2
1 Ayúnn ùwài zyun big ri bar rag í Pentikos, barà àyúnn-à níng hi fòr, sái mpìrká ri bàg Yesu big bidìm pár big kwonn shi sig í byar ńzyun. 2 Big ri shi, sái big rag abig fig níng, big fig nài gbam wàni, shi àràg í wàu zyun ngbam nímá ri gbár nì, wann bi mà wai, n gbar mònn lu-à big shi sig áni níng bidìm pár. 3 Sái big myàng bu shi àràg anam pyìr bi, n yam gàb fim rìg á shinnbá ni bidìm. 4 I byar-à hi Awun Shìdun bi kà á kyinnbá ni big bidìm pár. Big bi dang nu jírká káhi kim kim, nu jír-à big rì dang bab fig bàna. Big dang bar bu-à Awun Shìdun ya sig big abig dang.
5 Mpìr Yahudawaká káhi shi sig á finn swann Urushalima big í mpìrká ri wib Shìdun, big bi sig byar kim kim kó áni á dunyaru bidìm pár. 6 I byar-à big fig nài gbam mà wai àràg í wàu. Barà big fig àdòníng, big shàr kwonn bi gban rìg á byar káníng ni. Kó ni ri fig káníng ri dang nu jírbá. 7 Mamaki pànn rìghing big, big rag, “Mpìrká ri dang jír-à níng bidìm íri mpìr Galiliká bàna rà? 8 Sáshinn yi ri fig kó ni ri dang jír big nu jíryí rà? 9 Yi shi síg nì mpìr jànn kim kim. Yi mpìr Partiyawaká, mpìr Madayanawaká, mpìr Ilamawaká, mpìrká á jànn Bagadaza, ma jànn Yahudiya, ma jànn Kapadokiya, ma jànn Pantas, ma jànn Asiya, 10 ma jànn Pirijiya, ma jànn Pamfiliya, ma jànn Masar, ma jànn Turabus agunn finn swann Kurane, hár ma mpìrká á jànn Roma. 11 Yi bi sig yi yann Yahudawaká big ká í Yahudawaká bàna, ká ri bàg Shìdun àràg barà mpìr Yahudawaká ri bàg. Ayauyí ni mpìrká káhi bi sig ma Karita ma Arabiya. Yi bidìm pár yi ri fig big ri dang jír big nu jíryí, big ri dang bu ùwài-à Shìdun sa sig.” 12 Big sa mamaki, jír-à hi vù rìghing big átai, big bib bar dìrbá rag, bu-à hi í kai rà?
13 Sái mpìrká káhi màm jwann big, n dang rag, “Ai, káníng wa pyann sig shin, í bu-à sa níng.”
Bitrus Dinya Big Yìr Bu-à Sa Sig
14 Sái Bitrus ma jàuwá big dwib agban zyun big sar dù nann á wai. Bitrus dang jír ngbam nímá. Ku dinya mpìrká kwonn shi sig níng rag, “Ning wunzàmí big, mpìr Yahudawaká ma mpìrká á finn swann Urushalima, aning shi akim, aning fig jírmí ń dinya ning yìr bu-à sa sig níng. 15 Mpìr káníng wa pyann fíg shin àràg barà ning ri dang níng bàna. Tàma-à níng í àsháu ajunndúbi, sa fig ma barà mpìr má wa pyann shin bàna. 16 Bu-à ning myàng sig níng, í bu-à Yoila mpìr-à rìi dang kyann jir Shìdun, ku rì ba sig n rag,
17 ‘Shìdun rag, sai-à dunyaru ma nyàan vinn,
kwá wìr wann bi ya mpìrká bidìm pár Awunwá má kà á kyinnbá ni.
I byar-à yann wunùká bigná big yann uwàká bigná má dang jírwá.
I byar-à yann sukàká bigná má myàng bu-à big myàng bab fig á dunyaru bàna.
I byar-à àgbamká bigná má la la.
18 Hár kwá wìr wann ya fàuká buwá big awunwá á àyúnn-à hi.
Kwá wìr ya wunù ma uwà bidìm pár.
I wà bá dang jírwá.
19 Kwá sa swàm bu mamaki mà waisháu-à ni,
kwá sa á jìnn ni tìnn,
barà mpìrká má myàng gbamwá.
Bá myàng àsà ma pyìr ma azunn pyìr.
20 Bá myàng àyúnn-à má kàng rìg fi.
Bá myàng sònn-à má gbànn shi àràg àsà,
í wà Shinn Luyí má bi, àyúnn-à níng hi í àyúnn-à ùwài.
21 I wà kó ni ma vig hing Shinn Luyí a wàníng myàng ashiwá, wàníng má zìg zu ku.’
22 “Ning mpìr Israilaká, aning fig. Yesu mpìr á Nazarat í zyun-à Shìdun shig zu sig ma shinnwá. Ku sìnn sig wàníng á pyànn ná ni, ku sa swàm bu mamaki á vù wàníng ni, jirà aning yì rag í ku swam bi sig wàníng ni. Ning má, ning yì hing ku. 23 Shìdun ya kà sig mpìr-à níng á vùná ni. Ku yì rìghing bu-à ná sa wàníng. Ku zìm síg nì àdòníng. Ning zìg ku, n ya kà á vù mpìrká ri sa bu-à bibai abig dab bàg gbam ku á dìr bín, ku í wu rìg-à. 24 Ama barà ning gban rìghing ku níng, Shìdun bi gbar dù kàng ku ma yonki. Shìdun zìg zu rìg ku áyau awa ki. Shar ki pànn sar fig ku bàna. 25 I barà Dawuda rì dang sig áni á shinnwá ni. Ku dang rag,
‘N myàng yì rìghing Shinn Lumí,
ku ri shi kyann á pyànnmí ni,
ku ri shi á vim numí ni,
barà kwá sa shang mì, má shàr fig kó bu zyun bàna.
26 I bu-à sa pìkyinnmí ri fig àjwár,
jírmí í jir àjwár.
Kó ma wu má, má bir pìkyinnmí á dìrwú ni,
27 jir kai bàna ǹ yì hing wá fim fig mì á shar ki bàna.
Wá fim fig mì wùn sukà kyìkyàrwú a dìrmí aku swàr bai bàna.
28 A tìya sig mì gbìb yonki zyun-à kinn kinn.
Barà yi ma wù ri shi zyun níng, wá sa jwar pìkyinnmí wàni.’
I jír bu-à Dawuda ba sìnn sig níng.
29 “To, wunzàmí big, tàma-à níng má dinya ning jír àjai á shinn yàkúyí Dawuda ni. Ku rì wu rìghing, big jì rìghing ku. Hár tàma-à níng, í barà amirwá shi sig áni áyág. 30-31 Ama jírwá ku dang sig níng, ku dang sig jír á shinn Kristi. Ku rag, wàníng í àsàin-à má dù nann zu kàng ma yonki, jir kai bàna Dawuda í mpìr-à ri dang kyann jir Shìdun. Shìdun rì dinya sig ku rag, kwá sìnn kà mpìr zyun áyau yiwaiwá ni, wàníng má na kùr ásimwá ni. I bu-à sa ku dang jír-à níng á shinn Almasihu, n dang rag,
‘Bá fim fig wàníng á shar ki bàna.
Dìr wàníng má swàr bai fig bàna.’
32 Mpìr-à níng hi í Yesu, Shìdun gbar dù kàng sig ku ma yonki. Yi má yi myàng hing. 33 I wà Shìdun zìg yag ku mà wai. Ku yag shi sig á agunn vìm nu Shìdun. Tàma-à níng Shìdun ya ku Awun Kyìkyàr àràg barà Shìdun gib sig nu rag kwá ya. To, bu-à ning ri myàng janá-à níng ma bu-à ning ri fig, í swàm Awun-à ku wìr wann bi sig. 34 Dawuda nann zu yag fig mà wai bàna. Ama ku í àsàin-à dang sig rag,
‘Shinn Luyí Shìdun dinya Shinn Lumí rag, a wàníng shi agunn vìm nuwá ni,
35 sái wà kwa sìnn kà hing mpìr azíbká bu wàníng á mìr bar wàníng ni.’
36 “Jir wàníng, sàn sig mpìr Israilaká bidìm pár abig yì rag í Yesu zyun-à ning dab bàg gbam sig á bín-à ni, ku í zyun-à Shìdun shig zu sig ku n sìnn sig ku Shinn Luyí.”
37 Barà mpìrká shi sig níng fig jir Bitrus àdòníng, í byar-à kyinnbá gib. Big bib Bitrus ma yann aswam kádà níng n rag, “Yá sáshinn rà, jàuyí big?”
38 Bitrus dinya big rag, “Bu-à ná sa bàna, aning fim bu pyìrná, kó ni bidìm pár aku wau dìr batisma á zìnn Yesu Kristi jirà a Shìdun yafa ning bu pyìrná, í wà kwá ya ning Awunwá. 39 Shìdun dang rag, kwá ya ning Awunwá, ning ma yanká bigná big. Hár ku rag kwá ya mpìrká swaibá kim kim, ká zyun-à kwá bar bi á byarwá ni.”
40 I byar-à Bitrus dinya big jír nìnànn nímá. Ku twìb big byur rag abig zìg zu shinnbá áyau shwìn-à Shìdun má tìr bi á dunyaru. 41 Mpìrká fig sig jírwá níng, big nìnànn nímá big bir hing pìkyinn á jírwá ni. I byar-à big wau rìg big dìr batisma. Ayúnn-à níng hi mpìr dubu sara swàb kà mi ri bàg Yesu. 42 Mpìr káníng ri shwann kyann buká yann aswamká bu Yesu ri tàg big. Big ri ji kyann buju bu-à big ri kyab pànn barà Yesu wu sig níng. Big ri vig kyann Shìdun. I bu-à big ri sa kyann kó ákaun.
Barà Mpìrká Ri Bàg Yesu Ri Shi Shubá Ani Ma Bar Dìrbá
43 Yann aswam káníng bó, big ri sa swàm bu mamaki nìnànn nímá. Hár bi sa bìr mpìrká zinn wìr rìg big bidìm pár. 44-45 Mpìrká ká ri bàg Yesu big ri shi byar ńzyun. Big zìg kwonn buká big shi sig ma kàhi, big ri wann tafim, mi ri gàb fim ya kó ni bài-à bàkyinn barà kwá sa bu-à ku ri zìm. 46 Su ma su bidìm pár, big ri kwonn yag mà lu Shìdun. A lubá ni, big ri gàb fim buju-à big ri kyab pànn Yesu barà ku wu sig níng. Big ri ji buju ábìr-à ni ma pìkyinn àjwár. 47 Big ri swam yan kyann Shìdun. Mpìrká ri zìm big. Su ma su Shìdun ri swàb kà ya big mpìrká ku zìg zu sig níng.
Big Dàb Gbam Mpìr Dor Zyun