61
Apha, Chipfu e-me eze-iphe-ọma
1 Unme Nnajịuphu,
bụ Chipfu dụ mu l'ẹhu;
kẹle ọ họtaru mu gẹ mu
je ezia ndu wozeru
onwophẹ alị ozi-ọma.
Ndu meji tọfuru bẹ o
ziru mu gẹ mu je emee
gẹ meji nmapfuru
phẹ;
gẹ mu je ezia ndu a
kpụtaru lẹ ndzụ l'ẹphe
e-nweru onwophẹ.
Mu epfukwarụpho ndu nọ
l'ọka-mkpọro l'aa-ha
phẹ.
2 Tẹme gẹ mu bya arakaa
l'apha, Chipfu e-meru
ndu nkiya eze-iphe-ọma
rwuwaru;
yẹle eswe mbọku,
Chileke anyi a-gbaru
ndibe iya ọdzori.
Mu adụa ndu agụ aphụ
obu g'ẹphe ha.
3 Tẹme mu eyekwarụpho ndu
Zayọnu ẹka;
mbụ ndu ọphu aphụ
tsọru.
Mu eworu ẹguru okpu-eze
kpube phẹ l'ishi l'ọzori
ntụ,
ẹphe shi kpube onwophẹ;
wụa phẹ manụ ẹhu-ụtso;
l'ọzori agụ aphụ;
yee phẹ uwe,
bụ aja Chileke ajaja;
l'ọzori anọdu yọkoo.
Iphe, aa-nọdu eku phẹ
abụru “Achị k'apfụbekoto”;
Oshi, Chipfu kụru l'onwiya
g'e gude hụma g'ọ
dụ-be akpabiri.
4 Ẹphe a-kpụkwa akahụ igbulọ
ono,
dakashịhuru e -shi teke
ndiche ono;
bya atụko akahụ ẹka ono,
bụhawaa ochobu ono
doziphuchaa azụ.
Mkpụkpu ono,
dakpọshihuchaaru
adakpọshihu nọdu nno
shi l'ọgbo sweru ọgbo
ono bẹ ẹphe a-tụko
kpụzi-kọtachaa.
5 Ọ bụru ndu shi eshishi
a-nọdu echeru unu eghu
mẹ atụru unu.
Ndu ọhozo abụru ndu
a-nọdu ejeru unu ozi ẹgu;
yẹle ozi opfu-vayịnu
unu.
6 Iphe, aa-nọdu eku unu abụru
“ndu-uke kẹ Chipfu”.
Iphe, aa-gụbe unu a-bụru
“ndu ejeru Chileke
anyi ozi”.
Ọ bụru ẹku ụnwu-eliphe bẹ
unu a-nọdu eri.
Mbụ ọ bụru iphe-enweru phẹ
bẹ unu e-gude eku
onwunu.
7 L'ọzori iphe-iphere,
e gege anọdu eme ndibe
mu bụ-chia iphe,
e-me nụ bụ lẹ ndibe mu
a-nata okiphe
nnakwasẹ l'ẹka phẹ.
Tẹme l'ọzori ekpu iphu lẹ
ntụ bẹ ẹphe a-nọdu
etechia ẹswa l'okiphe,
ẹphe ketarụ.
Ẹhu-ụtso ojejoje abụru nkephẹ.
8 “Kẹle mbẹdua, bụ Chipfu bụ
iphe,
adụje mu ree bụ ikpe,
pfụru nhamụnha.
Ọphu dụkwanu mu ashị bụru
ana nfụ yẹle eme
ẹjo-ememe.
Ọzo bụ lẹ mu e-me
ire-lanụ bua ndibe
mu obunggo.
Tẹme mu l'ẹphe agbaa ndzụ
ojejoje.
9 Oshilọkpa phẹ abụru
ndu a maru amaru
l'ọhamoha.
Nokwaphọ gẹ ndiphe a-maru
awa phẹ.
Iphe, bụkpoo onye hụmaru
phẹ nụ a-majeẹrupho
l'ẹphe bụ ndu Chipfu
keberu l'ọma.”
10 Mu a-nọdu Chipfu l'ẹka
tee ẹswa.
Mbụ l'obu mu bẹ ẹhu atsọ
l'ime Chileke mu;
kẹle o yewaru mu ndzọta
g'uwe;
bya egude apfụbekoto
kwaa mu yẹgele g'onye
yeru uwe mkpẹlanu.
O meru mu; mu dụ gẹ nwoke,
abya alụ nwanyị
k'ọ̀phúú;
mu kpuchia iphe l'ishi
g'onye uke Chileke;
mbụ mee mu;
mu nọdu ama gẹ nwanyị,
akwakọ ala ji;
mbụ nwanyị,
gude iphe-nchị yẹle
iphe-olu kwaa onwiya
akwa.
11 Kẹle ọo g'alị emeje g'iphe
fushia-a;
tẹme mgbabu nọdu emeje
g'iphe,
a kụru iya mehu-a;
nokwaphọ gẹ Nnajịuphu,
bụ Chipfu e-me
g'apfụbekoto yẹle
ajaja kpọ-futa l'iphu
ọhamoha.