9
Ikpe, ee-kpe ndu ọhogu Ízurẹlu
1 Ọwaa bụ ozi, Chipfu ziru zidoru ndu alị Hadụraku; tẹme o gbupyabẹwaa mkpụkpu Damasụkosu; kẹle ẹnya ndiphe; mẹkpoo ẹnya ọkpa-ipfu l'ọkpa-ipfu Ízurẹlu l'ophu bụkota lẹ Chipfu bẹ ọ nọwaa. 2 Oopfukwaphọ iphe, oo-me mkpụkpu Hamatu, bụ ndu ẹphe l'ẹphe maru oke; mẹkwapho mkpụkpu Taya yẹe mkpụkpu Sayịdonu; mbụkpokwaa ẹphebedua ono, maru iphe ntụmatu ono. 3 Ndu Taya kpụakwaru mkpụkpu phẹ kpụshia ya ike. Mkpọla-ọchaa bẹ ẹphe kpawaru kụbe g'onye kpokọberu urwuku; bya akụbe mkpọla-ododo g'onye kụberu ọzu l'agụga gbororo. 4 Obenu lẹ Nnajịuphu a-nafụ phẹ iphe, bụ nkephẹ; bya enwuru ẹku phẹ ye l'eze-ẹnyimu. Ọku etsua mkpụkpu Taya ono tsufu.
5 Ndu mkpụkpu Ashikelọnu a-hụma iya; ndzụ erwuta phẹ; ndu mkpụkpu Gaza ahụma iya terwuhu lẹ ndzụ-agụgu. Nokwaphọ g'ọo-dụ ndu Ẹkuronu; kẹle iphe, ẹphe shi ele ẹnya iya a-la pyẹtee. Ndu Gaza bẹ onye eze phẹ a-la l'iswi; l'a gbakahụ lẹ Ashikelọnu. 6 Ọ bụru ndu alị ọzo e-buchi mkpụkpu Ashịdodu; mu emee g'eku-onwonye ndu Filisitayinu bụru bugemu. 7 Mee-iphe ono, ẹphe angụje ono bẹ mu a-nafụ phẹ; mu anyashịa phẹ nri ono, e merwuru emerwụ ono, nyakaaru phẹ l'eze ono; nwa ndu ọphu phọduru nụ lẹ ndu ono; anọdu-doru Chileke anyi; bụru ndu a-dụwaa g'ipfu ẹka phẹ l'alị Jiuda; ndu Ẹkuronu abyakpọro adụ gẹ ndu Jiebusu. 8 Obenu lẹ ndibe mu bẹ mu a-nọdu adzọje l'ẹ́ká ndu ojọgu, azọ garamugaramu agha ono; ọphu ndu ewere abyadụ agbabaa ndibe mu ophorokpo; kẹle nta-a bẹ mu gudewaa ẹnya mu hụma g'ẹphe ejebe iphe-ẹhuka.
Abyabya eze ndu Zayọnu
9 Gụbe nwada Zayọnu;
tekwaa ẹswa teshia
ya ike!
Gụa ebvu ẹhu-ụtso;
gụbe nwada Jierúsalẹmu!
Lekwa; onye bụru ngu
eze abyapfutaakwa ngu.
Ọ bụ onye pfụberekoto;
tẹme ọ nọdu adzọje
nemadzụ.
O wozetaru onwiya alị;
nọdu l'eli
nkapfụ-ịgara agba
abya;
mbụ l'eli nwa nkapfụ-ịgara
ọbu.
10 Ndu Ifuremu bẹ mu a-nafụ
ụgbo-ịnya-ọgu phẹ;
mu anafụkwapho ndu
Jierúsalẹmu ịnya,
aagbajẹ alwụ ọgu.
L'a gbajia ụta, e gude eje ọgu.
L'ọ raa ya arara sụ g'ẹhu
dụkwa ọhamoha guu.
Abụ eze nkiya e -shi
l'eze-ẹnyimu ọwa dasweru
eze-ẹnyimu ọzo.
L'o shikwaphọ l'ẹnyimu
Yufurétisu nọo jasụ
l'ẹka igwe beru alị beru.
Ee-dophu ndibe Chileke azụ
l'ọnodu phẹ
l'ọnodu phẹ
11 “A -bya lẹ gụbedua;
mu e-gude kẹ mee ono,
mu lẹ ngu gude gbaa
ndzụ ono haa ndibe ngu,
nọ lẹ mkpọro l'ime iduma,
mini adụdu ono;
mee phẹ;
ẹphe enweru onwophẹ.
12 Unu laphu azụ l'ẹka ono,
unu kpụshiru ike ono;
unubẹ ndu mkpọro ono,
ẹnya dụ l'ụzo ono!
Mbụ lẹ nta-a bẹ mu arakwa
iya arara
lẹ mu a-nụ unu iphe,
ha g'iphe, unu shi
nwehawarụ ugbo ẹbo;
13 kẹle mu e-woru ndu Jiuda
kwee g'onye kweru ụta;
mu eworu ndu Ifuremu
mee g'ọ bụru apfụ,
e gude agba ụta ọbu.
Mu a-kpatsu ndibe gụbe
Zayọnu g'ẹphe dapfu
ndibe gụbe Gurisu.
Mu emee ngu g'ị du
g'ogu-echi,
onye dụ ike l'ọgu pa.”
14 Noo teke Chipfu a-byapyabẹ
phẹ.
Apfụ iya eziahaa phaaphaa
g'ebemu-igwe.
Nnajịuphu, bụ Chipfu abya
eworu opu-ọgu gbua.
Ọ bụru oke phẹrephere,
shi ndọhali bẹ oo-gude
eje.
15 Ọ bụru Chipfu,
bụ Ọkalibe-Kakọta-Ike
e-gbobuta phẹ.
Ẹphe a-nọdu atsụ ndu ọhogu
phẹ ọtsu-ẹpfu;
alwụ phẹ alwụ-kpe
phẹ.
Ọ bụru iphe, ẹphe e-gude
eme iya bụ mkpuma
rọbo agbagba phẹ.
Ẹphe a-ngụ iphe,
aangụ angụngu;
aba gẹ ndu mẹe atsụ.
Ẹphe ejije pyịmu g'ochi,
eegudeje ephe mee
l'agụga ọru-ngwẹja
Chileke.
16 Ọ bụru Chipfu, bụ Chileke
phẹ a-nọdu adzọ phẹ
m'o -rwua mbọku ono;
eshinu ẹphe dụ
g'iphe-edobe iya bya
abụru ndibe iya.
Ẹphe a-gbajẹ kpịngu l'alị
iya g'igopoto,
nọ l'eli okpu-eze.
17 Lewarọ! Ọ dụnukaru ree
tẹme ọ manụka mma.
Ereshi l'a-nọdu eme
g'ụnwokorobya phẹ
bụru ndu nweru iphe
shii;
mẹe-ọphuu emekwaphọ
g'ụnwada phẹ nwụjaa
ọnu-ọchi.