3
1 Aphụ a-tsọru gụbe
mkpụkpu mee ono,
bụ iphe,
jiru iya nụ bụ adzụ ụka;
yẹle iphe, a natarụ lẹ nfụ;
ọphu ọ dụdu teke
ịinoduje g'i ti nweru iphe,
a kwatarụ l'ọkwata.
2 Ngabẹnu nchị nụma
g'ẹchachi ada
swịiswiiswii.
Tẹme ọkpa ụgbo-ịnya nọdu
ezekwapho igiji nkiya.
Ịnya nọdu apfụ karagidimu
karagidimu
karagidimu.
Ụgbo-ịnya nọdu agbagbaa kẹ
kwaakwaakwaa.
3 Ndu ojọgu, agba l'ịnya
agbaakwa abya k'ọgu.
Ogu-echi nọdu aha
swooswooswoo;
arwa nọdu ezigbaa
phaaphaaphaa.
Ndu e gburu l'ọgu dụ
igwerigwe;
ndu nwụhuru anwụhu
kụru l'ikpo l'ikpo.
Odzu nemadzụ bụru agụta
agụta;
ndiphe nọdu evuko
odzu evuko.
4 Ọ bụru iphe, kparụ
iphemiphe ono bụ
lẹ nwanyị-ovuọba
ono menụkaru
kẹ nwoke;
kẹle ọomashi mma ike;
tẹme ọ bụru nwanyị,
agwọshi nshi ike;
onye egudeje eme kẹ
nwoke ree ọha,
dụ iche iche;
mbụ gude nshi,
ọogwo ree ipfu,
dụ igwerigwe.
5 Chipfu, bụ
Ọkalibe-Kakọta-Ike
epfukwa sụ:
“Hụmanu! Mu nọkwaru ngu
lẹ njọ!
Mu a-jịkwa ngu uwele;
chịta igburọnu uwe
ngu wụshi ngu
l'atatiphu.
Mbụ lẹ mu e-me g'ọha l'ophu
hụma ngu l'ẹka ị gba
ọto.
Alị-eze ndiphe l'ophu ahụma
ngu l'ẹka iphere
guderu ngu.
6 Mu e-woru iphe,
dụ ẹjo-adụdu tụa ngu.
Mu eworu ngu mee iphe,
a-dụ ẹhu-eswe ẹhu-eswe;
woru ngu mee iphe,
aa-byajẹ ahụma
ahụma.
7 Iphe, bụkpoo ndu hụmaru
ngu nụ a-nọdu agbaru
ngu ọso.
Ẹphe atụko epfu sụ: ‘Ninive
bụakwaa ochobu!
?Bụ onye a-gụ aphụ iya?
?Bụ awe bẹ mu a-hụma onye
a-nọdu adụ ngu obu?’ ”
8 ?Ị ka mkpụkpu Tebẹsu ọkpehu; mbụ mkpụkpu ono, nọ l'agụga ẹnyimu Nayịlu; mini nọ-phee ya mgburugburu? Ọ bụru eze-ẹnyimu bẹ o shi egudeje gbobuta onwiya; mini, nọ l'ẹnyimu ono bụru igbulọ nọ-phee ya mgburugburu. 9 Ndu Kushi yẹle ndu Ijiputu bụru phẹ bụ agbarike iya; ọphu ike abvụjedu phẹ abvụbvu. Ndu Putu ẹphe lẹ ndu Libiya yịru lẹ ndu eyeru iya ẹka. 10 Ọle e mechalẹru-a kpụa ya lẹ ndzụ; ẹphe je eburu l'alị ndu ọzo. Ụnwu phẹ, a nwụru k'ọphuu bẹ e gburu pyaapyaa tụkaa lẹ mgbakata-ụzo. A tụa ido gude kee ndibe phẹ, bụ ndu a maru ẹpha phẹ. Unwoke phọ, shi bụru ndu parụ ẹka apaa bụkotaru ndu e mechaarụ tụshia ẹgbirigba.
11 Gụbedua kwaphọ bẹ mẹe e-mechakwaa tsụahaa. Ii-mechakwaa wata edomi onwongu edomi; mbụ wata achọ ẹka ịi-nọdu zee ndzụ gẹ ndu ọhogu ngu ta adụ iphe, ẹphe e-me ngu. 12 Iphe, bụkpoo ụlo, ị kpụshiru ike a-dụkotakwa g'oshi figu, mịgbaaru mebyi mbụ, vuru ụzo chashịa. A -nmaa ya yigayiga; mebyi iya ono esweshihu dalahụchaa l'ọnu ndu e-ri iya nụ. 13 Lewarọ ndu ojọgu ngu g'ẹphe dụgbaa g'ụnwanyi! Ọnu-abata alị ngu gheru karaphoo gẹ ndu ọhogu ngu wụbata. Ọku tsuwaru mgbọrígwè, e shi gude tụ-chia ya atụ-chi. 14 Kukwaa mini kukọbe m'ọbvu teke ndu ọhogu ngu a-bya anọ-phee ngu mgburugburu! L'i mee g'ụlo ngu, a kpụshiru ike kabaa eshihu ike! Ghaa ẹja-ụlo; yọo bụloku; l'i mekwaa iphe, e gude ayọ bụloku! 15 Ọ kwa ẹka ono bẹ ọku a-nọdu tsua ngu; ogu-echi asụa ngu pyaapyaa g'ẹka igube ata iphe pyaapyaa. Zakwaa igwerigwe g'ogu; zakwaa g'igube!
16 I mewaru gẹ ndu azụru ngu aswa akabaa igwerigwe jasụ ẹphe ka kpokpode, nọ l'igwe igwerigwe; obenu l'ẹphebedua zebataru g'igube bya agbabẹ alị ono l'ophu ẹka ọto; ọ bụru phẹ eje iphe, ẹphe eje. 17 Ndu-ishi ngu dụepho g'igube; mbụ lẹ ndu ederu ngu ẹkwo dụepho g'igube, etsu gbiigbiigbi, jeru je ebegbaaru l'eli igbulọ mbọku, oyi atsụ; anwụ -chifuẹpho; ẹphe phekashịhu; ọphu ọ dụdu onye maru ibiya ọphu ẹphe ephe ala.
18 Gụbe eze ndu Asiriya; ndu echeru ngu atụru ngu bẹ mgbẹnya tụru; ọphu ndu nweru ẹnya l'alị-eze ngu adụdu iphe, ẹphe meru. Ndibe ngu bẹ a chịakwaru; ẹphe gbaa nanụ nanụ l'eli úbvú úbvú; ọphu ọ dụdu onye jeru achịkobe phẹ.
19 Ọ́nyá, aba ngu nụ ta adụkwa iphe, adụ ike eme g'ọ kpọhu. Iphe, e mekarụ ngu bẹ ọ́nyá iya atụkwa rikarika. Iphe, bụkpoo onye nụmaru g'ọonwuru ngu akụjekwa ẹka kpaa l'ọo gụbedua daru adada; kẹle-a; ?bụ onye bẹ ẹjo-ememe, ịinoduje eme ebutaadaru?