1 Mwana yeli na ubala kotegeleza malagizo ga tatake,

lakini yeli na bezi hategeleza viyozumigwa.

2 Munhu yanogile koja ganogile gake kulawa mmulomo wake,

lakini mvizi kokala muusede.

3 Munhu yokaliza mulomo wake kokaliza ugima wake,

lakini mulopo koibananga mwenyego.

4 Mnyeke kosulukila lakini honda yapate kinhu chochose,

lakini yoiyoha koneneha.

5 Yeli na haki kowihila uvizi,

lakini munhu yehile kosang'hana kwa kinyala na bezeli.

6 Haki yomkaliza munhu yosang'hana ganogile,

lakini gehile gomgwisa munhu yeli na nzambi.

7 Munhu imoja koitenda mgoli kumbe kabule kinhu,

na munhu iyagwe koitenda mkiwa kumbe mgoli.

8 Munhu tajili kolondeka kuliha kwa ugoli wake kukaliza ugima wake,

lakini munhu mkiwa hahulika dumbizo.

9 Yeli na haki kong'ala kamba taa,

lakini wasang'hana gehile kamba taa izimika.

10 Kibuli chogala ndwagi,

lakini ubala okala na wanhu waja olonda magesa.

11 Ugoli wa himahima osegela,

lakini yozahila mholemhole kokwengezelwa.

12 Tamanilo hadina vikizwa dolumiza moyo,

lakini tamanilo divikizwe dogala deng'ho.

13 Yobezeli mafundizo koibananga mwenyego,

lakini yogatogola malagizo kogweleligwa nhunza.

14 Mafundizo ga munhu yeli na ubala ayo nzasa ya ugima,

gomtenda munhu yakale kutali na mtego wa ifa.

15 Nzewele zogala kutogoligwa,

lakini nzila ya wasang'hana gehile ya madununzo.

16 Munhu mbala kosang'hana kila kinhu kwa kugelegeza goya,

lakini mbozi kowanzanza ubozi wake.

17 Msenga yehile kowagela wanhu mmagazo,

lakini msenga yanogile kogala tindiwalo.

18 Ukiwa na kinyala vompata ija yogalema mafundizo,

lakini ija yotogola kuzumigwa kotogoligwa.

19 Kupata gaja gousulukila koudeng'heza moyo,

avo wabozi ogevuzika kuinega na gehile.

20 Yoilumba na mbala na heyo kokuwa mbala,

lakini yoilumba na wabozi kolumila.

21 Wene nzambi opata mikubulo,

lakini weli na haki opata ganogile.

22 Munhu yanogile kowalekela uhazi unogile ulelo wake,

lakini ugoli wa wene nzambi wekiligwa weli na haki.

23 Mgunda wa mkiwa odaha kulela ndiya nyingi,

lakini wanhu wazulumati osegesa ndiya yose.

24 Yoleka kumzuma mwanage kwa mbalati hamnogela,

lakini yomnogela mwanage komzuma.

25 Yeli na haki kana ndiya ya kumwenela,

lakini munda wa munhu yehile ogaya kwa nzala.