Mukaanda kwaa
Baebeleo
Kotili
Mukaanda a Baebeleo ali na kuumbu a wa sonuu nde pe. Nde ali mu uyaabisa pe kwa na ba sonuu nde. Musonii li wa ifuumbu kia basi Helene, ka nde ayaaba bubwe bubwe mikaanda mia Lilasina la Likulu. Nde li mu usonuu kwa ba ngaa Kristo babali Bayuudayo. Ba ngaa Kristo baa, ba maniongo. Bo ba maa dee, na ba maa diimbisi ibaala kia bo na ilimbisi kia bo kia tsiomi. Baba mosi bali na nzala ya ubwoongolo imiini kia bo. Musonii a mukaanda atoono ubweese nzisili yi bo baholi na uhamisa bo.
Baata bali itwaari na Nziaambi mu Kristo, wu Nziaambi atsinduu (1.1—2.18). Mu ngwanya Kristo li mwaana a Nziaambi, nde li buli Nziaambi (1.3). Nde akitii ka muutu. Bu akwiiri weti muutu, nde amaasi nde litu la muheebili wu mubi (2.14).
Mu ndaa Kristo, ba ngaa utuu uswese kwa Nziaambi mu ilimbisi (3.1—5.10). Mu ngwanya Yiisu Kristo atoori tee kwa Nziaambi, na Nziaambi abiaalisi nde mukuutu a Nguu a ngaanga a Nziaambi. Mu Lilasina Lilikulu, mukuutu a nguu a ngaanga a Nziaambi ni nde utuu uswese bebele na Nziaambi, bwali mu ukoto nha mbuu wavulu bu ngiri. Nde li mu utsuu mu ndaa nyalili a masumu.
Mu taanga di, Yiisu Kristo ndili a nde li mukuutu a nguu a ngaanga a Nziaambi. Mukaanda kwa basi Hebeleo ndili nde li mu uyaabisa ndaa yi mu Lilasina Lilinyatii.
Musonii a mukaanda li mu ubiindili bwafwaana buni Yiisu ali mukuutu a nguu a ngaanga a ba ngaa Kristo (5.11—10.31). Nde li na lisoboso na ba nguu babangaanga ba Bayuudayo.
Mu lilasina lilikulu huli na ndaa yili mu ubiindili yo. Mu mukaanda wa mbaandili 14.17-20 huli mu utsuu mu mbwaanini a Abraami na muutu wa mweenyi wu bu baa ta Melkisedeki.Weti Melkisedeki, Yiisu li nguu a ngaanga wa hele umata mu ifuumbu kia ba nguu babangaanga. Nde ali nguu a ngaanga weti buli mikele na tumimi a baata pe. Ba nguu ba bangaanga bali balaa na bo bali mu ukwa. Yiisu Kristo li nguu a ngaanga mu taanga dioosi na nde li moonyi mu taanga dioosi. Nde akoti ku yula kuli mu udiaala Nziaambi. Ni kuu nde ali mu ubiti bisi.
Mu lilasina la tsiomi, ba nguu babangaanga bali atsuu ma taanga moosi baana bungori mu ubaa kolokolo a Nziaambi. Bo bali a dusu banyama mu ndaa uyiluu buu. Ka, Kristo a heeri moonyi bala mosi mu taanga dihele uwa. Bangaa Kristo bali mu udiaata mu taanga di mu kuulu yi nyatii. Bo ubwa pe uvutuu bisi. Imiini kia babakulu yili ifwaani kia babasa imiini. Ifwaani kii yili mu uhamisa bo mu ubiingi mu mbingisi na mu mapuusu ma lolo (11.1—12.13). Umata mu 12.14, manini a mukaanda li mu ubiindili kwa balibuundu buni bo butuu uba itwaari na Nziaambi, na ba mbayi, na utuungu libuundu la ngwanya.
1
Nziaambi li mu usalila Mwaana a nde mu utsuu kwaa baata
1 Mu taanga dikulu, Nziaambi asialili mibili mu utsuu kwaa bakaa ba bisi, taanga dialaa, na mu mupili na mupili, 2 ka mu taanga diatsieelele di, nde li mu usalila Mwaana a nde mu utsuu kwaa bisi. Ni mu nde Nziaambi ayilii bioosi bili✡Yow 1.3, na ni Nziaambi abiaalisi nde mu uba mutoli a mukobo a biloo bioosi. 3 Mwaana li mu umweese bubwe ba buzitu ba Nziaambi, nde li ifwaani kili mu umweese buli Nziaambi, nde li mu usuku biloo bioosi mu ndaa a nde ya litu. Bu amani utsieemese baata mu masumu ma bo, nde adiaala mu mayula nha koo kia ba baala kia Nziaambi✡Mkg 110.1, Puungu-lituu. 4 Mu yii, Mwaana ka ayiluu uvulu unaanguu na batumu ba Nziaambi, na Nziaambi ahi nde kuumbu yavulu ndutu na makuumbu ma bo.
Mwaana a Nziaambi avulu unaanguu na batumu ba Nziaambi
5 Mu ngwanya, Nziaambi a aleeli kwaa tumu a nde so mosi pe:
«Ni we li mwaana a me,
umata mu taanga di, me ka Taayi a we.»
Na nde a atsuyi pe mu tumu ti:
«Me sa ba Taayi kwaa nde,
na nde sa aba Mwaana kwaa me✡Mkg 2.7; 2Sa 7.14.»
6 Ka mu taanga di Nziaambi atsindii Mwaana a nde wa tsiomi mu tsi, nde aleeli: «Batumu ba Nziaambi boosi bafwaana ubwa mambundu-mbwa nha kulu a nde✡Ndi 32.43; Mkg 96.7!» 7 Mu yatala batumu ba Nziaambi, nde aleeli:
«Nziaambi asi ti batumu ba nde baba weti mipepe,
na bo baba weti milee mia mbaa✡Mkg 104.4, bo basiali ba nde.»
8 Ka mu yatala Mwaana, nde aleeli:
«Oo Nziaambi, mbata a Ipfumu kia we, yili mu taanga dioosi.
Ni mu libweeye la we, we li mu utumu ipfumu kia we. 9 We atoono libweeye na we abele mandaa mamabi.
Oo Nziaambi, ni mu buu, Nziaambi a we asiooli we mu isala kia nde,
bu ayitili nha yulu mutswe a we maari ma kinyi,
na asiooli we nha yulu a bambaayi ba we ba bebele✡Mkg 45.7-8.»
10 Nde abwileele ka:
«Mu mbaandili, ni we Pfumu ayilii toto,
mayulu mali biyiluu bia mioo mia we.
11 Bii bioosi sa bilabuu, ka we li mu bilimi na bilimi.
Tsi na yulu sa bikaluu weti bikutu bibikulu.
12 We sa futuu bio weti iyungu,
na sa basobo bio weti bubali mu usobo bikutu.
Ka we buli ni buli, na idiingi kia we a yili na tsukili pe✡Mkg 102.26-28!»
13 Nziaambi a aleeli kwaa tumu a nde so mosi pe:
«Diaala nha koo kia me kia babaala,
natee bu me kaasuusu mitaata mia we
ku tsini a mili mia we✡Mkg 110.1.»
14 Batumu ba Nziaambi bali ndila miheebili mili mu usalila Nziaambi: nde li mu utsinduu bo mu ubiti libaasila kwaa baa bakaatolo mukobo wa liyobolo.