Ẹkwo
Jiowẹlu
Onye Mpfuchiru Chileke
1
1 Ọwaa bụ ozi, Chipfu ziru Jiowẹlu, bụ nwa Petuwẹlu.
Igube, byaru mkpu-danyi-ọku
2 Unu nụmakwa iphe-a;
unubẹ ndu bụ ọgerenya!
Unu ngabẹkwa nchị; iphe,
bụkpoo ndu bu l'alị-a
l'ophu!
Iphe, dụ ẹgube-a;
?o mejekpọoru eshinu
unu shi nọduta ndzụ?
Tọo ?o mejeru lẹ teke kẹ nna
unu oche phẹ?
3 Unu pfukwaaru iya
ụnwegirima unu!
G'ụnwu unu pfukwaru iya
phọ ụnwu nkephẹ.
Ụnwu nkephẹ epfuaru iya
ọgbo ọphu abya nụ.
4 L'iphe, otsu-gbiigbiigbi
igube tarụ taphodo
bẹ oke-igube wụbataru
bya ataa.
Ọphu oke-igube tarụ
taphodo bẹ
ụnwu ọgbolanu igube
wụbataru bya ataa.
Ọphu ụnwu ọgbolanu igube
taphodoru
bẹ mgbagbaramatsụ byaru
bya atachafụ.
5 Unu tehu etehu;
unubẹ ndu angụnukaje
mẹe.
Unu wata ara ẹkwa!
Unu chia mkpu;
unubẹ ndu angụje mẹe
ngụgharu iya ẹka!
Unu kpọo mkpu mẹe
ọ̀phúú ono;
kele a nyịchatawaru
iya unu l'ọnu!
6 Ọ dụru ọha, byaru bya
eripyabẹ alị mu-a.
Ndu ono bẹ ọkpehu dụ shii;
tẹme ọphu aagụtadu
phẹ l'ọgu.
Eze, dụ phẹ l'ọnu dụ gẹ
k'oduma;
mbụ l'ọ dụ g'ẹpyii,
nọ l'ọnu ne oduma.
7 Ọ tapyashịchawaru vayịnu mu;
bya emee oshi figu mu;
ọ bụkotaru ọla-l'iswi.
Ọ swachacharu iya ụgbo
woru iya tọgbo.
Ẹkali iya nọdu achagbaa
ụcha.
8 Unu gụa aphụ gẹ nwamgbọko,
yẹe nwoke teke akwaswee,
yeru uwe-aphụ,
agụ aphụ kẹ ọnwu
gburu nwoke eje
iya alụlu.
9 Ngwẹja-nri; waa ngwẹja-mẹe
chịhuwaru l'ụlo Chipfu.
Ndu bụ uke nọ l'aphụ;
mbụ ndu ono,
ejeru Chipfu ozi ono.
10 Opfu, a kọru akọko bẹ bụwaa
ọla-l'iswi.
Alị kpọhu nkụ; ereshi,
a kụru iya mebyishihu.
Mẹe ọ̀phúú tashịhu; tẹme manụ
nọdu atahụwa atahụ.
11 “G'iphere gudekwa unubẹ
ndu akọ opfu!
Unu rashịa ẹkwa ike;
unubẹ ndu akọ
opfu-vayịnu!
Unu gụa aphụ witi unu;
yẹe balị unu; kẹle iphe,
a kụru l'opfu bẹ e
mebyishiwaru.
12 Ome vayịnu kpọshihuwaru nkụ;
tẹme oshi figu
nwụkotawaa lwaa.
Oshi itorokuma; yẹe mpfụ;
waa oshi ụdara;
mẹwaro iphe,
bụkpoo oshi,
nọkota l'ẹgu l'ophu
kpọhukotawaru nkụ;
kẹle iphe, emeje g'ẹhu
tsọo ụnwu-eliphe
ụtso chịhuwaru.”
Oku izimanụ alwa azụ
13 Unu yekwaa uwe-aphụ wata
agụ aphụ;
unubẹ ndu bụ uke!
Unu watakwa echi mkpu;
unubẹ ndu ono,
anọduje eje ozi
l'ọru-ngwẹja ono!
Unubẹ ndu ono, nọ l'iphu
Chileke mu eje ozi
ono;
unu byakwa eyee
uwe-aphụ
nọkota ẹnyashi l'ophu;
kẹle ngwẹja-nri yẹe
ngwẹja-mẹe bẹ e
buchiwaru
l'ụlo Chileke unu.
14 Unu raa ya arara g'a swịaru
Chileke ẹgu!
Unu tụa ndzukọ, a-dụru
Chileke iche!
Unu kua ndu bụ ọgerenya
ndzukọ; mẹkpoo iphe,
bụ ndu bu l'alị-a l'ophu;
g'ẹphe dzukọ l'ụlo Chipfu,
bụ Chileke unu raku
Chipfu ono l'ẹkwa.
15 Ha-o! Ẹgube mbọku ono;
kẹle eswe Chipfu dụkwaa
ntse.
Ọo-bụru eswe,
Ọkalibe-kangokọtaru-nụ
e-mebyishi iphemiphe.
16 “?Tọbudu l'iphu anyi gẹdegede
bẹ e meru; nri chịhu;
bya emee;
ẹhu-ụtso yẹe ete ẹswa
bvụkwapho l'ụlo
Chileke anyi?
17 Akpụru iphe, a kụru akụku
gbapyashịhuchawaru
l'ime igbo, a kụru iya.
Iphe, bụkota ụlo,
aakụbeje nri
dabyikọtaru iphoro.
Ọba ereshi tụko dakashịhu;
kẹle ereshi ọbu l'onwiya
mebyishihuru l'ẹgu.
18 Lewarọ g'anụ-ụlo atsụgbaa ude!
Eswi bẹ ọ tụgbaru ẹberebete;
kẹle ẹphe te enwedu nri,
ẹphe a-ta;
mbụ l'atụru tụkoru eje
iphe-ẹhuka.
19 Ọ kwa gụbe Chipfu bẹ mu
araku;
kẹle ọku tsuakwaru ẹka
iphe-edobe atajẹ nri,
dụ l'echiẹgu;
mbụ l'iphe, bụ oshi,
dụ l'ẹgbudu nwukọtawaru
phuruphuru nwufu
l'ọku;
20 anụ-ẹgbudu nọdu atụchaa
hẹehee agba achọ ngu.
Nggele nggele bẹ mini
tashịhuwaru.
Tẹme ọku tsufuwaa ẹka
iphe-edobe atajẹ nri,
dụ l'echiẹgu.”