1 Mangay ta a omdaday so Dios. Makakanta ta do soyot ta do Dios a iya so pachipelan kano kalibrian ta! 2 Mangay ta do salapan na a mamahemahes as makakanta no soyot ta a omdaday sia. 3 Takwan iya o makapamarin aya a Dios as Patol a mato kano atavo a anianiven. 4 Iya o maynolay do tana aya a aran do maarahem sa a logar kano makarang dana sa tokon. 5 Iya o maynolay do taaw aya a inamaog na as aran no tana aya am pinarin na.

6 Mangay ta komheb a omdaday sia. Domogod ta do salapan no Dios a minamaog diaten. 7 Iya o Dios ta as yaten o tawotawo na a pachonongan na as yaten o karnero na.

An madngey nio do sicharaw o tawag dinio no Dios, 8 am pangehneten nioava o aktokto nio akma so pinarin da no apoapo nio sa do Meribah as kan do desierto no Massah. 9 Ta dawri a logar am nihawahaway da yaken a aran navoya darana o pinarin ko sa dira. 10 Do apat a poho a ka kawan am rakoh o nakasoli ko nira dawa vinata ko, “Tinadichokoran da yaken as kadi da anohdan dia o panyokoyokoran ko sa.” 11 Do soli ko am vinata ko o, “Masigorado o kaentero da anti a di makasdep do paynehahan aya a niprepara ko dira.”