1 Oyod ko a ichaddaw o vahay mo, imo a makapamarin a Apohen! 2 No templo no Dios o oyod ko a ichahoho a angayan as kanawri no panmahen ko a chitahen o kapachasa ko dimo do yanan mo. 3 Aran sira o manomanok am namarin sa so otioyan a onongan da dira do anak da sa do masngen do altar moaya, O Dios a makapamarin a imo so Patol ko as Dios ko. 4 So pakamia da no matda do templo moaya a fermi a makakanta so idaday da dimo.

5 Mapalak sa o mian so ayet a yapo dimo a sira pa so fermi a mahoho nia o kayam da do rarahan a mangwan do Sion. 6 Ta aran do kayam da do makolay a ratay no Baca am mayvadiw ya a yanan no tombod sa a danom. Mawara pa o timoy a omno so ahsong. 7 Do kapaypasngen da do Sion a dia so yanan no somnivog aya a Dios am tod sa maypayet.

8 O Dios a makapamarin am adngeyen mo yaken. Atbayen mo yaken, imo a Dios ni Jacob. 9 Bendisionan mo, O Dios, o patol namen a iya so pinidi mo a patol.

10 No asa karaw a kayan do templo mo am mapipia kano asa livo karaw do matarek a logar. Pipiahen ko aran tod ako a maytetnek do ayeran no vahay no Dios ko as kano katda ko do vahay da no makagatogatosen. 11 No Dios o sehdang kano pachagoman ta. Iya o tomoroh so kapichapian kano onor diaten as arava o mapia a valaten na dira do omonot a omparin so mapia. 12 So kapalak da no tawo a masaray nimo, O Dios a makapamarin!