1 Mu iluumbu kia tsiomi kia limiingi mu ngwaali a ngwaali, Bakaasa bayeni ku ngili, babiti mananaasa ma bo bayilii. 2 Bo bayibaasa manya lali lafuu munywa a ngila banyiingili nha peembi; 3 Bo bakoti, ka a basolili nyutu a Pfumu Yiisu pe. 4 Bu bali afulusunu, babaala boolo balwaata matsaanda mangeyini bamonii kwaa bo. 5 Bu Bakaasa bamoni boomo, babaandisi biinzi bia bo mu tsi, ka babaala baa baleeli kwaa bo: «Mu ima dili mu usaa wu li moonyi mu babakwa? 6 Nde a ali nha pe, ka siimbiangi wa nde. Dilibili moonyi mu mi nde aleeli beni mu taanga di nde abeeri keni ku Ngalili: 7 “Bwafaana ti bayeelele Mwaana a muutu nha mioo mia bangaa masumu, paa bakomo nde nha kuruwa, na asiimbuu mu iluumbu kia bitata.”» 8 Bakaasa balibili moonyi mu mandaa ma nde. 9 Bo bamati ku ngila na bayeni mu uyayaabisa maa moosi kwaa batumu kuumi na mosi na kwaa miyii mini mioosi. 10 Ali Mari, musi Mangadala, na Zaana, na Mari, nguu a Yaki, na Bakaasa bakimi ba bali na bo baleeli mandaa maa kwaa batumu. 11 Ka bo batsimi ti mandaa ma babaleeli kwaa bo mahele a tsala, na a babasi imiini pe. 12 Ka Peetero atemini, ayeni mawasa ku ngila. Bu abaandini amoni ndila matsaanda ma liino. Akimii ndaa mu moosi mayilimi na avutii ku nzo a nde.

13 Mono, iluumbu kii, mioolo mu miyii miayeni ku bula ba kuumbu Emawusi, batakuu na Yeruselemi, mu iteesi kia bakilometre kuumi na mosi. 14 Babayi imoo nha kati a bo mu maa moosi malabii. 15 Bu bakitsuu na ufulusunu, nde makulu Yiisu asweesi, na avuuti na bo. 16 Bamumoni, ka a batuyi uyaaba nde pe. 17 Yiisu aleeli kwaa bo: «Mu ki mandaa beni dili mu yolo, bu dili mu uyene?» Batsikini na mabusu ma bo mali na ngebe. 18 Mosi mu bo, kuumbu a nde Kleopa, avutili, aleeli kwaa nde: «Ka ndila we mu Yeruselemi, wahele uyaaba mabwi nha mu biluumbu bi?» 19 Aleeli kwaa bo: «Ki ma ndaa?» Baleeli kwaa nde: «Ma mu Yiisu, ni musi Nazareti, wabeeri mibili wa lituu mu biyiluu na mu mandaa nha kulu a Nziaambi na baata boosi. 20 Banguu ba bangaanga ba Nziaambi na bakuutu ba bisi bayeelili nde mu uha nde tsieembili ya likwa, na bamukomi nha kuruwa. 21 Bisi diasi ilimbisi ti nde wa keni kuulu Iseraeli, ka lolo ni iluumbu kia bitata, umatuu bu bayiluu mandaa maa mayilimi. 22 Diali na dungunguu mu ndaa ti Bakaasa ba bamosi nha kati a bisi bayeni ngwaali a ngwaali yi ku ngila. 23 Ka bu bahele usololo nyutu a nde, bo bayileele ti batumu ba Nziaambi bamonii kwaa bo, na baleeli bo ti Yiisu li moonyi. 24 Ba bamosi mu ba bali na bisi bayeni ku ngila, bamoni bioosi mbii bwaleeli Bakaasa, ka nde a bamumoni pe.» 25 Yiisu aleeli kwaa bo: «Beni a dili na mayele pe. Mitimi mia beni mia leme mu usa imiini mu moosi maleeli mibili! 26 Ali abwafwaana pe ti Kristo amono pasi dia buu, tswaamina nde ukoto mu buzitu ba nde?» 27 Tumake, nde wababiindili moosi ma basonuu mu mandaa ma Nziaambi mu ndaa nde. Nde wababiindili mo ubaanduu mu mikaanda mia Mooso natee mu mikaanda mioosi mia mibili. 28 Bu batoori nha peembi a bula ba bakiyene, nde asi weti wu ulabuu. 29 Bo bamupeli, baleeli: «Ba na bisi, ka tsitsii yimaato, busu baka mu uyili.» Nde akoti mu udiaala na bo. 30 Bu adiaali na bo nha meese, nde a holi lipa, avutili matoondo kwaa Nziaambi, abukili na wabahi lo. 31 Ni mu buu, miisi mia bo mia dibini, bamuyaabi; ka nde adiimbili nha kulu a bo. 32 Baleelisini: «Mitimi mia bisi mialuuli mu kinyi mu kuulu, bu nde abeeri abiindili bisi, ma basonuu.» 33 Mu diina taanga dii, bo batemini, bavutii ku Yeruselemi, babaasi kuumi na mosi bakukunu na babali na bo. 34 Boosi baleeli kwaa miyii mioolo mii: «Mu ngwanya Pfumu siimbiangi na moniaangi kwaa Simooni.» 35 Miyii mioolo mialeeli kwaa bo mioosi mialabii mu kula na buni bo bamuyaabi bu nde akibukulu lipa.

36 Bu bali bakeni mu utsu, Yiisu nde makulu amonii nha kati a bo, aleeli: «Iyeenge kwaa beni!» 37 Bo babayi boomo balaa, batehiti na batsimi ti bo bamoni iduuru. 38 Ka Yiisu aleeli kwaa bo: «Mu ima matsimi ma beni mali mutele-mutele na dili na maketi-keti mu mitimi mia beni? 39 Dimono mioo na miili mia me, ni me wa me. Dibeembe me, dikengese me, ka Iduuru a ili na musunyi na miyisi weti bu me ndi pe.» 40 Bu akileele buu, wabamwesi mioo na miili mia nde. 41 Ka bu bali keni kutso kinyi na ukimuu, a batuyi usa imiini pe natee bu Yiisu aleeli kwaa bo: «A dili na iloo kia udia nha pe?» 42 Bamu hii itsuru kia tswi ki bakaanga. 43 A holi kio, na adi nha kulu a bo. 44 Tumake nde aleeli kwaa bo: «Ma ni mandaa ma me naleeli beni bu nali na beni, ti moosi ma basonuu mu me mu mikele mia Mooso, mu mibili, na mu mikuunga, mafwaana mu uyilimi.» 45 Ni mu buu nde adibili mayele ma bo paa bayaaba tsutulu a ma basonuu. 46 Na aleeli kwaa bo: «Mono, bu ni bwasonomo: Kristo afwaana umono pasi na usiimbuu mu babakwa mu iluumbu kia bitata, 47 mu kuumbu a nde sa bayiisi kiingili a mayele na uleele nyaalili a masumu kwaa bifuumbu bioosi, ubaanduu mu Yeruselemi. 48 Beni ni bambaangi ba mandaa ma. 49 Mono, me ni tsinduu beni mi Taayi a me a lasini beni. Ka beni didiaala mu ngaanda natee bu beni dika lwaata lituu la yula.»

50 Nha mbisi a nhaa, Yiisu abiti miyii mia nde natee ku peembi a Betania, anaangili mioo mia nde ku yula, na wabasiemi. 51 Bu nde akisieme bo, nde akinaanguu, na ahaati ku yula. 52 Miyii bu miamani ubili Yiisu, bo bavutii ku Yeruselemi mu kinyi yalaa. 53 Bo bali mu nzo a Nziaambi taanga dioosi na bakikiinzanga Nziaambi.