1 Apo namen a Dios, imo o savatan namen do atavo a tiempo a nakayapo do sitnanan na. 2 Manam so nakamaog mo sa so katokotokonan anmana manam kano nakamaog mo so mondo aya am mian ka na, O Dios, imo a abo so sitnanan kano kavosan.

3 Imo o mapavidi so tawo do tana a nia so pinakayapoan na. 4 No asa livo a ka kawan am akmay asa a karaw dimo. An nakarahan ya am akma yay pira kawras do mahep. 5 Mabo kami atavo a akmay tod a machirayay do ayo. Akmay tayenep o kaparin no tawo a makalo a mabo. Akma pay dibobot a tomol an mavekhas, 6 magla an maraw as do mahep am makolay dana as kadiman narana.

7 Do soli mo no gatos am mabo o tawo. Oyod kami a mamo no soli mo. 8 Pinangay mo do salapan mo o gatogatos namen as pinaytotwaw mo sa o tayohen namen a gatos.

9 Maypaynyed o viay namen a makayamot do soli mo. Tod abo akmay akaak. 10 Manda do pito a poho o viay namen. Maparin an kadwan o waho a poho an masaliwawa. Amna no awan saya am awan sa ya no pakasisian kano pandidiwan. Dekey a tiempo o viay as kabo namen dana.

11 Ara dana paro nakadpang dia o rahmet aya no soli mo? As ara paro makaintindi sia o pangananawan no soli mo? 12 Dawa sidongen mo yamen a makapanmo so maynyed a tiempo no viay namen tapian di kami a maparonoron a sominchad dimo.

13 Mayendes paro o soli mo niamen, O Dios? Ichasi mo yamen a pachirawatan mo, O Dios. 14 Ipavoya mo diamen so makalo o di aya mabdibdis a kasisien mo tapian masoyosoyot kami a mintras maviay kami. 15 Torohan mo pa yamen so kayayakan a akma so adpang no pinandidiwan namen do nakarahan sa awan. 16 Ipavoya mo diamen a pachirawatan mo o makakniknin sa a pinarin mo as kaparin mo pa sa so tayabo namen a makavoya so makakniknin a ipakapamarin mo.

17 O Dios a Apo namen am panalasalen mo diamen o bendision mo as kaparin mo diamen a makatodah so atavo a ichahoho namen do viay namen do atavo a parinyen namen!