1 Mndewa imoja Mkanaani wa Aladi, yakalile ako Negebu viyajuwile kamba Waizilaeli wakala okwiza kubitila nzila ya Atalimu, kachola kuwavamila na wanhu wayagwe kawagoga. 2 Avo Waizilaeli waiduwila kwa Mndewa Imulungu walonga, “Kamba wahawagela wanhu wano mmakono getu, avo togananga mabuga gao.” 3 Mndewa Imulungu kawatendela kamba viwapulile, kawatenda Wakanaani wahumwe. Waizilaeli wawakoma Wakanaani wose, hamoja na mabuga gao. Avo hanhu aho hakemigwa Holima.*Kwa Kiebulania Holima fambulo jake kubanangigwa.

4 Waizilaeli wagendelela na mwanza kulawa kulugongo lwa Holi wabitila nzila ilongoza kuna ibahali ya Shamu ili waizunguluke isi ya Edomu. Lakini mnzila wanhu wadonha kugendelela na umwanza. 5 Avo wasonga kumuyalalila Mndewa Imulungu na Musa, walonga, “Habali mutulava Misili ili tufile hano kuluwala? Hano haduhu ndiya iyagwe wala mazi ga kung'wa, na tudonha kuja ndiya ino ihile.”

6 Baho Mndewa Imulungu kagala mizoka ikalile na sumu na iwaluma iwanhu, na Waizilaeli wengi wafa. 7 Avo, wanhu wamcholela Musa, wamulongela, “Tutenda nzambi tumuyalalila Mndewa Imulungu na gweye vivija. Mpule Mndewa Imulungu yatusegesele imizoka ino.” Avo Musa kawapulila iwanhu kwa Mndewa Imulungu. 8 Avo, Mndewa Imulungu kamulongela Musa, “Tenda zoka da shaba, udinanike mdibiki. Munhu yoyose yonda yalumigwe na zoka, yahadilola ajo dizoka da shaba kohona.” 9 Avo Musa katenda zoka da shaba kadinanika mdibiki. Kila munhu yalumigwe na zoka viyadilolile ajo dizoka da shaba kahona.

10 Avo Waizilaeli wagendelela na mwanza wao na weka ng'hambi yao ako Oboti. 11 Kulawa ako wachola mbaka Iye Abalimu, kuluwala mwambu wa kudilawila zuwa, ako Moabu. 12 Kulawa ako wachola na weka ng'hambi yao kubonde da Zeledi. 13 Kulawa ako wachola na weka ng'hambi yao kuluwala mwambu wa kasikazini ya lwanda lwa Alinoni, awo uluwala lugendelela mbaka mwiisi ya Waamoli. Lwanda lwa Alinoni awo ukalile imbaka ya Wamoabu na Waamoli. 14 Lekaavo yandikigwa mna ikitabu cha ng'hondo za Mndewa Imulungu,

16 Kulawa kuko Waizilaeli wachola mbaka Beeli, ako kuna ikisima Mndewa Imulungu kiyamulongele Musa, yawating'hanize iwanhu na heyo kowagwaa mazi. 17 Aho Waizilaeli wemba lwila luno,

Kulawa kuluwala wachola mbaka Matana, 19 kulawa Matana mbaka Nahalieli, kulawa Nahalieli mbaka Bamoti, 20 na kulawa Bamoti mbaka kubonde dili Moabu kuna inhembeti ya lugongo lwa Pisiga, luilola na uluwala.

21 Waizilaeli wamgalila mndewa Sihoni wa Waamoli usenga uno, 22 “Ututogolele tubite mwiisi yako, honda tubite mna imigunda yako ya ndiya, na migunda ya mizabibu na hatung'wa mazi ga visima venu, tobita mna inzila ya mndewa mbaka vonda tubite mwiisi yako.” 23 Lakini Sihoni hawatogolele Waizilaeli wabite mwiisi yake. Kawating'haniza wakalizi wake, kachola kuluwala ako Yahasa kawavamila Waizilaeli. 24 Lakini Waizilaeli wamkoma, waisola isi ayo kulawa hana ulwanda lwa Alinoni mbaka lwanda lwa Yaboki, aho hana imbaka ya isi ya Waamoni, aho hokalizigwa ng'hani. 25 Waizilaeli wagasola mabuga ago gose ga Waamoli na vivija wadisola dibuga dikulu da Heshiboni na ivijiji vake vose. 26 Heshiboni dikala buga kulu da mndewa Sihoni wa Waamoli, ayo aho umwaka kaitowa na mndewa wa Moabu yakalile yalongole na kaisola isi ayo yose mbaka lwanda lwa Alinoni. 27 Lekaavo iwanhu okwimba lwila luno,

31 Avo Waizilaeli wakala mwiisi ya Waamoli. 32 Abaho Musa kawatuma wanhu wachole wakadisungulile buga da Yazeli. Avo wadivamila na kudisola buga ajo, wawawinga Waamoli wakalile mumo.

33 Abaho Waizilaeli wahindula na wagoga inzila ichola Bashani. Mndewa Ogu wa ako Bashani kachola na iwakalizi wake ili wawavamile ako kudibuga da Edilei. 34 Lakini Mndewa Imulungu kamulongela Musa, “Sikuumdumbe kwavija nimgela mmakono gako, heyo hamoja na iwakalizi wake na isi yake yose. Komtendela kamba viumtendele Sihoni, imndewa wa Waamoli, ayo yakalile ako Heshiboni.” 35 Avo Waizilaeli wamkoma Ogu hamoja na wanage na iwakalizi wake wose, hawamulekile hata munhu imoja, abaho waisola isi yake.