2
Liyobolo lavulu bunene
1 Ni mu buu, bisi diafwaana uba babavulu ukangama mu nzisili yi bisi diayuu, paa dinyaala udiimbili. 2 Mandaa mayaabisi batumu ba Nziaambi mu taanga dialabii, mayilimi. Na baata boosi babameengili mo, so a buu pe, babahele utumumu mo, babayi tsieembili yafwaana kwaa bo. 3 Ni mu buu, buni bisi dituu uvuu bisi bameme so bisi dimeengili liyobolo la pili yii? Pfumu nde makulu akwiyaabisi lo tsiomi, tumake babayuyi Pfumu bamweesi bisi ngwanya a lo. 4 Na Nziaambi ahamisi imbaangi kia bo mu biliimbi bia ukimuu, mandaa ma lituu na bimaanga, na mu bungori ba Muheebili wa ngira ba nde akabi weti buli litoono la nde.
Wuli mu ubiti baata ba tsi ku liyobolo
5 Ka a kwaa batumu ba Nziaambi pe, Nziaambi aha tsi yikaayiri yi bisi dili mu utsuu mu yo. 6 Mu ngwanya, uli na muutu wuli mu uta imbaangi ki mu Mabasonuu:
«Oo Nziaambi, muutu na ali, paa we libili moonyi mu nde?
Mwaana a muutu na ali paa we yiluu mandaa mamabwe mu nde?
7 We akulili muutu hoolo ku tsini a batumu ba Nziaambi,
we alwaatisi nde mbilili na buzitu,
8 we asuusi bioosi nha tsini a miili mia nde✡Mkg 8.5-7.»
Mbiiti Nziaambi asuusu bioosi ku tsini a litumu la nde, mbiindili ti nde a anyaala iloo so imosi pe ki ihele uba ku tsini a litumu la nde. Ka mu taanga di, bisi kaala a diamono pe ti bioosi bili ku tsini a litumu la nde. 9 Ka bisi dili mu umono ti: Yiisu wubakulili hoolo ku tsini a batumu ba Nziaambi, bisi dili mu umono nde balwaatisa buzitu na mbilili mu ndaa pasi di nde amoni mu likwa. Mu yii, mu bweese ba Nziaambi, nde amoni likwa mu ndaa mbweyili a baata boosi. 10 Mu ngwanya, Nziaambi, muyilii a bioosi na wasa ti bioosi biba, ali atoono ti babalayi mu baana ba nde baba itwaari mu buzitu ba nde. Ni mu buu, ali bwafwaana ti Nziaambi asalila mapasi mu uyiluu unaangila Yiisu. Mundaa ti, Yiisu li mbaandili a liyobolo la bo, na ni nde li mu ubiti bo ku lo.
11 Ka Yiisu wuli mu ubiaalisa na bababiaalisa, bo boosi Taayi mosi. Ni mu buu, Yiisu a ali na tsionyi pe mu uta bo baana ba nguu ba nde. 12 Ngwanya nde aleeli:
«Oo Nziaambi, me sa tsuu mu we kwaa baana ba nguu ba me,
nha kulu a baata, me sa mweese buzitu ba we✡Mkg 22.23.»
13 Nde aleeli ka:
«Me sa suusu ilimbisi kia me mu Nziaambi.»
Tumake abwileele:
«Me ndiowu, itwaari na baana ba Nziaambi aha me✡Yes 8.17-18.»
14 Mundaa ti baana ba boosi bali biyiluu bili na musunyi na makili, Yiisu nde makulu akitii weti bo, nde alwaati imuutu imosi na bo. Ni mu buu, mu likwa la nde, nde akosili Saatina, wakaanga litu la likwa. 15 Nde akuuli babali batee ba boomo ba likwa mu idiingi kia bo kioosi. 16 Mu ngwanya, a kwaa batumu ba Nziaambi pe nde abeyi libaasila, ka kwaa bateeri ba Abraami✡Yes 41.8-9. 17 Ni mubuu nde ali afwaana mu ufwaanina baana ba nguu ba nde mu bioosi, paa nde aba nguu a ngaanga a bo wa Nziaambi, waluulu mu kolokolo na wanambita mu isala kia Nziaambi, mu ndaa ukuungulu masumu ma baata boosi. 18 Mu taanga di, nde ka utuu ubaasila baata babali kutso mapuusu, mundaa ti nde makulu ayoyi mu mapuusu na mu mapasi.