7
1 Anak ko, konokonen mo saw chirin ko,
kan kapyahen mo bilbilin ko do aktokto mo.
2 Tongpalen mo saw bilbilin ko tan maynam byay mo.
Kapyahen mo saw nanawo ko akmas kaipateg mos mata mo.
3 Nāw mo a iktokto inanawo ko,*7:3Do Hebreo a chirin, ki “Pabedbeden mo sa do kakamay mo.”
kan itolas mo sa do aktokto mo.
4 Ibidang mo kinasīrib a akmay kakteh mo a mabakes,
kan tawagan mo kapakaāwat, akmay masngen a kabagyan mo,
5 tan padichanen daymo do mabakes a machikamalāla,
do baket a dya mapodno a malalamōyot so kapaychirin.
No Machikamalāla a Mabakes
6 Myan naypisa a do bintan no bahay ko,
naylalawong ako do payawan saw no rihas.
7 Naboya ko dyirad machononot,
nadlaw ko dyirad babbaro,
ki myan asa dyira a kōrang so sīrib.
8 Myan a mayam do naykorosanaw no kalsāda
a lomongo do masngenaw do bahayaw no mabakes
9 do kapaysarisari, do kamahep,
as do kapaypabak danaw no ahep.
10 Do dāwri, binayat no mabakesaw
a nakalaylay a akmay balangkantis a myan so panggep a mangallīlaw.
11 Maringgor kan masōkir,
as kan mapnek aba a myan do bahay.
12 Masanyib a myan do kalsāda mana do plāsa,
do kāda naykorosan no kalsāda a nāw na manala.
13 Tiniliw na kinepkep barwaw a dinadek,
kan sitotored a nakabata sya dya a kāna,
14 “Nangidāton ako siras dāton a kapachikapya,†7:14 Iyaw natokos saw a karni a yapo do naidāton, ki para do nangidātonaw. Leb. 7:16
kan sicharaw, tinongpal ko saw insapata ko do Dyos.
15 Dawa, minohbot ako a mangbayat dyimo.
Chinichwas koymo, kan sichangori, nachichwasan koymo!
16 Binolayan kwaw katri kwaw
so makolor a mapīno a tela a yapo do Egipto.
17 Binangbanglwan kwaw katri kwaw
so mirra, aloe, kan cinnamon.
18 Ka dya, ta maychararakan ta imāsen mayoknod.
Yay ta nanāmen maykepkep a maysin-adaw.
19 Ta si lakay ko, aba do bahay,
ta nangay a nagbyahi do mabawa.
20 Nanghapaw so āro a kwarta,
kan maybidinchi anchan kābos bohan.”
21 Inahwahok naw barwaw do maiīmas saw a chirin na,
kan ginargari na do malalamōyot saw a inbahebahey na.
22 Naychihat a minonot barwaw
a akmay bāka a maiyangay do pagpartyan,
akmay ogsa a nakagtos so otap
23 a mandad nakachibot no pōso na,‡7:23Do Hebreo a chirin, ki “atay na.” Ta do inanohdan da, ki iyaw atay, ki yanan pakayapwan kinaderrep.
kan akmay boyit a dominna do yanan asdok
a dyi na chapatak a dawriw paybitosan byay na.
24 Dawa, sichangori, inyo a anak ko, adngeyen nyo yaken.
Ikāso nyo a maganay chirin saya a ibahey ko dyinyo.
25 Midit kamo aba a manoroh so ayat nyo do komwan a mabakes.
Somiwal kamo aba a lomongo dyirad ayayaman na.
26 Iyaw nakayapwan nakarārayaw no āro a mahahakay,
kan mabidangan abaw nadiman a maynamot dya.
27 Iyaw bahay na, akmay kalsāda a lomongo do tanem
a mosok do kwarto saw no kadiman.