2
Adada Ninive
1 Onye a-chịka ngu nanụ
nanụ abyapfutaakwa ngu.
Chekwa ụlo-eli ngu nche!
L'i chee ụzo ngu nche!
Dozia onwongu!
L'ị rịkotakwapho ike ngu
l'ophu!
2 Chipfu e-mekwa g'oshilọkpa
Jiékọpu bya adụ ùbvù g'o
shi dụ lẹ mbụ;
g'ọ bya adụ ùbvù gẹ
ndu Ízurẹlu shi
adụjehawaa.
A makwarụ-a lẹ ndu nchịka
shi chịkashiwaa phẹ;
bya eshi mebyishihawaa
opfu-vayịnu phẹ.
3 Iphe, ndu ojọgu iya egudeje
gbobuta onwophẹ
dụchaa uswe-uswe.
Ndu ojọgu ono yekọta uwe,
eke meemee.
Mgbọro-ígwè, e gude mee
ụgbo-ịnya ọgu phẹ
nọdu aphụ ngerengere
lẹ mbọku ono,
ẹphe kwakọberu k'eje
ọgu ono.
Arwa phẹ bẹ a paliwaru;
ọ nọdu eziwaa
swooswooswoo.
4 Ụgbo-ịnya nọdu eze
gbiigbiigbi awụgha lẹ
gbororo;
o -zeru gidigidi jee l'oozeru
lwaa l'ọma edupfu
l'edupfu.
Ẹphe nọdu ekekọtaepho
jajaja g'orọku;
ezigbaa phaaphaa
g'ebemu-igwe.
5 Ọ kpakọo ndu ojọgu iya,
bụ ndu ike dụ l'ọgu;
ẹphe nọdu evukoẹle-a
evuko eje.
Ẹphe nọdu ezije phaa eje
l'igbulọ,
e gude kpụ-phee
mkpụkpu ono.
Iphe-mgbobe-ọgu,
a nmabẹgbaaru l'igbulọ
ono gude egboberu
iya kechawaru iya
kẹ jịngujingu.
6 Ọguzo mkpụkpu ono gharu
iphu l'ẹnyimu bẹ e
tsukafụru ghebe ọnu.
Unuphu ibe eze gbukahụ.
7 A tụwaru iya; ọ bụru
ekemu l'eze-nwanyị
bẹ aa-kpụ lẹ ndzụ;
kpụru iya laa ẹka ọzo.
Ụnwumgboko,
ejeru iya ozi awata
akwa muumuu
gẹ ndo;
akwa akụ ẹka pọopoopo
l'ọkpoma.
8 Mkpụkpu Ninive dụepho
g'okpuru,
mini nọ iya nụ asọfu asọfu.
Ọ nọdu ara: “Unu pfụru-o!
Unu pfụru-o!”
Ọle ọ tọ dụdu onye ọ dụ
k'agha ẹnya l'azụ.
9 Unu kwaa mkpọla-ọchaa
l'ọkwata!
Unu akwaa mkpọla-ododo
l'ọkwata;
kẹle ẹku, vu oke aswa,
dụ iya nụ taa bvụkwa
abvụbvu!
10 Nta-a bẹ mkpụkpu ono
dabyiakwaru iphoro.
Tẹme ọ bụwaru mkpọkoro
iphe;
bya abụru ochobu.
Meji tọfuwaru ndu
bu iya nụ.
Ikpere nọdu etewaa phẹ
kparịkpari.
Ẹphe nọdu aphụ
kpaakpaakpaa.
Iphu gbachishihukọta
onyemonye nchi.
11 Nta-e; ?bụ awe bẹ iduma
oduma ono nọhunu;
Mbụ ẹka ẹphe nọru nụa
ụnwu phẹ nri;
mbụ ẹka oke oduma
yẹle nyee ya kparụ;
mẹkpoo ụnwu phẹ;
ọphu ọ dụdu iphe,
yeru phẹ ebvu-a?
12 Oduma ono nọdu egbuje anụ,
a-sụru ụnwu iya atata;
swigbushia anụ bya
atọgboru nyee ya.
O gbushia anụ bya atụ-jigbaa
ọgba iya atụ-ji;
mbụ nri,
ẹphe a-nọdu eri jigbaa
iduma iya ejiji.
13 Wakwa iphe, Chipfu, bụ Ọkalibe-Kakọta-Ike eepfu baa: “Lenu; mu nọru ngu lẹ njọ. Mu e-gude ọku tsufu ụgbo-ịnya unu l'ọ kpụa ẹnwuru-ọku tụuu; ọ bụru ogu-echi bẹ ee-gude gbushia ụnwu oduma unu; ọphu ọ dụdu nri oduma, mu byaru aharu unu l'eliphe-a; ọphu aanụmabaedu olu ndu unu ezije ozi.”