1 Mì ri kwonn wù ma Shìdun ma Yesu Kristi àsàin-à má wà mpìrká kwonn, ká shi sig ma yonki ma ká wu rìghing. A dò jir barà kwá kàng bi má na kùrwá níng, mì ri dinya wù, 2 á dinya mpìrká jir Shìdun, ma á sar gbam á dang kyann, kó wà mpìrká ma ri zìm abig fig, kó wà ba zìm fig abig fig bàna. A kar bàg big abig yì gbìb àjai, ma á tàg big abig fim bu pyìr sa, á dang gbam big pìkyinn, á tib wann pìkyinn ma á tàg big. 3 Ayúnn zyun má bi wà mpìrká má ngàng wà abig fig jír àjai. Bá bàg sunu bu bibaiká. Bá fig íri jir mpìrká ri tàg big bu-à big ri zìm abig fig. 4 Bá ngàng bu tàg àjai, má fig jir bu tàg ǹsáng. 5 Ama buwú wù Timoti, á pànn shinnwú á kó kai ni bidìm pár. Shwìn-à wa wa bidìm pár á bà kyinn, á sa swàm jir àjwár dang kyann-à níng, á sa kó kai bidìm pár àràg barà sàn sig wùn aswam Shìdun aku sa.

6 Bumí sumí dà fig rag àbìr bàna, sumí fòr hing barà má fim dunyaru. 7 N sar gbam n sa hing swàm Shinn Luyí, hár ǹ sa vinn hing, ǹ bir hing pìkyinnmí á byarwá ni hár fòr bi sai-à sumí màg barà tàma-à níng má fim dunyaru. 8 Ayúnn-à níng hi Shinn Luyí àsàin-à má wà kwonn ábibir níng, kwá wa mì anì swàm bu ǹsàn ku ya sig mì rag ń sa. Kwá wa fig íri mì áwinmí ni bàna, kwá wa mpìrká ká ri shi kir ku, mi ri wìm aku bi níng.

9 A sa barà wá sa má bi á byarmí ni pyar pyar. 10 Dimas buwá dò jir barà ku ri zìm bu dunyaru, ku fim wa mì n yag rìghing mà Tasalonika. Karaskas yag rìghing mà jànn Galatiya, Titus yag rìghing mà jànn Dalmatiya. 11 Mpìr-à yi ma ku shi sig í zyun íri Luka áwinwá ni. Timoti, aning big Markus bí zyun, jir kai bàna kwá sa shang mì swàm. 12 N swam yag rìghing Tikikus mà Afisa. 13 Sai-à wa bi hing á zìg bi kwonn ma jà wàumí ǹ fim sig mà Taruwasa á vù Karbus, á zìg bi kwonn ma tarkadaká bumí í zyun, àràg ká big sa sig ma wau níng bàna má.

14 Alizanda mpìr-à ri yìg bu níng, ku sa mì bu-à bibai wàni. Shinn Luyí má sa pyann kàng ku bu-à ku sa sig mì níng. 15 A kang shinnwú ma ku, jir kai bàna ku kar ngang hing wàni, jirà aku kan dim jir àjwár-à yi ri dang kyann níng.

16 Sai-à ǹ sar jag á pyànn agib jír n dang jír níng, walai mpìr-à kà numí, kó ni bidìm pár fim rìghing mì. Ama a Shìdun yafa ya big. 17 Shinn Luyí shi kwonn ma mì n ya mì gbam, àjirà ń dinya mpìrká zyun-à í Yahudawaká bàna níng jir àjwár-à níng ǹsàn nímá jirà abig fig. Ku pinn zu rìghing mì á nu wiyir. 18 Shìdun má pinn zu rìg mì áyau bu-à bibai, má zìg yag mì ítau mà byar-à ku na sig kùrwá mà wai. Shìdun aku shi mpìr ùwài á byar kó ni bidìm pár hár kinn kinn. Aku shi àdòníng.

19 Mì ri bib kà Biriskila ma Akila, kwonn ma mpìrká mà lu Unasifaras. 20 Arastas shi sig ma buwá mà Korinti. N fim sig Tarufimas mà finn swann Militus, dìrwá jwar fig bàna. 21 A sa ma á bi daka sai-à shyù kù fig ma bàna níng.

Aubulus ma Budis, ma Linas ma Kalaudiya kwonn ma wunzàká kádà níng, big bidìm pár big ri bib kà wù.

22 Shinn Luyí aku shi á pìkyinnwú ni. Asànwá aku shi kwonn ma ning, ning bidìm pár.