2
Igube, etsu gbiigbiigbi
Unu gbua opu-ọgu l'úbvú
Zayọnu!
Unu echia mkpu-ọgu l'úbvú
mu ono, dụ nsọ ono!
G'iphe, bụkpoo ndu bu
l'alị-a nmakwaa
pyaapyaapyaa;
kẹle eswe kẹ Chipfu
abyaakwaa;
mbụ l'o rwuakwaru
erwurwu;
mbụ mbọku,
a-bụru mbọku,
agba ọchii agba kẹ
tsụkiribaa; mbọku,
urwukpu a-sọpyabe;
ẹkameka ejihu hụduu.
Ikpoto ndu ojọgu,
ike dụ awụ gbiigbiigbi
asọ abya g'ẹka ọchii
nchi-abọhu asọpyabe
asọpyabe l'eli eze úbvú;
ụdu iya ọphu eteke
adụ-swe teke ndiche;
ọphu ọ byadu adụ
l'ọgbo ọphu abya nụ.
Ọku nọ phẹ l'ụzo iphu
ekepyashị iphe
ekepyashị.
Ọku nọdukwa phẹ phọ l'azụ
enwu phoophoophoo.
L'iphu phẹ bẹ alị dụepho gẹ
mgbabu Édẹnu.
Ẹka ẹphe ghawarụ ye l'azụ
bụru echiẹgu,
dabyiru kẹ mmanụ;
ọphu ọ dụdu iphe,
anahụje phẹ nụ.
Ẹphe gbaru ụgbugba g'ịnya.
Tẹme ẹphe nọdu awụ kẹ
wugelengu wugelengu
g'ịnya-ọgu.
Igiji, ẹphe ede gude awụ
gbiigbiigbi l'eli úbvú
eje abya dụepho
g'ẹka ụgbo-inya awụ.
Mbụ l'ẹphe dụepho g'ẹka ọku
alwa wọowoowoo
etsu ekperema ọkponku;
g'ikpoto ndu ojọgu,
a chịkoberu gude
eje ọgu.
Ọha, hụmaru phẹ nụ evujeru
ụzo rwushihu.
Iphu adụkota onyemonye ẹji.
Ẹphe abyajẹ ẹnari g'ojọgu,
ike dụ.
Ẹphe nọdu enyije igbulọ gẹ
ndu ojọgu.
G'ẹphe ha nọdu egbuje giriri
azọ eje;
ọphu ọ dụdu onye ọphu
egbeje egbegbe l'ụzo,
ẹphe eshi;
ọphu ọ dụdu onye ọphu
akwajẹ nwibe iya ǹkù.
Onyemonye apfụjeerupho
kẹkereke azọ eje l'iphu
l'iphu.
Ẹphe anọdujeepho apfụ
shọoshoo apfụda
l'iphu ọgu.
Ọphu ẹphe aladu azụ azụ.
Ẹphe nọdu ezehuje zeba lẹ
mkpụkpu;
tụko igbulọ gbaa gorogoro;
nyichaa enyinyi nyibachaa
l'ime ụlo l'ime ụlo.
Ẹphe nọdu eshijechaa windo
abahụ l'ụlo gẹ ndu-oshi.
10 “Eliphe l'ophu anmakọta
jiijiijii l'iphu phẹ.
Akpaminigwe nọdu anma
yigayiga.
Ẹnyanwu yẹe ọnwa gbahụ
ọchii.
Ọphu kpokpode ekeẹdu
paapaapa.
11 Chipfu nọdu l'iphu ndu
ojọgu iya ede ririri.
Ndu alwụru iya ọgu bụ agụta
agụta.
Tẹme ndu ono, emeje iphe,
ọ sụru g'e mee ono
paa ọkpehu.
Mbọku kẹ Chipfu pakwarụ
ẹka bya adụ ebvu.
?Bụ onye a-dụ ike tapyabẹ
iya lẹ nshi?”
Alaja ọkpoma haa uwe
12 Wakwa iphe, Chipfu epfu
baa:
Ntaakpọnu; unu gudenụ
ọkpoma unu g'ọ ha
lwapfuta mu!
Unu gude aswi ẹgu;
mẹ ara ẹkwa;
mẹ agụ aphụ gude lwa!
13 Unu lajaa ọkpoma unu;
ọ tọ bụdu alaja uwe!
Unu lwapfuta Chipfu,
bụ Chileke unu;
kẹle oomeje eze-iphe-ọma;
tẹme ọ nọdu aphụje
obu-imemini!
Ẹhu te eghujedu iya eghu
ẹgwegwa;
tẹme n-yemobu iya dụ shii.
Tẹme ọphu oohejedu iya ihee
eme gẹ nemadzụ jee
iphe-ẹhuka.
14 ?A maru ?l'ọo-ghakọbe phụaru
unu obu-imemini
meeru unu iphe-ọma;
mbụ nụ unu nri;
waa mẹe;
k'ọphu bụ l'unu e-gude iya
gweeru Chipfu,
bụ Chileke unu ngwẹja-nri;
waa ngwẹja-mẹe.
15 “Unu gbua opu-ọgu ọbu
l'úbvú Zayọnu!
Unu raa ya arara g'a swịaru
Chileke ẹgu, dụ nsọ!
Unu tụa ndzukọ,
a-dụru Chileke iche.
16 Unu chịkobe ndu Ízurẹlu
l'ẹka lanụ!
Unu emee gẹ ndu byaru
ndzukọ ono dụ nsọ!
Unu chịkobe ndu bụ
ọgerenya!
Unu achịkobe ụnwegirima;
mẹ ndu ọphu
eechekwadu ẹra!
G'onye lụru nwanyị ọ̀phúú
hakwaa erwu iya fụta!
Nwanyị, alụru k'ọ̀phúú ahaa
ụlo-epfu iya!
17 Gẹ ndu bụ uke, bụ ndu ejeru
Chipfu ozi nọdukwa raa ẹkwa
lẹ mgbaka nwụlo,
eeshije abahụ l'eze-ụlo Chipfu
yẹle ọru-ngwẹja.
G'ẹphe pfukwaa sụ:
‘Gụbe Chipfu;
phụnaaru ndu nkengu
obu-imemini!
Be mekwa gẹ ndu ono,
bụ okiphe ngu ono bụru
iphe, ee-gude achị ọchi!
G'ẹphe ta abụkwaru iphe,
ọhamoha e-gude agba
mgbọnu;
kẹle-a; ?dẹnu g'o gude
ndiphe je l'anọdu
epfuru ndu Ízurẹlu
asụje phẹ: ?Bụ awe
bẹ Chileke unu nọ?’ ”
Ọnu, Chipfu e-ye
18 Noo teke Chipfu a-wata eko
okophoo l'ẹhu ndu alị ono,
bụ ndu nkiya ono;
bya aphụaru ndibe iya
obu-imemini.
19 Chipfu eyeeru ndu nkiya ono
ọnu sụ phẹ-a:
“Unu lekwa-a; mu anụakwa
unu ereshi; yẹe mẹe ọ̀phúú;
yẹe manụ olivu;
nụkpoo ya unu shii;
k'ọphu oo-ji unu
ẹpho rengurengu.
Mu tee mebaẹdu unu g'unu
bụru iphe,
ọhamoha e-gude
achị ọchi.
20 Mu a-chị ndu ojọgu ono,
shi l'ụzo isheli ono
chị-mihu g'ẹphe nọdu
unu ụzenya.
Mu a-chịru phẹ jeye lẹ
mkpọkoro alị,
adụdu iphe, b
eemetajẹ iya.
Ọgbo ivuzọ ọgu phẹ bẹ
mu a-chịru ye
l'eze-ẹnyimu ụzo
ẹnyanwu-awawa.
Mu achịru ndu ikpazụ ọgu
phẹ ye l'eze-ẹnyimu
ụzo ẹnyanwu-arịba.
Ẹ́wó, ẹphe a-nọdu ekpo
etsulihuẹpho etsulihu.
Mbụ l'ishishi phẹ a-tụkoepho
ẹkameka.
Ire-lanụ, bụ lẹ Chipfu
mewaru iphe,
parụ ẹka.
21 Gẹ ndzụ ba agụshi ngu
gụbe alị!
Ọ chia g'ẹhu tsọo ngu ụtso;
g'i techia ẹswa!
Ire-lanụ bụ lẹ Chipfu mewaru
iphe, parụ ẹka.
22 Gẹ ndzụ ta agụshi unubẹ anụ,
bu l'ime ẹgbudu;
kẹle ẹka unu atajẹ nri,
dụ l'echiẹgu abyawaa
erwu irwu.
Oshi abyawaa amị mebyi.
Oshi figu yẹe vayịnu
abyawaa eme ike phẹ.
23 G'ẹhu tsọje unu ụtso;
unubẹ ụnwu Zayọnu!
Unu nọdu l'ẹka Chipfu,
bụ Chileke unu tee ẹswa;
kẹle ọ watawarụ edzeru
unu mini ishi-apha
ono g'ọ gbaru.
Ọ watawarụ edzeru unu mini
ono edzeshi iya ike;
edzeru unu mini
ishi-apha
bya edzekwaphọ mini
ụla-apha;
g'o shi edzejehawaru
iya unu.
24 Ẹka eechije balị bẹ balị
e-mechaa ji ejiji.
Ẹka aakụje mẹe eji kụdumu
lẹ mẹe ọ̀phúú;
yẹe manụ olivu.
25 Mu a-pfụ unu ụgwo iya
k'apha g'apha phọ,
igube tapyashịru iphe
unu phọ;
mbụ ụnwu ọgbolanu igube;
mẹ mgbagbaramatsụ
iya; mẹkpoo
otsu-gbiigbiigbi iya;
mbụ ojọgu mu,
ike dụ ono,
mu yeru unu ono.
26 Unu e-nwekpọoru ikpoto
iphe, unu a-nọdu eri
jasụ l'ooji unu.
Tẹme ọ bụru mbẹdua,
bụ Chipfu,
bụ Chileke unu bẹ unu
a-nọdu etu ẹpha;
mbụ onye ono, meru iphe,
dụ biribiri l'ẹhu unu ono.
Sụ-a; ndu ono, bụ nkemu
ono;
bẹ e tee mebaẹkwa
iphe-iphere.
27 Noo teke unu a-maru lẹ
mu nọ-a lẹ Ízurẹlu;
maru l'ọo mu bụ
Chipfu bya abụru
Chileke unu;
l'ọ tọ dụedu onye ọzo,
dụbaa nụ.
Ọphu a byadu emebaa ndu
bụ ndibe mu
iphe-iphere ọzo.
Eswe kẹ Chipfu
28 E -mechaa bẹ mu a-wụ Unme
mu l'ẹhu nemadzụ
mgburugburu.
Ụnwu unu unwoke mẹ kẹ
nwanyị e-pfuchiru
Chileke.
Ndu bụ ọgerenya unu
arwọo nrwọ.
Ụnwokorobya unu
aphụa ọphulenya.
29 Lẹ mbọku ono bẹ mu a-wụ
Unme mu ono
l'ẹhu ndu bụ ohu;
unwoke phẹ m'ụnwanyi
phẹ.
30 Mu e-goshi iphe-ọhumalenya
l'akpaminigwe mẹ
l'eliphe l'ophu.
Ọ bụru iphe, mu e-gude mee
ya bụ mee; yẹle ọku;
yẹe ọkpu-tụutuutuu
ẹnwuru-ọku.
31 Ẹnyanwu bẹ ee-me g'ọ
gbaahaa ọchii.
L'e mee g'ọnwa bụru mee.
Tẹme l'o rwua oke mbọku kẹ
Chipfu ono,
bụ eswe, a-dụ ebvu onoya.
32 Mbụ l'aa-dzọta iphe,
bụkpoo ndu araku ẹpha
Chipfu;
kẹle oo-nweru ndu a-nahụ
nụ, a-nọdu l'úbvú
Zayọnu yẹfua lẹ
mkpụkpu Jierúsalẹmu;
mbụ l'oo-nweru ndu
Chipfu e-ku l'echilabọ
nwa ndu ono,
warụ nụ ono;
bụ iya bụ iphe,
Chipfu pfuru.”