Mukaanda wa mitata wa
Yowani
Kotili
Mukaanda wuunawu, «Mukuutu a libuundu» (1; 2Yo 1) asonuu nde ka, mu uha nde kwaa muutu mosi wuli kuumbu Ngayusi. Bisi a diayaaba ndaa so mosi mu muutu wuu pe, ka nde akangama mu usalila ngwanya. Ndiaatili a nde yili na lisoboso na ya Dioterefe, wuli muutu wu bali mu uyuu kutso libuundu. Nde ubaaleele mandaa ma pia mu «Mukuutu a libuundu», na nde a ubaayaka bambaayi pe.
Musonii a mukaanda wu, li mu ubili Ngayusi mu ndaa a ukangama kwa nde mu Nziaambi, na mu ndaa libaasila li nde ali mu uha kwaa bangaa imiini (1.1-8). Nha mbisi a nhaa, nde li mu unyoongo ka mu ndaa Dioterefe, wali na bifu biabibi (9-10). Tumake, nde li mu utsuu ka mu ndiaatili yimbwe ya Mukristo mukimi, wa kuumbu Demeteriyusi (11-12). Nha tsieelele, nde li uyaabisa nziriri a nde, na li mu utooso mabwee ma bambaayi (13-15).
Mukaanda wuunawu li mu umweese bisi na li mu uyiisi bisi, buni bisi difwaana uyaka basiali ba Nziaambi, bali mu uyene ayiisi Ndaa Yimbwe. Na buni diafwaana uyaka baana ba nguu ba bieenyi mu iteesi kili mu ulaa ka ti, muutu li na litoono na ahama mutso ngwanya.
1
Mabwee
1 Me Mukuutu a libuundu, ni sonuu mukaanda kwaa Ngayusi✡Biy 19.29; Lom 16.23; 1Ko 1.14 nduu a me wa mutimi, wu me natoono mu ngwanya yoosi.
2 Mbaayi a me, me natoono ti mandaa ma we moosi mabweeye, na we ba polo, weti bu muwuumu a we ali polo. 3 Me na moni kinyi yalaa, mutaanga di baana ba nguu bayiri kuni, na bati imbaangi ti we li mu udiaata weti bu Nziaambi atoono, na weti bu ngwanya yili mu uloombo. 4 Ndaa yili mu uha me kinya yalaa, mu uyuu ti baana ba me, bali mu udiaata mutso ngwanya.
Ndiaatili yimbwe ya Ngayusi
5 Nduu a me wa mutimi, we akaangama mu Nziaambi mu libaasila li we li mu uha kwaa baana ba nguu na kwaa bieenyi. 6 Bo bateeri we imbaangi mu litoono la we mu bo, nha kulu a libuundu la bisi. Mu ndukisini a midieengi mia bo, me ni loombo kwaa we, mu ubaasila bo mu biloo bioosi bi bo bali na nzala bio. Baasila bo weti bwafwaana nha misi mia Nziaambi. 7 Mundaa ti, bo bali mu udieenge mu uyiisi Ndaa Yimbwe ya Yiisu Kristo, kwahele a usiingi iloo so imosi kiamata kwaa bangooyi. 8 Mu ndaa yii, bisi diafwaana ubaasila baata bapili yi, paa ti diba babali mu usala itwaari na bo, na paa diyiisi bambaayi ndaa ya ngwanya.
Ndiaatili a Dioterefe na ya Demeteriyusi
9 Me nasonuu mukaanda wu mukusi kwaa libuundu la kwaa beni. Ka muutu mosi wa kuumbu Dioterefe, a ali mu usiingi pe mandaa ma me naleele, mundaa ti nde li na nzala ya uba mukuutu a beni. 10 Ni mu buu, nha me kaayiri, me sa tungululu mi nde ali mu uyiluu. Nde li mu utsala mvuungu yimbi mu bisi. Ka a ndila maa pe nde ali mu uyiluu. Nde li mu ubisi uyaka baana ba nguu ba bieenyi. Na kwaa babatoono uyaka bieenyi bii, nde li mu ulii bo, na li mu ubingi bo mu libuundu.
11 Nduu a me wa mutimi, a duku pe ifwaani kia baata babali mu uyiluu mandaa mamabi. Ka duku ifwaani kia babali mu uyiluu mandaa mamabwe. Mundaa ti, muutu wuli mu uyiluu mandaa mamabi, a ayaaba Nziaambi pe.
12 Baata bali mu uleele mamabwe mu Demeteriyusi, na ngwanya yo makulu yili mu uta imbaangi mu nde. Bisi ka dili mu uta imbaangi mu nde, na we ayaaba ti imbaangi kia bisi kia ngwanya ili.
Mabwee ma tsieelele
13 Me ndi na mandaa malaa ma uleele kwaa beni, ka me a ni sonuu mo mu mukaanda wu pe. 14 Me ndi na ilimbisi, ti mu mwaana a taanga hoolo, bisi a we sa dimonono, na sa ditsuu kiinzi na kiinzi. 15 Nyaala iyeenge yiba na we! Banduu ba we, baheeri we mabwe. We ka ha mabwe kwaa banduu ba bisi, muutu-muutu mu kuumbu a nde.
✡1:1 Biy 19.29; Lom 16.23; 1Ko 1.14