62
Ẹpha ọ̀phúú ndu Zayọnu
1 Ọ kwa l'iswi ẹhu Zayọnu
bẹ mu e-gude;
mu taa nọdudu doo.
Mbụ lẹ mu e-gude l'iswi ẹhu
Jierúsalẹmu;
mu tee dobedu ọnu doo;
gbiriri jasụ teke
apfụbekoto iya achafụta
g'a hụma iya g'ẹka
nchi bọhuru;
ndzọta iya enwua kẹ phoo
g'orọku, eke jajaja.
2 Ọhamoha a-hụma apfụbekoto
nkengu.
Ndu eze l'ophu ahụma
ogbu-nwịinwii nkengu.
L'a gụa ngu ẹpha ọ̀phúú,
bụ Chipfu e-gude ọnu iya
gụa ngu iya l'onwiya.
3 Gụbedua a-dụ g'okpu-eze,
dụ ùbvù l'ẹnya,
nọ l'ẹka Chipfu.
Mbụ l'ịi-nọdu l'ẹka Chileke
ngu dụ iya g'okpu-eze,
onye eze kpu l'ishi.
4 Ẹphe te ekubaẹdu ngu
“onye a gbagharu agbagharụ”.
Ọphu e kuẹdu alị ngu “ochobu”.
Iphe, aa-gụ ngu bụ
“ọtsomahu Chileke”.
L'a gụa alị ngu “nwanyị,
a lụru k'ọ̀phúú”;
kẹle Chipfu e-gude ngu
ete ẹswa.
Tẹme alị ngu adụ gẹ nwanyị,
a lụru k'ọ̀phúú.
5 Mbụ l'ọo ẹgube ono,
nwokorọbya alụje
nwamgbọko ono
bụ g'ụnwu ngu a-lụru gụbe
Zayọnu.
Ọ bụru g'onye eme ekele nwanyị
egudeje nyee ya ete ẹswa-a;
nokwaphọ gẹ Chileke ngu
e-gude ngu ete ẹswa.
6 Mu woakwaru ndu nche
dobechaa l'eli igbulọ,
a kpụ-pheru gụbe
Jierúsalẹmu.
Ọphu ẹphe abyakwa e-dobe
ọnu doo eswe l'ẹnyashi.
Mbụ-a; unubẹ ndu eku
ẹpha Chipfu;
unu ba tụtakwa unme!
7 Ọphu unu ahakwa iya g'ọ
tụta unme jasụ teke
oo-me Jierúsalẹmu g'ọ
ngụru angụru;
mee ya g'ọ bụru iphe,
eliphe l'ophu e-gude
aja Chileke ajaja.
8 Chipfu gudeakwa ẹkutara
iya;
yẹle ogwe-ẹka iya l'ophu
ria angụ sụ:
“Ọ tọ dụkwa teke mu byaru
ewobaaru iphe,
ị kọberu l'alị nụ ndu
ọhogu ngu g'ọ bụru
nri phẹ.
Ọphu ndu ọhozo abyadụ
angụbaa mẹe ọ̀phúú ono,
bụ ngu seru akanya
iya ono.
9 Ọ chia ndu kpatarụ iya nụ e-ri
iya jaa Chipfu ajaja iya.
Tẹme ndu awọ akpụru
vayịnu angụa mẹe ya
l'ọma-unuphu ibe mu ono,
dụ nsọ onoya.”
10 Unu ghajaa ya;
unu ghajaa ọnu-abata
mkpụkpu ono!
Unu dozia ụzo, ndu ono
a-nọdu eshi!
Unu tụa mkpoli;
unu tụa mkpoli l'eze
oji ono!
Unu wofuchaa ya mkpuma
mkpuma, dụ iya nụ!
L'e wolia ẹkwa-ọhubama ono
pfụberu ọhamoha
g'ẹphe hụma!
11 Lenu; Chipfu raakwaru iya;
o jedzuru mgboko jasụ
l'ẹka igwe beru alị
beru sụ:
“Unu sụ ndu Zayọnu g'ẹphe
hụmakwa l'onye ndzọta
phẹ abyakwa!
O gudekwa obunggo iya;
bya egude iphe,
oo-gude pfụa ụgwo.”
12 “Iphe, ee-ku ndu ono bụ
‘Ndu-nsọ kẹ Chileke’;
ọzoo ‘Ndu Chipfu gbatarụ’.
L'e kua gụbe Zayọnu
‘Nwanchọta’;
ọzoo ‘mkpụkpu,
a ta gbadoẹduru agbado’.”