1 Abaho Mndewa Imulungu kamulongela Musa kuluwala lwa Sinai mna umwezi wa ichanduso muumwaka wa kabili toka viwasegele mwiisi ya Misili, kalonga, 2 “Waizilaeli waideng'helele nyimwilinyimwili ya Pasaka mna ikipindi kikigwe. 3 Nyimwilinyimwili ayo yokuwa siku ya longo na nne muumwezi uno na wakweleleze malagizo gake.”

4 Avo, Musa kawalongela Waizilaeli kamba olondigwa waideng'helele nyimwilinyimwili ayo ya Pasaka. 5 Avo, waideng'helela nyimwilinyimwili ayo ya Pasaka kuluwala lwa Sinai mna isiku ya longo na nne mna umwezi wa ichanduso. Waizilaeli watenda kila kinhu kamba Mndewa Imulungu viyamulagize Musa.

6 Lakini wanhu wayagwe wakalile kuko hawadahile kuideng'helela nyimwilinyimwili ayo ya Pasaka, kwavija wakala wakwasile maiti, avo wafita. Wanhu awo wamcholela Musa na Haluni, 7 wawalongela, “Siye tufita kwavija tukwasa maiti, avo habali togomesigwa kumulavila Mndewa Imulungu nhosa zake mna ikipindi kikigwe hamoja na Waizilaeli wayagwe?”

8 Musa kawedika, “Beteni mbaka vonda nipate malagizo ga mbuli yenu kulawa kwa Mndewa Imulungu.”

9 Na Mndewa Imulungu kamulongela Musa, 10 “Walongele Waizilaeli, ‘Imoja wenu hebu munhu wa ulelo wenu yahakuwa kafita mbuli ya kukwasa maiti hebu kamnzila mmwanza, lakini kolonda kuideng'helela nyimwilinyimwili ya Pasaka, 11 munhu ayo kodaha kuideng'helela mna isiku ya longo na nne ya mwezi wa kabili. Yaideng'helele kwa kuja nyama ya ng'hondolo na magate hagageligwe hamila na mboga zili usungu. 12 Sikuwasigase kinhu chochose mbaka imitondo vivija sikuwabene zege jojose da ing'hondolo wa Pasaka na waideng'helele Pasaka kamba malagizo gake vigolonga. 13 Lakini munhu yoyose yong'ala hebu heli mmwanza, yahaleka kuideng'helela nyimwilinyimwili ya Pasaka, yabaguligwe na wanhu zake kwavija hanilavile nhosa mna ikipindi kikigwe. Kolondigwa yatagusigwe kwa nzambi yake.

14 “ ‘Kamba kuna munhu baki kokala kumwenu na kolonda kuideng'helela nyimwilinyimwili ya Pasaka, kolondigwa yatende kamba malagizo ga Pasaka vigolonda. Kila munhu kolondigwa yakweleleze malagizo gano, yawe munhu baki hebu mwenekae.’ ”

15 Siku vidisimikigwe dihema ding'alile, wingu dihumuluka na kudigubika dihema. Ikilo mbaka imitondo wingu dijo joneka kamba moto. 16 Vivo viikalile kila siku, imisi wingu digubika dihema na ikilo joneka kamba moto. 17 Wingu dijo dahasegelaga uchanha ya dihema, Waizilaeli otula ng'hambi yao na okwika ng'hambi kabili hanhu kudili wingu dijo. 18 Waizilaeli wasegela kwa kulagizwa na Mndewa Imulungu na vivija weka ng'hambi kwa kulagizwa na Mndewa Imulungu. Kipindi chose wingu dijo vidikala uchanha ya dihema wanhu wakala mwiing'hambi ayo. 19 Kamba wingu dijo dikala uchanha ya dihema kwa siku nyingi, Waizilaeli wamtegeleza Mndewa Imulungu na hawasegele bule. 20 Kipindi kiyagwe wingu dijo dikala uchanha ya dihema kwa siku ndodo, lakini Waizilaeli wakalile mwiing'hambi wasegela kamba Mndewa Imulungu viyalagize. 21 Kipindi kiyagwe wingu dikala uchanha ya dihema kulawa ichungulo mbaka imitondo, na vidisegesigwe wagendelela na mwanza. Na kamba wingu dikala uchanha ya dihema imisi yose na kilo kigima, dahasegesigwa na hewo osonga kusegela. 22 Kamba wingu dahakala uchanha ya dihema kwa siku mbili hebu mwezi umoja hebu mwaka, Waizilaeli osigala mna ing'hambi, lakini dahasegesigwa na hewo vivija osegela. 23 Kwa kulagizwa na Mndewa Imulungu Waizilaeli weka ng'hambi na kwa kulagizwa na Mndewa Imulungu wagendelela na mwanza. Wagagoga malagizo ga Mndewa Imulungu kamba viyalagize kubitila Musa.