1 Вет хӑтәԓ хӑщәм йўпийән, Турма йир верты ŏх ху Анания ун икет пиԓән пӑ Тертулл, законәт уйәтты ху*законәт уйәтты ху - щит Рим хŏйатәт хŏща уԓәпса мŏрт (закон) уйәтты хŏйат, сўт вертыйән вер ӑратыты мўй пӑ вер кӑшты, туса пŏтәртты ху;, пиԓән Кесарияйа йŏхтәс. Ԓыв куща икийа йастәсәт, мўй урәӈән Павел нўрмәԓтты питԓэԓ.

2 Хун пӑ Павел тŏхи ԓŏӈәԓтса, Тертулл ԓўв нўрәԓ аԉты питсәԓы, пŏтәртман:

3 «Иса пӑ кашәӈ тӑхайән кӑмән хŏрпи йӑм щирән мўӈ вана ўԓэв, мўӈ пайԓы уԓәпсайэв урәӈән нӑӈена, ԓӑтәӈ куща Феликс, пумащипа йастәты мўӈ верэв уԓ, пӑ тӑм мир йӑм, так уԓәпса нӑӈ ŏшәӈа парттэн хўватән уԓ.

4 Туп, нӑӈен шек ӑт ат тŏрастәты урәӈән, ма нӑӈен сӑмәӈ вер хўватэнән мўӈев йэша тӑхты хуԓәтты пŏйәкԓэм.

5 Мўӈ тӑм хŏйат рома уԓты щир ԓыԓәтты ŏта ԓўӈәтԓэв, ԓўв - иудейәт кўтән керәтман мўв ԓŏватән йэшащты вер пеԓа ŏх ху. Ԓўв Назарет эԓты уԓты Иисус ӑт рӑхты утәԓтәпса пеԓа уԓты ŏх ху,

6 хŏй хŏԓна Турәм Хот щопитты ўтщисԓы, мўӈ ԓўвеԓ катәԓсэв пӑ мўӈ Законэв хўватән сўтәтты ўтщисэв.

7 Туп щŏрәс ԉаԉ йох куща Лисий, йŏхтәс пӑ йур вевән ԓўвеԓ мўӈ йошев эԓты ўсԓы пӑ нӑӈ хŏщайэн китсәԓы,

8 мўӈева, ԓўвеԓ нўрәӈа айәԓтты ŏтәта, па нӑӈ хŏщайэн мӑнты партсәԓы. Хун нӑӈ ԓўвеԓ иԋщәсԓэн, наӈ щи мўй эԓты иса уйәтԓэн, мўй хŏща мўӈ ԓўвеԓ нўрәӈа тӑйԓэв».

9 Щӑԓта иудейәт па йастәсәт, мӑтты щит щиты.

10 Павел пӑ, хун куща ики ԓўвеԓа пŏтәртты щира пос аԉәс, йŏхԓы йастәс: «Уйәтԓэм, нӑӈ ар тӑԓ-ԓўӈ вещкат щирән тӑм мир сўтәтԓән, ма ԓӑрпайа ма верэм ӑратыты питԓэм.

11 Нӑӈ ԓэрапты верәтԓэн, ма Иерусалима Турәм ишәкты урәӈән йŏхәтмем, кӑтхŏщйаӈ кем хӑтԓа йис.

12 Ӑнта Турәм Хотән, ӑнта иудейәт пойәкщәты хотән, ӑнта вош ԓŏватән ԓыв мӑнэм ўра ворман мўй пӑ мир йэшащты пеԓа хущман, ӑт уйтыԓысэԓ,

13 пӑ щит аԉты ӑт верәтԓәт, мўй хŏща мӑнэм ин нўрмәԓԓәт.

14 Туп щи хŏща нӑӈен эԓпа йастәԓэм, утәԓтәпса хўват, мўй ԓыв ӑт рӑхты щира айәԓԓэԓ, йӑна ма ащиԓам Турма верәт верԓәм, иса щитәта эвәԓман, мўй Законән пӑ Турәм айкеԓ туты хŏйатәт нэпекәт хŏща хӑшман уԓԓа,

15 Турма нŏмәс пŏнман тӑйԓәм, пӑрәм ŏтәт, вещкат пӑ ӑнта вещкат ŏтәт нŏх ԓыԓәӈԓәты вер питәԓ, мўй ԓыв па ԓавәԓԓәт.

16 Щишән ма па ўратԓәм, Турәм пӑ хŏйатәт хŏща ма ԓыпем иса сыстам ат ус.

17 Ар тӑԓ хӑщәм йўпийән, ма мирэма меԓащ мӑты пӑ Турма йир туты урәӈән, ма Иерусалима йŏхәтсәм.

18 Ма Турәм Хотән уйәтсайәм, хун ма сыстамтыты верәт версәм, пӑ щита нэмәԓты мир пӑ йэшащты сый уԓмаԓ ӑнтом.

19 Щит тухәԓ Асия мўвәӈ иудейәт усәт, хŏйтата наӈ йэщаԓтэн ԓойты пӑ мӑнэм нўрмәԓтты мосәс, ма пеԓайэм мŏԓты тӑйԓәт ки.

20 Мўй пӑ щитәт ат йастәԓәт, хун ма синедрион йэщаԓт ԓоймемән, мўй хŏрпи нўр ԓыв ма хŏщайэм уйәтсәт,

21 мосәӈ, ма туп щита нўр тӑйԓәм, синедрион хŏща ўваԓтсәм: 'Ма тӑм хӑтәԓ нын йэщаԓтән, пӑрәм ŏтәт нŏх ԓыԓәӈԓәты вер пеԓа нŏмәс пŏнтэм урәӈән, сўтәтԓайәм?'»

22 Щит хуԓәтмаԓ йўпийән, Феликс, щи Йуш эԓты тŏрԓы уйәтман, ԓыв верэԓ йэԓшәк хӑтәԓтәсԓы, йастәс: «Нын верән ватԓэм, хун щŏрәс ԉаԉ йох куща Лисий йŏхәтәԓ».

23 Ԓўв сот ԉаԉ йох кущайа Павел эԓт тӑйты партсәԓы, туп ԓўвеԓа йэрмат щир верты пӑ ԓухәсԓаԓа ԓўвеԓа мосты верәт верты мўй пӑ йŏхтыԓыты, йэртԓыты ӑт эсәԓсәԓы.

24 Кӑмәтса хӑтәԓ йўпийән Феликс, Друзилла ийимеԓ, иудей нэ, пиԓән йŏхәтмаԓ кемән, Павел вохсәԓы, пӑ Иисуса Христоса эвәԓты вер эԓты хуԓәнтәс.

25 Пӑ хун ԓўв вещкат вер эԓты, йŏхи шаващты вер эԓты пӑ йиты Турәм сўт эԓты пŏтәртәс, Феликс пӑԉщәмән йŏхәтса пӑ йастәс: «Ин мӑна, хун пӑ кум шитԓәм, нӑӈен вохԓэм».

26 Ԓўв ищи кўт нумәсәс, эсәԓты урәӈән, Павел ԓўвеԓа ŏх мӑԓ: щишән ван кўтԓы ԓўвеԓ вана туты партыԓысԓы пӑ ԓўв пиԓәԓән пŏтрэмәс.

27 Туп кӑт тӑԓ хӑщәм кемән, Феликс рупитәм тӑхайа Порций Фест йŏхтәс, иудейәта йӑм верты урәӈән, Феликс Павел касна хотән хӑйсәԓы.