10
Chipfu e-leta Jiuda ẹnya
1 Unu pfuaru Chipfu g'o dzeeru unu mini teke oodzeje mini ishi-apha. Ọ kwa Chipfu emeje g'igwe rwua erwurwu. Ọ bụru iya ayọjeru ụnwu-eliphe mini; tẹme ọ nọdu emeje g'iphe-akụku wata asọ pulapula l'ẹgu; 2 kẹle ọbvu agwọta atụkwa atụ-kporoko; ndu agba ẹja nọdu aphụ ọphulenya, abụdu eviya; ẹphe ezeje nrwọ, bụ ụka; tẹme ọ bụru mkpọkoro obu bẹ ẹphe a-nọduje adụ. Ọ bụru iphe ono meru g'o gude ndu-a nọdu anọduje awụ-phe g'ikpoto atụru, enwedu onye eche phẹ nụ.
3 Ẹhu-eghu mu enwukwa phuruphuru l'opfu ẹhu ndu eche atụru ono; mu jekwa l'anụ ndu-ishi ono aphụ; kẹle Chipfu, bụ Ọkalibe-Kakọta-Ike e-che-a atụru iya, bụ iya bụ ọnu-ụlo Jiuda. Oo-me phẹ g'ẹphe dụ g'ịnya, dụ akpabiri l'ẹka e gude iya alwụ ọgu. 4 Ọ bụkwa lẹ Jiuda bẹ mkpuma, gude ụlo e-shi fụta; ọ bụru iya bẹ nggu, gude ụlo-ẹkwa e-shikwaphọ; ọ bụru iya bẹ ụta, e gude alwụ ọgu e-shikwaphọ; ọ bụru iya bẹ iphe, bụkpoo ndu a-bụru ishi e-shi l'ẹka. 5 Ẹphe a-tụgba nanụ; dụepho gẹ ndu bụ ojọgu, ike dụ; ẹphe azọo ndu ọhogu phẹ tọlitoli lẹ gbororo l'ẹka aalwụ ọgu. Eshinu Chipfu nọ swiru phẹ eswiru bẹ ẹphe a-lwụ ọgu chịkaa ndu gude ịnya alwụ ọgu.
6 Mu e-me g'ọnu-ụlo Jiuda shihu
ike;
mu adzọo ọnu-ụlo Jiósẹfu.
Mu e-me g'ẹphe laphu azụ
l'ọnodu phẹ;
kẹle mu a-phụru phẹ
obu-imemini.
Ẹphe e-mechaa dụ gẹ ndu mu
eshidu jịka ajịka;
kẹle ọo mbẹdua bụ Chipfu
bya abụru Chileke phẹ;
mu je l'azajẹ phẹ ẹnu.
7 Ndu Ifuremu e-mechaa dụ gẹ
ndu ike dụ l'ọgu;
ẹhu e-mechaa tsọahaa phẹ
g'onye ngụru mẹe.
Ụnwu phẹ ahụma iya tee
ẹswa;
obu atsọahaa phẹ rịkpotoo
l'ẹka Chipfu.
8 “Mu a-gbaru phẹ ọla gude
chịbata phẹ;
noo kẹle mu gbafụtaru
phẹ;
ẹphe abya adụ igwerigwe
g'ẹphe shi dụhawaa.
9 A makwarụ-a lẹ mu chịru
phẹ ghakaa l'echilabọ
ndiphe;
ọle ẹphe e-shichaa l'ẹka dụ
ẹnya nyata mu.
Ẹphebedua ẹphe l'ụnwegirima
phẹ a-wafụ;
ọzo bụ l'ẹphe a-lwa.
10 Mu e-je lẹ Ijiputu je achịlata
phẹ.
Mu eje Asiriya je atụtukobe
phẹ.
Mu a-chịru phẹ bya l'alị
Giladu yẹle úbvú úbvú
Lébanọnu;
ọphu ụzo a-sụkpodaa phẹ
nụ anọno.
11 Ẹphe a-ghata eze-ẹnyimu
iphe-ẹhuka ono;
ọle ọtu-kpereree mini ono
bẹ aa-byanyị;
tẹme ogbu-mini ẹnyimu
Nayịlu l'ophu
atahụkota gbengu.
Eku-onwonye ndu Asiriya
abụru iphe, e wozeru
alị; tẹme ike ono,
shi dụ ndu Ijiputu
ono abụru phuchamu.
12 Mu e-me; ike adụ ndu Jiuda;
tẹme ọ bụru ẹpha mu bẹ
ẹphe e-gude buru.”
Nokwa iphe, Chipfu eepfu.