3
Mpìr Agbam Iklisiyaká Abig Shi Mpìr-à Nsàn
1 Jír-à níng í jír àjai, wà big dang sig n rag: Mpìr-à ma ri mam á kyinnwá ni rag kwá shi àgbam iklisiya, ku ri mam bu-à ǹsàn. 2 Sàn sig mpìr-à ma shi àgbam iklisiya aku shi mpìr-à ri sa fig bu-à bibai bàna, aku shi ma uwà ńzyun, aku shi mpìr-à ri pànn shinnwá, aku shi àzír, aku shi mpìr-à mpìrká ri yan kyinnwá, aku shi mpìr-à ri pànn kyìnn vù pyànà á luwá ni, aku shi mpìr-à má tàg yì mpìrká bu, 3 aku shi mpìr awa pyann shin bàna, aku shi mpìr-à má swau pyann shí bàna, ama aku shi mpìr kyinn ajun, aku bai dìr ma mpìr bàna, aku shi mpìr azìm bài bàna. 4 Aku yì barà kwá bàg ma mpìrká á luwá ni sìsàn nímá, ma aku tàg yar yanká buwá big, jirà abig wib ku. 5 Mpìr-à ma pànn yì fig luwá bàna, sáshinn kwá pànn yì bìr mpìr iklisiya rà? 6 Mpìr-à hi kada aku shi mpìr-à kà sig ma àpyú á gbìb Yesu ni bàna, jirà aku gbar dù shinn bàna, ma aku kù kà á kwonn wà-à bá wà Shaitan níng bàna. 7 Aku shi mpìr-à ǹsàn, jirà mpìrká zyun-à ri bàg fig Yesu bàna níng, abig yan ku tìnn, jirà kada abig bar bai zìnnwá bàna, ma aku kàng bu-à bá tor pànn ku jirà aku kà á vù Shaitan bàna.
Jír-à Bulus Ba Sig á Shinn Dikonká
8 Dikonká abig shi mpìrká shi sig ma pìkyinn-à sìsàn, abig shi mpìr gwangga. Kada abig shi mpìr awa pyann shin bàna, kada abig shi mpìr sunu bàna. 9 Abig bir pìkyinnbá á jírká Shìdun tìya byann sig big á shinn barà bá bàg Yesu, ma abig shi mpìr kyinn kyìkyàr. 10 Abig màg màg fig ma big ḿpyim. Wà ba myàng kyinnbá ma sàn hing, í wà abig ya big swàm-à hi abig sa. 11 Uwàká bigbá abig shi ma pìkyinn-à sìsàn tìnn. Kada abig zìnn swau mpìr bàna, ama abig pànn shinn, ma abig shi mpìr gwangga. 12 Dikonká abig shi ma uwà ńzyun ma abig shi mpìr-à ma pànn samyib yanká bubá ma mpìrká á lubá ni. 13 Mpìrká ma ri sa swàm-à sìsàn, bá dìg zìnn-à sìsàn á pyànn mpìrká ni. Bá dang jír ma gbam á shinn pìkyinn birbá á byar Yesu Kristi.
Jír Zùzwàun á Shinn Yesu Kristi
14 Mì ri kyab á kyinnmí ni, má bi myàng wù má nonn fig ánonn bàna. 15 Mì ri ba ya wù wàníng, jirà kó ma yag fòr fonn fig bàna, wá yì bu-à Shìdun ri zìm mpìrká á luwá ni abig sa, wato í bìr mpìrká á iklisiya bu Shìdun, àsàin-à shi sig ma yonki. Mpìr iklisiyaká í mpìr gwangga. I mpìrká ri tàg jir Shìdun á gbìb àjai. 16 Buká Shìdun sa ya sig yi bidìm pár, yi yì gban fig bàna, zwàun hing wàni, buká hi í wàníng:
Yesu bi á jànn-à ni n nga wi dìr mpìr jíkwìnn.
Awun kyìkyàr tìya hing yi rag ku í mpìr gwangga.
Yann aswam Shìdun mà wai myàng hing ku.
Jir àjwár á shinnwá ni big dinya rìghing mpìrká á jànn-à ni.
Hár mpìrká bir hing pìkyinn á byarwá ni.
I wà big zìg yag rìg ku mà wai.