1 Apo a Dios, imo o yanan no kapamahes. Ipavoya mo pa o ipakapamarin mo a mangastigo. 2 Imo o Hoyis no atavo a tawo as dawa sentensian mo na so machinaho a kastigo da o maato saya so iyangay a mararahet so parinyen. 3 Manngonngo pa so kayendes o kaparin da masaray kano manghomis. 4 Mayendes paro pa o kadaay da nia o pariparinyen da sa?

5 Ta atetekan da sa o manganohed dimo mo Apo as kapakasiasi da sira so tinoroh aya dimo a nasion mo. 6 Dimanen da sa o bioda, sira o nasbang kanira no estranghero do kavahayan namen aya, 7 as kavata da sia, “Ara nava yaten a mavoya no Dios as kan ara nava isanga no Dios no Israel o marahet saya a parinyen ta.”

8 Amna inio a makavata sia ya am kapiahen nio ya intindien as kasolib nio a makaintindi sia. 9 Ta no Dios a minamaog so tidoan ta am makadngey ava do vata nio? Anmana iya o minarin so mata ta am makavoya ava do vata nio? 10 Iya a manhosga so nasiones am mangastigo ava do vata nio? Iya a mapía dana a Maistro am arava do vata nio o kasolivan na? 11 Mapanmo no Dios o kabo no sinmo no pangtoktoan da no makavata sia o kasolib da.

12 Mapalak o tawo a paynananawhen mo, mo Apo as parinyen mo a makaintindi sia o panyokoyokoran mo sa, 13 ta pavawahen mo sia do pakasisian kano kagologoloan a manda do kapachispang da no makagatogatosen a di dana a makavolaw. 14 Takwan no Dios am pasiayen na sava o tawotawo na sa anmana tadichokoran na sava o tinoroh aya sia a nasion na. 15 Mirwa anti a maytetnek o hostisia as sira o mahoho no kanamonamoan o omonot dia.

16 Sango o omdefende diaken dira do mararahet sa so pariparinyen. 17 An abo o Dios a somnidong diaken am nakalo ako dawri a madiman. 18 Do nakatawag ko nia dimo o kagagtos ko mo Apo am niangay mo yaken a sidongen no rakoh a addaw mo niaken. 19 Do chinaharan no ichalijalijat ko sa am no kanakenakem ko dimo o tomnoroh diaken so soyot.

20 Piahen mo paro sa o makagatogatosen a mapagtin so panyokoyokoran a mapakasiasi sira so mapia? 21 Chitahen da as kano paypanmoan da o kararayaw da so mapipia sa tawotawo as kapadiman da nira o abo so gatos. 22 Amna no Dios o defensa ko as iya o akmay bato a mahni a pachipelan ko. 23 Iya o omvahes sira a makayamot do gatogatos da as kararayaw na sira a makayamot do mararahet a pariparinyen da.