1 Mtwanzi mbala koigangamiza ng'anda yake,

lakini mtwanzi mbozi koibomola kwa makono gake mwenyego.

2 Yogenda mnzila igoloke komdumba Mndewa Imulungu,

lakini waja okweleleza nzila ihile ombezeli Imulungu.

3 Mbozi kokobozigwa kwa mbuli zake za kuitapa,

lakini yeli na ubala kokalizigwa na mbuli zake.

4 Kamba habule ng'ombe wa kulimila kuduhu ndiya nyingi,

ndiya nyingi yopatikana kwa nguvu za ng'ombe wa kulimila.

5 Msindila yotamaniligwa halonga uvizi,

lakini msindila hatamaniligwa kolonga uvizi.

6 Yeli na bezi kouzahila ubala na honda yaupate bule,

lakini yeli na nzewele kopata kutanga vinhu kwa kubuha.

7 Segela himahima hanhu hayeli mbozi,

kwavija kabule mbuli za kutanga vinhu.

8 Nzewele za munhu mbala zomgwaa kutanga goya nzila yake,

lakini ubozi wa wabozi owavizila mwenyego.

9 Wabozi oideng'helela nzambi,

lakini wanhu weli na haki onogeligwa na Imulungu.

10 Moyo otanga usungu wake wenyego,

mgeni hadaha kuilumba na deng'ho jake.

11 Ng'anda ya munhu yosang'hana gehile yobomoligwa,

lakini kibanda cha munhu yeli na haki chogangamizwa.

12 Hana nzila yokoneka kamba inoga kwa munhu,

lakini kuuhelelo yolongoza mwiiifa.

13 Kunyunyuwala kodaha kufisigwa kwa daba,

dahesha deng'ho kokwiza kunyunyuwala.

14 Munhu yohinduka mnzila ihile kopata matunda ga nzila zake,

na munhu yanogile kopata matunda kwa mbuli zake.

15 Zozolo kotogola kila mbuli yonda yalongeligwe,

lakini mbala kogelegeza viyochola.

16 Yeli na ubala koiteganya na koinega kutali na gehile,

lakini zozolo hagelegeza na koitapa.

17 Yogundumuka himahima kosang'hana ubozi,

na munhu yopanga gehile kokwihiligwa.

18 Mizozolo ohazi ubozi,

lakini wabala ogweleligwa taji da kutanga vinhu.

19 Wanhu osang'hana gehile ofugama kuulongozi wa wanhu wanogile,

na wanhu wehile ofugama hana imilango ya wene haki.

20 Mkiwa kokwihiligwa hata na wayage,

lakini tajili kana mbwiga wengi.

21 Yombezeli miyage kana nzambi,

lakini kamweda munhu yomgesa mkiwa.

22 Yoitanda kusang'hana gehile ayo kobananga,

Waja oitanda kusang'hana ganogile obokela unogelo hawishaga na kutamanilwa.

23 Kuiyoha mna ikila sang'hano kogala kumweda,

lakini lomo mtindi dogala ukiwa.

24 Ugoli dijo taji da weli na ubala,

lakini ubozi acho kikumbi cha wabozi.

25 Msindila wa ukweli koukombola ugima,

lakini mulonga uvizi koviza.

26 Yomdumba Mndewa Imulungu kana tamanilo ditelele,

na wanage okuwa na hanhu ha kukimbilila.

27 Kumdumba Mndewa Imulungu ayo nzasa ya ugima,

yonda imuhonye munhu na mitego ya ifa.

28 Ukulu wa mndewa awo wingi wa wanhu zake,

lakini bila wanhu utawala obanangika.

29 Munhu yoleka kugevuzika himahima kotanga goya,

yogevuzika himahima kolagusa ubozi.

30 Tindiwalo muumoyo domgwaa munhu ugima,

lakini migongo yoja mizege.

31 Yombezeli mkiwa komuliga yamulumbile,

lakini munhu yomonela bazi ngaengae komtogola Imulungu.

32 Yosang'hana gehile konangigwa na gehile gake,

lakini yeli na haki kana hanhu ha kukimbilila mwiiifa yake.

33 Ubala okala kwa munhu mwene nzewele,

lakini yamwabule muumoyo wa mbozi.

34 Haki yoigwaa ukulu isi,

lakini nzambi makungu kwa isi.

35 Mndewa konogezwa na msang'hanaji yosang'hana kwa nzewele,

lakini ng'hasiliki yake yowapata wanhu ogala kinyala.