Mukaanda wa mioolo wa
Yowani
Kotili
Musonii a mukaanda wuunawu, ayaabina mu kuumbu ya «Mukuutu a libuundu». Pili a kuumbu yi, yili mu umweese ti nde li muutu wu bafwaana ukiinzi na utumumu kwaa libuundu. Nde li mu usonuu mukaanda wu, mu utsinduu nde kwaa «Mukasa wu Nziaambi asoolo, na kwaa baana ba nde», ni libuundu la Nziaambi (1).
Musonii a mukaanda wuunawu, li mu uhamisa balibuundu mu udiaata kutso ngwanya na kutso litoono (1-6). Nha mbisi a nhaa, nde li mu ubaaleele ka ti, bo bafwaana usa mayele mu ndaa nziisili ya pia, weti buli mu mukaanda watsiomi wa Yowani (7-11). Tswaamina atooso mabwee ma baana banguu ba mu libuundu likimi, nde li mu uyaabisa bo ti nde li mu uyiri (12-13).
Weti buli mu mukaanda watsiomi wa Yowani, nde li mu uloombo ti boosi babutaanga mukaanda wu, ba bamene miaanzi mu Nziaambi, na bahama mu udiaata mu imiini kia ngwanya.
1
Mabwee
1 Me Mukuutu a libuundu, ni sonuu mukaanda kwaa we maama, mukaasa wu Nziaambi asoolo, na kwaa baana ba nde, ba me natoono mu ngwanya. A ndila me pe na toono beni, ka na baata boosi ka babayaaba ngwanya. 2 Mundaa ti ngwanya yi li mu bisi, na yo sa yiba na bisi mu mantaanga moosi.
3 Nyaala bweese, ngebe na iyeenge bia Taata wu Nziaambi, na Yiisu Kristo, Mwaana a Taayi, biba na bisi, paa bisi didiaata mu ngwanya, na ditonosono bana mu bana!
Udiaata mu ngwanya na mu litoono
4 Me nali na kinya yalaa, bu namoni ti baana ba we baba mosi, bali mu udiaata kutso ngwanya, weti bu Taata waditumi mu udiaata. 5 Na mu taanga di, mono ma me niloombo kwaa we, maama wa litoono: Bisi diafwaana mu utonosono bana mu bana. A uli pe mukele wu munyatii, wu me nisonuu kwaa we. Nde li mukele wu diaholani umata mu mbaandili. 6 Litoono lili mu uloombo mu udiaata weti buli mikele mia Nziaambi. Na mukele a Nziaambi wu diaholi umata mu mbaandili, li mu uleele ti, beni diafwaana udiaata mu litoono!
7 Bangaa pia balaa bamaatsamuu mutso tsi. Bo bali mu ubisi usiingi ti Yiisu Kristo abutii mu musunyi. Ni buu bali mu uyaaba ngaa pia, Mutaata a Kristo. 8 Disa mayele mu beni bameme, paa ti beni dinyaala udiimbisi mbutu dia isala kia bisi. Ka paa beni diyaka musieende wakuu.
9 Pasi muutu wu uhele unambita kutso nziisili a Kristo, ka bweesi nziisili kimi nha yulu a ya Kristo, nde a ali itwaari na Nziaambi pe. Ka muutu wu unambita mu nziisili yi Kristo wadihi, nde li itwaari na Taayi na Mwaana. 10 So muutu yiri kwaa beni, na nde beyi beni nziisili kimi, a diyaka nde kwaa beni pe, na a diha nde so bwee pe. 11 Mundaa ti, pasi wu ubii nde, nde ka itwaari na muutu wuu mu biyiluu bia nde bi bibi.
Mabwee matsieelele
12 Me ndi na mandaa malaa ma uleele beni, ka me a ni sonuu mo pe mu mukaanda wu. Mundaa ti me ndi na tsimi ya uyiri kwaa beni, na mu utsuu kwaa beni mu imeme akulu. Paa kinya a bisi yiba ya kuu.
13 Baana ba mwaana nguu a we, wu Nziaambi asoolo, bo ka babii we.