben daw rida.
*14:14 14:14 Mana “Aran siraw tawotawo no Joda, ki machigobat sa dyirad tawotawo do Jerosalem.”
†14:15 14:15 An magdakep kabalyo kan asno, iyaw anak mana pōtot da, ki molo.
‡14:20 14:20 Mana “masantawan para di ĀPO”.
§14:21 14:21 Mana “manatadi” mana “Kananeo”. Jn. 2:16