1 Waizilaeli wagendelela na mwanza na weka ng'hambi yao kudibawe da Moabu, mwambu wa kudilawilila zuwa wa lwanda lwa Yolidani, uilola na buga da Yeliko dikalile umwambu wa ulwanda.

2 Mndewa Balaki mwanage Sipoli, kagajuwa gose Waizilaeli gawawatendele Waamoli. 3 Avo heyo hamoja na Wamoabu wawadumba ng'hani Waizilaeli, kwavija Waizilaeli wakala wengi ng'hani. 4 Avo Wamoabu wawalongela vilongozi wa Midiani, “Lunhu luno sambi baha lonanga kila kinhu kituzunguluke kamba ng'ombe mbigalo viyoja mijani mmigunda.” Avo Balaki mwanage Sipoli ayo yakalile mndewa wa Moabu kipindi acho, 5 kamtumila usenga Balaamu mwanage Beoli ako Petoli, behi na lwanda lwa Fulate, mwiisi ya Amawi. Kamulongela vino, “Hana wanhu walawile mwiisi ya Misili, wanhu awo wenela kila hanhu mwiisi na vivija olonda kuniboka isi yangu. 6 Avo wize uniduwilizile wanhu wano kwavija wana nguvu kubanza niye. Sengine nodaha kuwahuma na kuwawinga sikuwengile mwiisi yangu, kwavija nokujuwa, gweye wahamtambikila munhu, munhu ayo kotambikilwa na wahamduwila munhu, munhu ayo koduwiligwa.”

7 Avo vilongozi wa Moabu na Midiani wasola sente zilondigwa mbuli ya kuduwiliza, wasegela wachola kwa Balaamu. Viwavikile wamgwaa Balaamu usenga wa Balaki.

8 Balaamu kawalongela, “Kilo cha lelo muwase baha, na niye nowalongela gaja gonda yanongele Mndewa Imulungu.” Avo awo iwavele wa Moabu wakala na Balaamu.

9 Abaho Imulungu kamwidika Balaamu, kamuuza, “Awano kina nani iwokala na gweye?”

10 Balaamu kamwidika Mndewa Imulungu, “Balaki mwanage Sipoli, mndewa wa Moabu, kanigalila usenga kamba, 11 hana wanhu walawa Misili, na hewo wenela kila hanhu mwiisi. Kanipula nichole nikawaduwile wanhu awo ili yadahe kuwatowa na kuwawinga.”

12 Mndewa Imulungu kamulongela Balaamu, “Sikuuchole hamoja na iwanhu wano na sikuuwaduwile wanhu awo kwavija wanhu awo watambikiligwa.”

13 Avo, imitondo Balaamu kalamuka, kawacholela awo ivilongozi wa Balaki kawalongela, “Bweleni mwiisi yenu, kwavija Mndewa Imulungu kangomesa kuchola na mweye.” 14 Avo awo ivilongozi wa Moabu walawanya, wabwela kwa Balaki wamulongela, “Balaamu kalema kwiza na siye.”

15 Abaho, Balaki kawatuma vilongozi wayagwe, wakala wengi ng'hani na wakala na ukulu kubanza awo walongole. 16 Hewo wavika kwa Balaamu wamulongela, “Balaki mwanage Sipoli kolonga vino, ‘Sikuutogole kinhu chochose kikukimile uleke kwiza kumwangu! 17 Niye nokugwaa vinhu vingi, na nokutendela kinhu chochose chonda unipule. Wize uwaduwile wanhu wano.’ ”

18 Lakini Balaamu kawedika awo iwanhu wa Balaki, “Hata kamba Balaki yahanigwelela ng'anda yake kuno imema sente na zahabu, niye sidaha kubena lagizo da Mndewa Imulungu, Imulungu wangu, kwa mbuli ndodo hebu ng'hulu. 19 Lakini chonde muwase baha kilo cha lelo kamba waja waenu walongole, ili nijuwe gaja gonda yanongele kabili Mndewa Imulungu.” 20 Avo, kilo acho Mndewa Imulungu kamwidika Balaamu kamulongela, “Kamba awo weza kukukema, chola nao, lakini utende gaja gaiyeka gonda nikulongele.” 21 Balaamu kalamuka imitondo kamtanda kihongwe wake kachola na awo ivilongozi.

22 Mndewa Imulungu kamgevuzikila Balaamu kwavija kachola na iwanhu awo, avo msenga wa Mndewa Imulungu kamkimila mnzila kipindi acho Balaamu kakala yakwelile kihongwe wake na iwasang'hanaji wake wakala na heyo. 23 Avo, ikihongwe viyamone msenga ayo wa Mndewa Imulungu kema mnzila kuno kagoga sime, kaleka inzila kabita kumgwazo. Balaamu kamtowa ayo ikihongwe kambweza mnzila.

24 Abaho msenga ayo wa Mndewa Imulungu kalongola, kema hanhu hana inzila sisili, hagati ya migunda ya mizabibu na kukala na senyenge ya mabwe ukudila na ukumoso. 25 Kihongwe viyamone msenga ayo wa Mndewa Imulungu, kaibwanha kuna uluwa na mgulu wa Balaamu ukwatuligwa aho hauluwa. Avo, Balaamu kamtowa kabili ayo ikihongwe.

26 Abaho msenga ayo wa Mndewa Imulungu kalongola kabili, kema hanhu hasisili, aho hudaha kubita ukudila hebu ukumoso. 27 Ayo ikihongwe viyamone msenga ayo wa Mndewa Imulungu kema aho, kawasa hasi. Balaamu kagevuzika, kamtowa kwa fimbo yake. 28 Abaho Mndewa Imulungu kamtenda ayo ikihongwe yalonge, kamulongela Balaamu, “Nikutendela choni mbaka kunitowa miyanza midatu?”

29 Balaamu kamulongela ayo ikihongwe, “Gweye kunitenda nambozi! Maza ng'halile na sime nahakukomile sambi baha.”

30 Ikihongwe kamulongela Balaamu, “Niye ayo ikihongwe wako iija, nikupapaga siku zose mbaka lelo, lini nikutendela kamba vino?” Balaamu kedika, “Aka.”

31 Baho Mndewa Imulungu kagagubula meso ga Balaamu na heyo kamona msenga wa Mndewa Imulungu kema mnzila, kuno kagoga sime. Balaamu kaibwanha hasi kingubanguba. 32 Msenga ayo wa Mndewa Imulungu, kamulongela Balaamu, “Habali kumtowa kihongwe wako miyanza midatu? Niye niza kukukimila, kwavija hulondigwa uchole kuko. 33 Kihongwe wako kanyona, na kainega miyanza yose midatu. Maza hainegile nahakukomile gweye, na ikihongwe ino nahamulekile mgima.” 34 Balaamu kamulongela msenga ayo wa Mndewa Imulungu, “Nitenda nzambi kwavija sijuwile kamba kwima mnzila kunikimila. Avo sambi kamba gweye hulonda nigendelele na mwanza uno, avo nobwela ukae.” 35 Msenga ayo wa Mndewa Imulungu kamulongela Balaamu, “Chola na iwanhu wano, lakini ulonge gaja gaiyeka gonda nikulongele.” Avo Balaamu kagendelela na umwanza hamoja na ivilongozi wa Balaki.

36 Balaki viyahulike kamba Balaamu kamnzila kokwiza, kachola kumbokela kudibuga da Ali, buga dijo dikala mwiingema ya lwanda lwa Alinoni kuna imbaka ya Moabu. 37 Balaki kamulongela Balaamu, “Habali hawizile kumwangu vinikukemile? Vino gweye kugelegeza sidaha bule kukugwaa vinhu vingi?”

38 Balaamu kamwidika Balaki, “Sambi niza kumwako! Vino niye nodaha kulonga mbuli yoyose inilonda? Mbuli yonda yanongele Imulungu ayo yonda nonge.”

39 Avo, Balaamu kachola hamoja na Balaki wavika kudibuga da Kiliati Husoti. 40 Ako Balaki kalava nhosa ya ng'ombe na ng'hondolo, kawagwaa inyama iyagwe Balaamu na awo ivilongozi wakalile hamoja na heyo.

41 Imitondo Balaki kamsola Balaamu, kakwela na heyo mbaka Bamoti Baali, kuko Balaamu kadaha kuwona Waizilaeli wayagwe.