1 Nyaw minsāhi a maynamot do Israel a inpakatoneng ni ĀPO. On, nya batahen ni ĀPO a namolay so kahanyihanyitan, namarswa so lōbong, kan nanoroh so byay do tawo a kāna, 2 “Payparinen konchiw Jerosalem a akmay nairoyoy a palek*12:2 Iyaw palek, ki kasoli kan kapangdōsa no Dyos. a pangbōk siras nasnasyon do omdibonaw. Anchan lakoben danchiw Jerosalem, ki mairāman Joda. 3 Ki do dāwrinchi a araw, payparinen konchiw Jerosalem a akmay lāyit a dya mahodyihodyi a para dyirad tabo nasnasyon. No tabo a mangpādas a omhodyi sya, tod a maynyinan. Ki aran komwan, kāsan danchi no tabo nasyon saya do tanaya a raoten. 4 Do dāwrinchi a araw, itopak konchiw kataranta do kabalyo da saw, kan panganyawen ko sanchiw nakasakayaw. Bantayan konchiw tawotawo no Joda, ki pagbolseken ko sanchi a tabo kabalyo dan kabōsor da saw. 5 Do dāwri, batahen danchi no partīdos no Joda do aktokto da a kon da, ‘Siraw tawotawo no Dyos a omyan do Jerosalem, ki mayit sa maynamot ta si ĀPO a Manakabalin do Tābo Dyos da.’

6 “Do dāwrinchi a araw, payparinen ko sanchiw partīdos no Joda a akmay ahoten do nawpo a irotong, mana akmay somdesdeb a paysohwan do kaparayan a naynoy so dāwa. Patawsen da sanchi a tabo tawotawo saw do omdibon daw, ki mabdibdis sabanchiw tawotawo saw a omyan do Jerosalem.

7 “Yaken si ĀPO, ki isalākan konchi a manmanma siraw myan do kadwan a yanayanan do Joda sakbay no syodad a Jerosalem tan iyaw dāyawaya dan kapotōtan saya ni Dabid kan siraw omyan saya do Jerosalem, ki matwatohos aba kan iyaw dāyaw no Joda. 8 Do dāwrinchi a araw, yaken a ĀPO, ki sarapāhen ko sanchiw omyan do Jerosalem. As aran iyaw kakakapsotanaw dyira, ki mayparin a mayit a akmas Āri Dabid. Siraw kapotōtan saya ni Dabid, ki mangipangōlo dyira a akmas anghilaw ni ĀPO. On, akmaw Dyos a mismo.†12:8 Mana “Siraw kapotōtan saya ni Dabid, ki akma sanchis Dyos. On, akmaw anghil ni ĀPO a mangipangōlo dyira.” 9 Do dāwrinchi a araw, rārayawen konchiw kāda nasyon a makey a mangraot so Jerosalem.”

10 Batahen pa ni ĀPO a kāna, “Apnohen konchiw kapotōtan ni Dabid kan no tawotawo a omyan do Jerosalem so ispirito no kāsisyen kan kapaydasal. Chiban danchi yaken a iyaw binono daw,‡12:10 Jn. 19:34-37; Pal. 1:7 kan tanyisan danchi yaken a akmas katanyis daw so moyboh a anak a nadiman. Magdongdong-aw sanchi so taywaras kaynyin a akmas kapagdongdong-aw daw no tawotawo so nadiman a matoneng a anak da. 11 Do dāwrinchi a araw, taywara anchiw kapagdongdong-aw do Jerosalem akmas kapagdongdong-aw do Hadad-rimmon§12:11 Iyaw ngaran a Hadad-rimmon, ki batahen dan kadwan a yapo do dadwa ngaran no didyosen a Kananeo (bagyo kan kimat). Batahen da pa no kadwan a do dya paw yanan nakadimanan Āri Josyas. 2 Ār. 23:28-30; 2 Kron. 35:20-27 do tanapaw no Megiddo. 12-14 Kādanchi a partīdos do dawri a tana, ki magdongdong-aw sa a sira lang. As siraw mahahakay, ki magdongdong-aw sa a machitarek dyirad mababakes saw. Iyaw partīdos a yapo do kapotōtan Āri Dabid, iyaw partīdos a yapo do kapotōtan Natan, iyaw partīdos a yapo do kapotōtan Lebi, iyaw partīdos a yapo do kapotōtan Simey, kan tabo kadwan saw a partīdos, ki magdongdong-aw sa a sira lang.”