Mukaanda a Pawuli kwaa
Filemoni
Kotili
Filemoni mbaayi a Pawuli wuli tumu a Yiisu Kristo. Pawuli ayaabisi Ndaa Yimbwe kwaa nde, na nde akitii ngaa Kristo. Utuu uba ti nde isini ali. Nde na batee ali na bo. Onesime, mutee a Filemoni, abati na asiisi nzo a pfumu a nde. Onezimi abwaanini na Pawuli ku perese, na ni kuu nde asiingi uba ngaa Kristo. Pawuli wamutsindii na mukaanda, kwaa pfumu a nde Filemoni. Buni Filemoni akaayaka Onezimi?
Mukaanda a Pawuli kwaa Filemoni li mu utsuu ka kwaa libuundu lili mu ukuundu ku nzo a nde (1.2). Mukaanda wu li mu utsuu mu ndaa yatala libuundu loosi.
Mu taanga dii, busini ba ipfumu kia Looma ali mu uyaluu batee. Utuu uba ti, ndaamba baata babakidiaala mu ipfumu kia Looma ali batee. Bo bakisa bisala bioosi, na mifuri mia bo mioosi ali ni mu bapfumu ba bo. Mbiiti mutee maabata, tsieembili a nde ali ya ngo pasi, nhani utuu udusu nde.
Mu mukaanda wu, Pawuli li mu uloombo kwaa Filemoni mu uyaka Onezimi, weti mwaana a nguu wa litoono. Mundaa ti, Baata boosi, yaba wuli bunyanga so a buu pe, wuli mutee, bo boosi baana ba nguu mu Kristo. Ka Pawuli a ali mu ubamuu pe Filemoni mu uyiluu bu nde ali mu uloombo. Nde atoono ti Filemoni aholo kesili a nde mu inde makulu.
Bangaa Kristo batsiomi ali utuu pe usobo, nhaa-na-tsi, mandaa ma bo bakimono ti mamabi. Ka imiini mu Yiisu Kristo ili mu ukitisi ndiaatili na mandaa ma idiingi. Ndaa Yimbwe ya litoono, yili mu ukitisi idiingi kia muutu-muutu na kia baata boosi.
1
Mabwee
1 Ni me Pawuli wubalooso mu perese, mu ndaa bu ndi mu usalila Yiisu Kristo, na mwaana nguu a bisi Timoteo, disonuu kwaa we Filemoni, nduu na mbaayi a bisi wa litoono wa isala mu Kristo. 2 Disionii mukaanda wu ka kwaa keri a bisi Apia, kwaa mbaayi a bisi wa mudiingi Asipe, na kwaa libuundu lili mu ukuundu ku nzo a we: 3 Nyaala Nziaambi Taayi a bisi na Pfumu Yiisu Kristo, baha beni bweese na iyeenge!
Litoono na imiini bia Filemoni
4 Pasi taanga di me nibaakuundu, me nibaatsimanga mu we Filemoni, na me nibaavutulanga matoondo kwaa Nziaambi a me. 5 Mundaa ti, me ndi mu uyuu mamvuungu ma litoono la we mu baata boosi basa imiini mu Nziaambi, na imiini kia we mu Pfumu Yiisu. 6 Me ndi mu uloombo kwaa Nziaambi, paa ti imiini ki dili itwaari mu kio, ibutu mbutu mu we. Paa ti kio iyiluu umweese mandaa moosi mamabwe, ma bisi dili na mo mu idiingi kia bisi mu Kristo. 7 Mwaana a nguu a me, litoono la we limaaha me kinyi yalaa na limaahamisa me. Mundaa ti, we maasiimbili mitimi mia bangaa imiini.
Ndoombili a Pawuli mu ndaa Onezimi
8 Ni mu buu, so bu uli ti mu itwaari mu Kristo, me ndi na bunyanga mu utumu we mandaa matsieeme ma we afwaana usa. 9 Ka me tooni uloombo kwaa we mu kuumbu a litoono. Me Pawuli, bu yili ti me baala la inunu, na kori mu perese mu taanga di, mu ndaa Yiisu Kristo, 10 me niloombo libaasila kwaa we mu ndaa Onezimi. Me maabaa nde weti mwaana a me, mu Yiisu Kristo nha na nha, mutso perese. 11 Tsiomi nde ali tsala pe kwaa we, ka mu taanga di, nde ka na tsala kwaa we na me.
12 Me nivutulu we nde, nde wu me nayiluu utoono. 13 Me aba natoono ti nde aba na me nha, mu taanga di me ndi mu perese mu toono a Ndaa Yimbwe, paa nde abaasila me nha mbuu a we. 14 Ka me a natoono pe uyiluu ndaa so mosi, kwahele a ukwafuulu we. Mundaa ti, me a natoono pe ubamuu we mu usiingi yo, ka me natoono ti, we yiluu yo mu mutimi wu mubwe.
15 Helape Onezimi akabii na we, mu mwaana taanga hoolo, paa ti nde ayiri avutuu kwaa we kwa ikulu. 16 Mundaa ti, mu taanga di, nde a abwasaala pe mutee wa buu a buu, ka nde mabwavulu mutee. Nde li mwaana nguu a bisi wa litoono. Me natoono nde kwalaa, ka we ka afwaana utoono nde kwavululu, mu imuutu kia nde, mundaa ti, nde a ndila musiali a we pe ali, ka nde ka mwaana nguu a we mu Pfumu.
17 Ka so we li mu uholo me weti mbaayi a we wa isala, yaka nde weti me makulu. 18 Mbiiti nde ayiluu we ndaa yimbi, so a buu pe, nde li na yaama la we, me sa bele we lo. 19 Me makulu ndi mu usonuu mandaa ma: Me Pawuli, me sa bele yaama la we. Ngwanya, me a ndi na nzala pe ya ulibili we moonyi ti, we li na yaama la me. Yaama me ni idiingi kia we makulu. 20 Ee, mwaana nguu a me, kolokolo a we, baasila me mu litoono la Pfumu. Hamisa mutimi a me, mundaa ti bisa-beni dili itwaari mu Kristo.
21 Mu taanga di me ndi mu usonuu mukaanda kwaa we, me ndi na ilimbisi ti, we sa yiluu mi me ndi mu uloombo we. Me nayaaba ka, ti we sa yiluu miavulu mii. 22 Me ni bwaloombo kwaa we, mu uyiluu me itsuru kia nzo. Mundaa ti, me ndi na ilimbisi ti, Nziaambi sa aha mamvutu mu makuundu ma beni, na nde sa abee me kwaa beni.
Mabwee matsieelele
23 Epafara, li na me mu perese mundaa Yiisu Kristo. Nde maatsinduu we mabwee. 24 Bumosi ka Malako, Arisitariki, Demasi na Luka: bambaayi ba me ba isala mu Kristo, batsindii beni mabwee. 25 Nyaala bweese ba Pfumu Yiisu Kristo na Muheebili biba na beni!