8
No Kapanawag no Kinasīrib
1 Manawag abawriw kinasīrib?
Mangngēngey abawriw kapakaāwat?
2 Maytēnek do paytoytokonan do payis no ayayaman,
do paybabayatan dan rarahan.
3 Maytēnek pa a mangket do rowangan do salapen no syodad,
do yanan no asdepan a mangngēngengey a kāna,
4 “Inyo a tawotawo, tawagan koynyo.
Manawag ako siras tabo a tawotawo do hapotayan tana.
5 Inyo a machononot, machinanawo kamo pakono so nainsirīban a kapangtokto.*8:5Prob. 1:4
Inyo a abos arang, mananawo nyo pakono kapakaāwat.
6 Adngeyen nyo, ta ibahey ko dyinyo maikari saya,
kan yapo do bibi ko, ichirin ko malinteg saya.
7 Iyaw dangoy ko, ichirin naw kaoyodan,
ta no bibi ko, ipsopsok naw karahtan.
8 Tabo ichirin ko a yapo do dangoy kwaya, ki malinteg.
Aba polos dyīdo mana kapangallīlaw na.
9 Dyira do myan so kapakaāwat, malinteg tabo a ichirin ko,
kan kosto dyirad tawo a myan so kapakatoneng.
10 Nawri pakono pidyen nyo inanawo ko a dya pirak,
kan kapakatoneng a dya pōro a balitok,
11 ta kinasīrib, mapatpateg kan alāhas,
as kan tabo chalakam mo, abaw kapariho na.
12 “Yaken a Kinasīrib, machirayay ako do nainsirīban a kapangtokto.
Myan dyaken kapakatoneng kan kosto a kapangeddeng.
13 Iyaw no kaanyib di ĀPO, ki kapangipsok so marahet.
Ipsok ko tangsit kan pangas.
Masaw marahet a kaparin kan dya omno a kapaychirin.
14 Myan dyaken bagbaga kan masīrbi a kinasīrib.
Myan pa dyaken kapakaāwat kan panakabalin.
15 Pagāryen ko saw āri,
kan sidongan ko saw magtoray a mangeddeng so kosto.
16 Pagtorayen ko saw magtoray.
Masaw do tabo a mabigbigbig a mangitoray so malinteg.
17 Chadaw ko saw madaw dyaken,
as siraw maychichwas dyaken, madongso danchi yaken.
18 Myan dyaken kinabaknang kan dāyaw.
Ari dyaken maynam a kinabaknang kan kaasinso.†8:18Mana “kinalinteg”.
19 Iyaw omsi a yapo dyaken, maganaganay kan pōro a balitok,
kan maganaganay kan iyaw kagaganayan a pirak.
20 Manakey ako do ayaman no kinalinteg
a monot dyirad rarahan no kosto.
21 Ipatāwid ko kinabaknang dyirad madawaw dyaken,
kan apnohen ko pangapyan da saw so mabalor a warawara.
22 “Si ĀPO, pinanma na yaken a pinarswa,
sakbay no nakaparin na so aran āngo a naparswa.
23 Naitongdo ako yapo do abos pandan,
yapo do siknanan, sakbay a nangrogi iyaw lōbong.
24 Nayanak ako na do kabo da paw no tāw,
do kabo da paw no akbod a mapahtot so ranom.
25 Sakbay a napōtar tokotokon saw,
sakbay a myan paytoytokonan, nayanak ako na.
26 On, sakbay a pinarin no Dyos tanaya kan tantanap na,
mana sakbay no manōma a ahbek no lōbong,
27 myan ako na do nakapangay naw so hanyihanyit,
do nakamarka naw so payahapan no tāw kan kademdeman.
28 Myan ako na do nakapangay naw siras demdem do hanyit,
do nakapahtot naw siras akbod do irahem no tāw.
29 Myan ako na do nakapangay naw so pandan tāw
tan dya homopaw ranom do inbilin na,
kan do nakapangay naw so pachipandan dan pondasyon no tanaya.
30 Do dāwri, myan akod katalin naw, akmay sanay a trabahador na.‡8:30Mana “akmay adekey”.
Yaken iyaw no pakayapwan no ragsak na do kararaw a
pirmi a masoyosoyot do salapen na.
31 On, chasoyosoyot ko intīro a lōbong,
kan charagsak ko tawotawo saw.
32 “Changori, adngeyen nyo yaken, inyo a anak ko.
Magāsat saw magtongpal do chakey ko.
33 Adngeyen nyo nanawo ko tan maypasīrib kamo.
Nonolay nyo aba.
34 Magāsat iyaw tawo a mangadngey dyaken
a nāw na kararaw a magsagāna dyaken do rowangan ko
a mangnanaya do pantaw ko.
35 Ta no makachichwas dyaken, madongso naw byay,
kan rawaten naw pakahwahokan ni ĀPO.
36 Ki no dya makachichwas dyaken, paynyinan naw inawan na,
as sira tabo a mangipsok dyaken, chadaw daw kadiman.”