19
No Kapagragragsak do Hanyit
1 Do katayokan nyaya, myan iyaw nadngey ko a malyak a ringgor no akmay riniwriw a tawo do hanyit, kan ibahebahey da a kon da,
“Aliloya! Maidaydāyaw pakono si Āpo Dyos!
Iyaw kaisalākan, tan-ok, kan panakabalin, iyaw myan dya.
2 Ta iyaw kapangokom na, ki oyod kan malinteg.
Ta inokom naw no magdindināmagaw a machikamalāla a mabakes
maynamot do nakalapos nas tanaya do kinaderrep na,
as kan binahes no Dyos raya daw no adīpen na saw
a diniman no mabakesaya.”
3 Inyagagay da pa mirwa a kon da,
“Aliloya! Dayāwen ta pakono Dyos,
ta nasosohan danaw mabakesaw,
as kan iyaw ahob naw, ki maypatohos a abos pandan.”
4 Ki siraw no dadwaw a poho kan apat a panglakayen, as kan siraw apat saw a sibibyay a parswa, nagrōkob sa a nagdāyaw do Dyos a maydisna do trono naw, kan ibahebahey da a kon da, “Maparin pakono a komwan. Amen! Aliloya!”
No Kapagkasar no Karnirwaw
5 Sinpangan na, myan iyaw timek a yapo do tronwaw a makabata sya a kāna,
“Idāyaw nyo Dyos taya,
inyo a tabo a adīpen na,
inyo a tabo a manganohed dya,
aran matan-ok mana mabodis!”
6 Do dawri, nakadngey ako na so akmay riniwriw a tawo kan akmas kinayasakasaw no moyog a ranom a timek a yapo do hanyit kan akmas timekaw no kinalebkeb no adey, kan inbahebahey na,
“Aliloya! Ta iyaw Āpo a Dyos ta a Manakabalin do Tābo,
ki iya danaw magtoray.
7 Machita masoyot kan maragsak ta,
kan dayāwen ta si Āpo Dyos!
On, maragsak ta, ta narapit danaw ōras a kapagkasar no Karnirwaw,
as kan nakasagāna danaw nobya na.
8 Napalobōsan dana a maylaylay so mangīna kan machidat a maydak a laylay.”
No chakey na batahen machidat kan maydak saya a laylay, ki iyaw no maganayaw kan malinteg a kaparin dan tawotawo no Dyos.
9 Sinpangan na, inbahey no anghilaw dyaken, “Itolas mo nya, ta oyod sa chirin a yapo di Āpo Dyos. On, itolas mo nya, ‘Magāsat saw no naawis a machihanghang do Karnirwaw do kapagkasar na.’ ”
10 Ki do dawri, nagrōkob ako do kokod naw tan dayāwen ko. Ki binata na dyaken a kāna, “Parinen mwabaw komwan! No Dyos lang iyaw no dayāwen mo! An yaken, ki asa ako lang a tobotoboyen ni Āpo Dyos a akma dyimo, as kan akma siras kakakteh mo saw a nangpaneknek so oyod maynamot di Jesos.”
Ta iyaw Maganay a Dāmag a innanawo ni Āpo Jesos, ki iya paw inpakatoneng dan propīta saw a maynamot do panakabalin no Ispirito Santo.
Iyaw Kangay ni Kristo
(Pal. 1:13-18)
11 Do dawri, naboya ko a naywangan danaw hanyit, as kan myan minohtot a maydak a kabalyo. No myanaw a somnakay do dawri a kabalyo, ki napangaranan so Matalek kan Oyod, kan malinteg iyaw kapangokom na kan kapamarin nas gobat. 12 Siraw mata naw, ki akma sas gomilgilāyabaw a apoy, as kan nakoronaan so āro do oho naw. Myan iyaw ngaran na a naitolas dya a aba polos makapatak sya, an dyi lang a iya. 13 Naylaylay so asa kalaylay a napakneban so raya, as kan no ngaran na, ki “No Chirin No Dyos.”*19:13 Isa. 63:3; Jn. 1:1 14 As siraw bōyot na saw do hanyit, ki nakalaylay sas machidat kan maydak, kan nakakabalyo sas maydak a mononot dya. 15 As iyaw mapangaran naw so Chirin no Dyos, ki myan minohtot a asa rakoh a kampilan do dangoy naw a pangābak na siras nasnasyon saya do lōbongaya. Itorayan na sanchi, as kan abaw makey a makaābak sya, ta kompormi abaw kapagdōsa na. On, ta akmas pamitosan daw no tawotawo so ōbas, ki komwan anchiw kapitos na siras mamarinaw so marahet a mangipaboya so kataywara no soli no Manakabalin a Dyos dyira. 16 As do kekeh naw kan iyaw no padang naw, ki naitolas daw iyaw ngaran na a “Āri dan tabo a āri, kan Āpo dan tabo a āpo.”
No Kapangābak ni Kristo do Marongsotaw a Animal
(Pal. 16:11-21; 17:8, 14; 20:7-10)
17 Do dawri, nakaboya ako so anghil a maytēnek do ranyagaw no araw, as kan kinalyak na tinawagan saw manomanokaw a somayap do kademdeman. Binata na a kāna, “Ngay, mangay kamo tan makpeh kamo a koman so rakohaya pagpistaan no Dyos. 18 On, mangay kamo tan kanen nyo siraw asi daya no āri saya, siraw asi da sayan kakapitanaya kan siraw soldādo, as kan iyaw asi dan kabalyo da saya kan siraw nakasakayaya, as kan tabo asi no tawotawo, siraw siwawayawaya mana siraw adīpen da saw, as kan siraw matatan-okaw a tawotawo mana siraw mabobodisaw.”
19 Sinpangan na, naboya ko iyaw marongsotaw a animal kan siraw ar-āri saw do lōbongaya kan siraw bōyot da saw a nakpekpeh a machigobat do nakasakayaw do kabalyo kan siraw no bōyot naw. 20 Ki iyaw no marongsotaw a animal, ki natiliw. Natiliw pa iyaw no bayatawaw a propīta na a namariparin so milagro do salapen naw no animalaw. On, pinarin naw milagro saya a pangallīlaw na siras nagpamarkaw so ngaran naw no marongsotaw a animal kan siraw no nagdāyawaw do ladāwan na. Siraw nya dadwa, ki naipoha sa do gomilgilāyab a minangan apoy†19:20 Dan. 7:11; Pal. 20:14, 15; 21:8 kan asopri. 21 As siraw kadwanaw a rārayay da, ki diniman na sa a tabo no nakasakayaw do kabalyo a maynamot do rakohaw a kampilan a minohtot do dangoy na. Nabsoy saw no manomanokaw a komninan so asi da.