1 Sinpangan na, tomnangay ako kan do matarek a parmata, nakaboya ako na so tawo a mangigpet so hobid a rorokod. 2 Inyahes ko a kon ko, “Kwanan mo?”

Ki tinbay na yaken a kāna, “Yangay ko pa rokoden Jerosalem tan matonngan ko kawbong kan kanaro na.”

3 Do dāwri, kinarwan yaken anghilaw a kasisirin ko, ki binayat no matarekaw a anghil, 4 kan binata na dya a kāna, “Mayyayo ka a mangay do dawri a barīto a mangigpet so hobid a rorokod, kan ibahey mo dya a mahadan abanchiw syodad no Jerosalem maynamot do taywara kāro no tawotawo kan binyay. 5 Inbahey ni ĀPO a iyanchiw mayparin a ahad a apoy do omdibonaw no syodad tan mangaywan sya. As iyanchiw machiyan daw do tābo a dayag na.”

6-7 Binata ni ĀPO dyirad tawotawo na saw a kāna, “Pinawpit koynyo do tabo a sōli no lōbong. Ki sichangori, inyo a naakaw, ki payyayowan nyo naw Babilonya kan somabat kamo na do Jerosalem. 8 As no aran sino a nasyon a mangsalid a mapaynyin dyinyo, bāli paynyinan naw oltimwaw so kapateg dyaken.”

Dawa, si ĀPO a Manakabalin do Tābo, nanoboy dyaken do bōkod na a dayag a mangyangay so nya minsāhi dyirad nasyon saw a nangsamsam so warawara dan tawotawo na saw a kāna, 9 “Yaken anchi a ĀPO mismo manggobat dyirad nasnasyon, as kan samsaman da sanchi no tawotawo saw a naakaw a inadīpen da.” Anchan maparin nya, mapatakan nanchi no kāda asa a si ĀPO a Manakabalin do Tābo nanoboy dyaken.

10 Batahen pa ni ĀPO a kāna, “Ikankanta nyo kasoyot nyo, inyo a tawotawo no Jerosalem, ta īto ako na kan machiyan ako dyinyo! 11 Āro sanchiw nasnasyon a machikāmang di ĀPO do dāwri a araw, kan mayparin sanchi a tawotawo na. Machiyan anchi dyinyo, kan matonngan nyonchi a tinoboy na yaken dyinyo. 12 Payparinen dananchi ni ĀPO tanaw a Joda a itatārek a dyira na do masantwanaw a tana,*2:12 Masantwanaw a tana, ta dawriw pagdaydayāwan di ĀPO. as kan pidyen narananchi a mirwaw Jerosalem a syodad na.”

13 Magolimek kamo, inyo a tabo a tawotawo do salapen ni ĀPO, ta īto dana dyaten yapo do masantwan a yanan na.