18
No Karārayaw no Babilonya
1 Do katayokan nyaya, nakaboya ako so asa matarek a anghil a naypabodis a yapo do hanyit a myan so rakoh a toray, as kan rinanyagan naw no tanaya do chinyel naw. 2 Sinpangan na, naychirin so oltimos kalyak a kāna, “Narārayaw! Narārayaw danaw no mabīlegaw a Babilonya! Sichangori, ki nayparin dana yanan dan dimonyo kan tabo no klasi no marahet saya a ispirito. On, as kan nayparin dana aponan dan tabo saw a naibidang a malapos kan makabābaba a manomanok. 3 Ta tabo nasyon saya do lōbongaya, ki nachinom dana sa do kinaderrep no kapachikamalāla na. As tabo san ar-āri do tanaya, ki nachoknod sa dya, as kan bomnaknang saw maglaklākwaw a maynamot do dya mabaywan a derrep na.”
4 Sinpangan na, nakadngey ako so asa matarek a timek a yapo do hanyit a ibahebahey na a kāna,
“Karwan nyo, inyo a tawotawo ko,
kan machisyay kamo do dyaya mabakes
tan machirāman kamo aba do gatos na,
as kan tan dyi kamo a mairāman do dōsa na a kalidyatan.
5 Ta nakarapit danad hanyit iyaw nakawpo no gatos na,
as kan makawayakan abanchi no Dyos karahet na.
6 Maipadidiw pakono dyaw akmas inpadidiw naw do kadwan.
Maypirwa pakono a mabahes pinarin nad tawotawo nyo.
On, paypirwan pakono no bāso naw lidyat
a inomen na kan siraw inpaynom naw dyirad matarek.
7 An maypāngo kapangas na kan kaderrep na,
ki komwan pakono maitoroh dya a kalidyat kan kapagladingit na,
ta pirmi na ibahebahey do inawan na a kāna,
‘Ayket! Yaken, asa ako a rēyna, as kan nayparin ako aba a bālo, polos!
On, mapadāsan ko abanchi a polos ladingit!’
8 Ki maynamot do dyaya a pangas na,
mayirayay anchi a mangay dya do asa karaw siraw no kalidyat,
iyaw kadiman, katanyitanyis, kan kapaychapteng.
On, as kan masosohan nanchid apoy,
ta manakabalin no Dyos a mangokom sya.”
No Katanyis Da no Mangsahaw do Babilonya
9 Siraw ar-āri saw a nachirāman do kapachikamalāla naw kan nachipanaham so kinaderrep naw, ki tanyitanyisan danchiw syodadaw anchan maboya daw ahobaw no kasosoh naw. 10 Maytēnek sanchid mabawaw a mamo maynamot do kalidyat naw, as batahen da, “Piman! Kapakasyāsim pa, imo a magdindināmag kan mabīleg a syodad no Babilonya! Āngo ta nalisto ka nabo do asa lang a kaoras?”
11 Siraw maglaklākwaw do tanaya, ki tanyisan da, ta apabanchiw gomātang so lako daw.
12 On, apabaw gomātang siras balitok daw kan pirak da saw kan bato da saw a mangingīna kan perlas, as kan iyaw mangingīna saw a tela da a obi kan mangingīna saw a sīda a mabaya, as kan tabo a kītan mababanglo a kayo kan tabo a kīta no warawara a naparin do sōng no elipanti a animal, as kan aran āngo a warawara a naparin do mangingīna a kayo, bronsi, pasek, marmol. 13 Myan ilāko da a kanela, rikado, insinso, mirra, olibano, arak kan lana, arina kan trīgo, bāka kan karniro, kabalyo kan logan, kan byay pan tawo a inadīpen da. 14 Batahen da pan maglaklakwaw dya, “Pīman! Ara sabaw manginginaw a warawara a chinakey mo. Nabo dana saw tabo a kinabaknang kan kapintas mo, as kan machichwasan mo pa sabanchi a polos!” 15 Siraw maglaklākwaw a bomnaknang maynamot do kapaglaklāko daw dya, maytēnek sad mabawaw a mamo do kalidyatan naw. Maychaychahoho sa a tomanyitanyis, kan batabatahen da, 16 “Ay, ay, piman! Kapakasyāsim pa! Makamwamomo naparin do mabīlegaya syodad a nakalaylay so akmay obi kan mabaya, kan nakaalahas so balitok, mangingīna a bato kan perlas. 17 Ki iyaw nya kinabaknang na, ki narārayaw do asa lang a kaoras!”
Ki myan sa do mabawaw daw magboyaw a tawotawo a siraw no kakapitanaw kan siraw tripolanti da saw no biray kan sira tabo machilogloganaw dyira kan siraw no maytaytarabākwaw do tāw. 18 Ki tomanyitanyis pa sa do kaboya daw so ahobaw do nakasosoh naw, kan binatabata da, “Aryoriw matarek a syodad a akmas nyaya a mabīleg?” 19 Do dawri, pinangayan daw oho da so ahbek a mangipaboya so kaliday da, as kan tomnanyis sa a kon da,
“Ay-ay pīman! Makamwamomwayaw naparin do mabīlegaya a syodad!
Ta maynamot do kinabaknang na,
bomnaknang sa tabo myanaw so biray.
Ki do asa kaoras, ki nabo!”
20 Ki inyo a myan do hanyit, masoyot kamo pakono a maynamot dya.
On, masoyot kamo a tabo, inyo a tawotawo no Dyos
kan apostolis, as kan propīta,
ta intoroh no Dyos iyaw kaokom na a maynamot dyinyo.
21 Do dawri, nanghap iyaw asaw a mabīleg a anghil so asa bato a akmas karakohaw no kararakohanaw a gilingan a bato kan pinagsid nad tāw, as nakabata na sya a kāna,
“Komwan iyaw makamwamomo a kasday
no magdindināmagaya syodad no Babilonya,
as kan mapaboya pabanchi a polos.
22 Iyaw tokar dan magtoktokar so arpa kan magkankansyon
do dawri kan siraw magpitwaw kan magtrompīta,
ki madngey pa sabanchi daw.
Apabanchiw yapo dya a siraw masiglataw
a mamariparin so aran āngo a warawara.
Maylilyak pabanchiw gilingan mana pangsadan,
ta apabaw kanen tawotawo daw.
23 Apabanchi dyaw no maranyag a paysohwan.
Siraw magkasar saw, ki madngey pabaw timek daw.
Nyaw naparin dya a dōsa ni Babilonya
a maynamot ta siraw maglaklāko naya,
ki batahen da a sira danaw kasisītaan do lōbongaya.
Inpangpangas da a sira danaw nangyangay so kinabaknang na.
On, naallīlaw dana sa tabo tawotawo do lōbongaya
do marahet saya a panggep na.
24 Myan dyaw raya dan propītaw kan tawotawo saw no Dyos
kan sira tabo diniman naw do intīro a lōbong.”