1 Павел синедрион пеԓа ӑӈкәрмәс пӑ йастәс: «Хӑнам йох! Ма вещкат сӑмән иса тӑм хӑтәԓ унты Турәм йэщаԓт усәм».

2 Турма йир верты ŏх ху Ананий пӑ Павел ԉэпән ԓойты ŏтәта ԓўвеԓ тŏрәп эԓты сэкты партсәԓы.

3 Щишән Павел ԓўвеԓа йастәс: «Турәм нӑӈен секты питԓәԓы, нŏвийа нэрәм хот питар! Нӑӈ, Закон щирән сўтәтты урәӈән омәсԓән, пӑ Закон шŏппи ўшман, мӑнэм сэкты партԓэн».

4 Ванән ԓойәм ŏтәт пӑ йастәсәт: «Хŏты сӑхат нӑӈ Турма йир верты ŏх ху накәлты верәтԓэн?»

5 Павел йастәс: «Хӑнам йох, ма ӑт уйәтсэм, ԓўв Турма йир верты ŏх икийа уԓты верәԓ; хӑшман ӑт уԓԓа: 'Нӑӈ мирэн хŏща кущайа уԓты хŏйат эԓты атма аԓ йаста'».

6 Павел уйәтсәԓԓы, итәт саддукейа усәт, киметәт пӑ - фарисейа, щишән ԓўв синедрион йох пеԓа такан йастәс: «Хӑнам йох, ма фарисей, фарисей пŏх, пӑ ма пӑрәм ŏтәт нŏх ԓыԓәӈԓәты щир пеԓа нŏмәс пŏнмем урәӈән сўтәтԓайәм».

7 Хун пӑ ԓўв щит йастәс, фарисейәт пӑ саддукейәт кўтԓаԓән ўра ворты питсәт, пӑ ӑктәщәм мŏхет кӑтна ортәссәт.

8 Саддукейәт пŏтәртԓәт: ӑнта нŏх ԓыԓәӈԓәты щир, ӑнта ангел, ӑнта ԓыԓ ӑнтом; фарисейәт пӑ тўмеԓ па, тӑмеԓ па ванән тӑйԓыԓаԓ.

9 Щи ԓŏват ун ўв сый тыйәс; щӑԓта тухәԓ фарисейәт эԓты уԓты Закона утәԓтәты икет, нŏх ԓойман, ўра ворԓәт, йастәман: «Нэмәԓты атәм ŏт мўӈ тӑм хŏйат хŏща ӑт уйәтԓув; ԓыԓ мўй пӑ ангел ԓўв пеԓайәԓ пŏтәртыйәс ки, Турәм йэщаԓт уԓты мўӈ ӑт питԓув».

10 Туп ўра ворты верэԓ уна йис, щŏрәс ԉаԉ йох куща пӑԓман, Павел ԓыв лакки аԓ мӑшԓэԓ, ԉаԉ йохәта иԓ ŏхәԓты пӑ ԓыв кўтэԓ эԓты Павел ўты партсәԓы пӑ ԉаԉ йŏх уԓты хота туты партсәԓы.

11 Кимет ат Турәм Куща, ԓўв хŏщайәԓ этман, йастәс: «Павел, аԓ пӑԓа; хŏты нӑӈ Иерусалимән Ма эԓтэм пŏтәртсән, щиты Рим хŏща пŏтәртты па мосәԓ».

12 Аԓәӈсӑхата йўвмаԓ кемән тухәԓ иудейәт нŏмәс версәт пӑ, Павел пӑраттэԓ унты, ӑт ԓэты, ӑт йищты йастатсәт.

13 Йастантәм хŏйат ԋӑԓйаӈ мŏԓтас ус.

14 Ԓыв Турма йир верты ŏх икет пӑ уна уԓты икет хŏща йŏхәтсәт пӑ йастәсәт: «Мўӈ, Павел пӑраттэв унты, нэмәԓты ӑт ԓэты йастатсув.

15 Щиӈәԋща, ин щи нын синедрион пиԓән щŏрәс ԉаԉ йох кущайа хӑԓэвәт Павел нын хŏщайән туты партаԓән, ищи мӑтты нын ԓўв верәԓ йӑмашәк ватты верән уԓ. Мўӈ пӑ, ԓэщатыман уԓԓув пӑ ԓўвеԓ хŏԓна щи тӑхайа йŏхәттаԓ унты, пӑраттԓэв».

16 Щи йастантәм вер эԓты Павел ԓэхуйәԓ, опеԓ пŏх, хуԓәс. Ԓўв ԉаԉ йох уԓты хота йŏхтәс пӑ Павела йастәсԓы.

17 Павел пӑ, сот ԉаԉ йох куща эԓты ит вана вохсәԓы пӑ йастәс: «Тӑм пŏх щŏрәс ԉаԉ йох куща хŏща тўви, ԓўв щи кущайа мŏԓтты йастәты ŏт тӑйәԓ».

18 Щитэн ԓўвеԓ щŏрәс ԉаԉ йох куща хŏща тусԓы пӑ йастәс: «Касна хота опсәм Павел, мӑнэм вана вохман, тӑм пŏх нӑӈ хŏщайэн туты партсәԓы, ԓўв нӑӈена мŏԓтты йастәты ŏт тӑйәԓ».

19 Щŏрәс ԉаԉ йох куща, ԓўвеԓ йошәԓ эԓты катәԓман пӑ ԓўв пиԓәԓән пўӈԓа йирԓәман, иԋщәссәԓы: «Мӑнэм йастәты нӑӈ мўй тӑйԓән?»

20 Ԓўв йŏхԓы йастәс: «Иудейәт нӑӈен партты нŏмәс версәт, нӑӈ хӑԓэвәт Павел синедрион хŏща ким ат этәԓтәсэн, ищи мӑтты ԓыв йӑмашәк ԓўв эԓтэԓ ԓэрапты верэԓ уԓ.

21 Туп нӑӈ ԓывиԓаԓ аԓ хуԓәнта; ԓўвеԓ ԋӑԓйаӈ мŏԓтас хŏйат ԓыв эԓтыԓаԓ ԓомиԓәт, хŏй ӑт ԓэты пӑ ӑт йищты йастатсәт, ԓўвеԓ ӑт веԓтэԓ унты; пӑ ԓыв, нӑӈ йасӈен ԓавәԓман, ин ԓэщатыман уԓԓәт».

22 Щиӈәԋща щŏрәс ԉаԉ йох куща энмәм пŏх эсәԓсәԓы, йастәман: «Нэмәԓты хŏйата аԓ йасты, мӑнэм мўй йастәсән».

23 Щӑԓта, кӑт сот ԉаԉ йох кущайӈән вана вохман, йастәс: «Кӑт сот кўрән шушты, ԓапәтйаӈ ԓовәӈ ԉаԉ йох пӑ кӑтсот ԋоԓәӈ-йухԓәӈ ԉаԉ ху ԓэщататы, атәԓән хуԓәм щос кемән*атәԓән хуԓәм щос кемән - щит мўӈ щирэвән 9 щос йэтән; Кесария воша ат мӑтсәт.

24 Ԓовәт и щиты ԓэщатаԓән, Павел щи опсәԓман, Феликс нэмпи куща хŏща ԓўвеԓ йӑма туты урәӈән».

25 Нэпека па щимәщ айкеԓ хӑншәс:

26 «Клавдий Лисий эԓты ԓӑтәӈ куща Феликс икийа. Ўща уԓа.

27 Иудейәт тӑм хŏйат ԋӑрэмәсэԓ пӑ веԓты ўтщисэԓ; ма ԉаԉ йохԓам пиԓән йŏхәтсәм пӑ ԓўвеԓ нŏх ӑратысэм, ԓўв Рим хŏйата уԓты верәԓ мŏштәмэм пӑтыйән.

28 Йухәт, ԓэрапты ԓӑӈхатэм урәӈән, мўй хŏща ԓўв нўрәӈа айәԓса, ԓўвеԓ ԓыв синедрионэԓа тусэм.

29 Ма ŏша пайәтсэм, ԓыв законэԓ хŏща ўрайа хойәм нŏпсәт урәӈән ԓўв нўрәӈа айәԓԓа, туп нэмәԓтты нўр сŏрәм пӑ касна хот кеша ԓўв хŏщайәԓ ӑт уйәтсәм.

30 Туп ма хŏщайэм иудейәт тӑм хŏйат пеԓа атәм нŏмәс верты айкеԓэԓ йŏхтәс, ма ԓўвеԓ мŏхты нӑӈ хŏщайэн китсэм, нўр туты ŏтәта па ԓўв пеԓайәԓа нӑӈ хŏщайэн пŏтәртты партсәԓам. Тўмтака уԓа».

31 Щиӈәԋща, ԉаԉ йохәт, тӑм ԓўв партәм щирәԓ хўватән, Павел ўйман, атәԓән Антипатрида воша тусэԓ.

32 Кимет хӑтәԓ пӑ, ԓовәӈ ԉаԉ йохәта ԓўв пиԓәԓән мӑнты миймеԓ кемән, ԉӑԉ йох уԓты хотэԓа йŏхԓы керԓәсәт.

33 Ԉаԉ йох пӑ, Кесария воша йŏхәтмеԓ пӑ айкеԓәӈ нэпек куща икийа миймеԓ кемән, Павел па ԓўвеԓа мӑсэԓ.

34 Куща ики, айкеԓәӈ нэпек ԓуӈәтмаԓ йўпийән, иԋщәссәԓы, мӑты мўв щуӈ эԓты ԓўв уԓ. Павел Киликия эԓты уԓты мŏштәмаԓ кемән, йастәс:

35 «Ма нӑӈен щи пŏрайән хуԓәтԓэм, хун нўр туты ŏтԓан йŏхәтԓәт». Пӑ ԓўвеԓ Ирод хŏт шикийән, ԉаԉ йохән эԓт тӑйман, уԓты партсәԓы.