3
No Kapangokom no Dyos so Jerosalem
1 Kapakāsi pa no syodadaw a Jerosalem a nalaposan
a managribīldi kan mangidadanes so tawotawo na.
2 Ikaskāso nabaw aran sino.
Chaskeh naw mangrawat so kapangkosto.
Magtalek aba di ĀPO.
Maypasngen aba do Dyos naw.
3 Siraw opisyalis na a myan dya,
ki maranggas sa a akma say ngomernger a lion.
Siraw okom na, ki akma say mapteng a lobo an mahep
a abos akdahen para mabekas.
4 Siraw propīta na,*3:4 Mik. 2:11; 3:5-7 ki makospag kan dya matalek.
Mangallīlaw sa a sirarangas.
Siraw papādi na,†3:4 Hos. 4:6-9, 6:9; Mik. 3:11 ki laposan da saw masantwanaw,
kan dyīdohen daw no linteg no Dyos.
5 Iyaw ĀPO a myan do Jerosalem, ki malinteg.
Parinen nabaw dya kosto.
Kāda mabekas, ki ipaboya naw kinalinteg na.
On, kāda kapaysēsedang, ki mabdibdis aba.
Aran komwan, chapatak daba no dya malinteg kasnek.
6 Bata ni Āpo a kāna, “Inabo ko naw kadwan saw a nasyon.
Narakrak dana saw naahadan a yanan da a akmay kōta.
Pinayparin ko saw kalkalsāda a mainonolay,
tan abo danaw mayam dyira.
Siraw syodad da, ki narārayaw dana sa.
Abaw natokos, kan abo dana polos omyan daw.
7 Binata ko do tawotawo ko do Jerosalem a kon ko,
‘Sigorādohen ko a māmo kamonchi dyaken.
Rawaten nyonchiw kapangkosto ko dyinyo!’
An komwan, marārayaw abanchiw bahabahay da
do tabo kapangdōsa ko dyira.‡3:7 Mana “An komwan, mabo anchi do kapanyideb da tabo innanawo ko dyira.”
Ki basbāli a inyad-adda dan tawotawo ko
a tinongtong tabo dyīdo a kaparin da.
8 Bata ni ĀPO a kāna, “As dawa, nayahen nyo yaken,
do araw a maytēnek ako a mangipaneknek.
Disidido ako a mangakpeh siras nasnasyon
kan siraw no pagāryan,
as kan ibokbok ko no soli ko dyira.
On, ibokbok ko tabo oltimo a kapakasoli ko.
Iyaw intīrwaya a tana, ki marārayaw anchi
do apoy no manangīmonaya a soli ko.”
No Kari no Dyos a Paybidi na Saw Tawotawo na
9 Bata ni Āpo a kāna, “Sinpangan na,
tādyan konchiw kapaychiychirin dan tawotawo§3:9 Do Hebreo a chirin, ki “myan bibi a nadalosan”.
tan tabo sa, ki tawagan danchiw ngaran ni ĀPO,
kan pagsīrbyan da a masa.
10 Aran yapo pa sa do bīt no oksoksong no Kos,
siraw magdaydāyaw dyaken a naychawpit a tawotawo ko,
ki mangyangay sanchis dāton dyaken.
11 Do dāwrinchi a araw, inyo do Jerosalem,
ki masnekan kamo pabanchi
yapo do tabo kaparin nyo a nachiribīldi dyaken,
ta pakarohen konchi do dyaya a syodad
siraw mararagsak do kapangas da.
Polos a dyi kamo nanchi a makapagpangas
do masantwanaya a tokon ko.
12 Ki bidinen ko sanchi dyaw tawotawo
a mapakombaba a magtalek do ngaran ni ĀPO.
13 Siraw sibibyay saw a tawotawo no Israel,
ki mamarin pa saba so madi.
Maychirin pa sabanchi so bayataw,
mana mapahtot pabanchiw dangoy da so allīlaw.
Akma sanchis karniro a koman kan maynahah,
kan arabanchiw mangamomo dyira.”
14 Magkanta kamo a tawotawo no Sion.
Mangngēngey kamo so malyak, O Israel!
Magragsak kamo do tābo pōso nyo,
inyo a tawotawo no Jerosalem!*3:14 Do Hebreo a chirin, ki “anak a mabakes no Sion” kan “anak a mabakes no Jerosalem.” Sion kan Jerosalem, ki mayengay sa.
15 Napakaro narana ni ĀPO kapangdōsa dyinyo.
Pinonas narana saw kabōsor nyo.
Iyaw Āri no Israel a si ĀPO, ki myan dana dyinyo.
Apabanchiw kāmo nyo so didigra.
16 Do dāwrinchi a araw, ibahey danchi
dyirad omyanaw do Jerosalem a kon da,
“Māmo kamo aba, O Sion.
Paysosōhaw nyo abaw kataranta nyo.
17 Si ĀPO a Dyos nyo, ki myan dyinyo.
Iya, ki akmay taga-gobat a mangyangay so ballīgi nyo.
Chasoyot nanchi inyo do taywara a karagsak na.
Pabayohen naw byay nyo do adaw na.
Chasoyot nanchiw magkankanta so malyak para dyinyo.
18 “As dyirad naikeddeng saw a pista,
pakarohen†3:18 Mana “pakarohen konchiw didigra nyo,” mana “paychichipehen konchiw magdong-dong-aw saw. konchiw dongdong-aw nyo,‡3:18 Maynamot ta narārayaw Jerosalem, kan naakaw saw tawotawo a nabahod a naiyangay do Babilonya, makapaychichipeh saba a magdaydāyaw di ĀPO do masantwanaw a syodad.
tan dyi nyo nanchi a isabhay kasnek nyo.
19 Do dāwrinchi a ōras, salapen ko sanchi
a dosāen tabo saw nangidadanes dyinyo.
As ispalen ko sanchiw piday saw,
kan akpehen ko naakaw saw a naychawpit.
Torohan ko sanchi so pammadāyaw kan anyib
do aran dino do intīro a tana a nakasnesnekan da.
20 As do dāwrinchi a ōras, akpehen konchi inyo.
On, do dāwri a ōras, pasabaten konchi inyo.
As torohan konchi inyo so pammadāyaw kan anyib
dyirad tabo tawotawo do tanaya
anchan paybidihen ko iyaw kinabaknang nyo§3:20 Sep. 2:7
do salapen nyo,” bata ni ĀPO.
*3:4 3:4 Mik. 2:11; 3:5-7
†3:4 3:4 Hos. 4:6-9, 6:9; Mik. 3:11
‡3:7 3:7 Mana “An komwan, mabo anchi do kapanyideb da tabo innanawo ko dyira.”
§3:9 3:9 Do Hebreo a chirin, ki “myan bibi a nadalosan”.
*3:14 3:14 Do Hebreo a chirin, ki “anak a mabakes no Sion” kan “anak a mabakes no Jerosalem.” Sion kan Jerosalem, ki mayengay sa.
†3:18 3:18 Mana “pakarohen konchiw didigra nyo,” mana “paychichipehen konchiw magdong-dong-aw saw.
‡3:18 3:18 Maynamot ta narārayaw Jerosalem, kan naakaw saw tawotawo a nabahod a naiyangay do Babilonya, makapaychichipeh saba a magdaydāyaw di ĀPO do masantwanaw a syodad.
§3:20 3:20 Sep. 2:7