1 Ng'hasiliki yokwisha, kwa kwidika kwa uhole,

lakini mbuli ilumiza yogala ng'hasiliki.

2 Lulimi lwa munhu yeli na ubala lolonga goya mbuli za kutanga vinhu,

lakini kulawa mmulomo wa munhu mbozi kokwita ubozi.

3 Meso ga Mndewa Imulungu golola kila kinhu,

gomulola munhu yanogile na yehile.

4 Lulimi luhole chanduso cha ugima,

lakini lulimi lwihile lonanga moyo.

5 Mbozi kobezeli kuzumwa na tatake,

lakini yotogola kuzumigwa mbala.

6 Mng'anda ya munhu yeli na haki mna ugoli mwingi,

lakini vinhu va wanhu osang'hana gehile vogala madununzo.

7 Milomo ya wene ubala yobwililisa kutanga vinhu,

lakini mizoyo ya wabozi haili vivo bule.

8 Nhosa za wasang'hana gehile, ngevuzo kwa Mndewa Imulungu,

lakini kupula kwa munhu yeli na haki ajo deng'ho da Imulungu.

9 Nzila za wasang'hana gehile, ngevuzo kwa Mndewa Imulungu,

lakini Imulungu kowanogela waja okweleleza haki.

10 Nhaguso ng'hulu ikigwa mbuli ya waja oleka nzila igoloke,

munhu yogevuzika mbuli ya kuzumwa kofa.

11 Kamba Mndewa Imulungu kogatanga geli Kuzimu na Kuubananzi,

vino koleka kugatanga geli mmizoyo ya wanhu?

12 Yeli na bezi halonda kuzumigwa,

halonda kuifunza kwa wene ubala.

13 Moyo uli na deng'ho okitenda kihanga kisamhuke,

lakini usungu olumiza loho.

14 Moyo wa munhu mwene nzewele ozahila kutanga vinhu,

lakini mulomo wa mbozi oja ubozi.

15 Munhu yodununzigwa kila siku kumwake iha,

lakini kwa yeli na deng'ho kila siku nyimwilinyimwili.

16 Vinoga kuwa na vinhu kidogo kuno komdumba Mndewa Imulungu,

kubanza kuwa na vinhu vingi kuno kodununzika.

17 Vinoga kuja ndiya mwanza umoja na sunga hanhu kuli na unogelwa,

kubanza nyimwilinyimwili ya ng'ombe yanonile kuno moihila.

18 Munhu yogevuzika himahima kogala ndwagi,

lakini yoleka kugevuzika himahima kolamula ndwagi.

19 Nzila ya mnyeke imema miba,

lakini nzila ya munhu yosang'hana ganogile ng'hulu.

20 Mwana yeli na ubala komgwaa deng'ho tatake,

lakini mbozi kombezeli mamake.

21 Ubozi deng'ho kwa munhu hagelegeza goya,

lakini munhu yotanga goya kosagula nzila igoloke.

22 Mipango yonangika kwa kuswela magesa,

lakini magesa ga wanhu wengi govikiza mipango.

23 Kwidika goya kogala deng'ho,

mbuli ilongigwa mkipindi chake yofaya!

24 Nzila ya mwene nzewele yolozela uchanha kuli na ugima,

ili yainege na kuzimu.

25 Mndewa Imulungu kozibomola ng'anda za weli na kibuli,

lakini kozikaliza mbaka za mgane.

26 Magesa gehile, ngevuzo kwa Mndewa Imulungu,

ila mbuli zinogile nzelu.

27 Yosulukila faida ya ubokaji kowadununza wanhu wa mng'anda mwake,

lakini yodigevuzikila hongo kokuwa mgima.

28 Moyo wa munhu yeli na haki ogelegeza vonda yedike,

lakini mulomo wa munhu yehile okwita gehile.

29 Mndewa Imulungu kakutali na wasang'hana gehile,

lakini kowategeleza waja weli na haki.

30 Kihanga kisamhuke chounogeza moyo,

mbuli zinogile zounogeza moyo.

31 Munhu yotegeleza kuzumigwa kunogile,

kahamoja na weli na ubala.

32 Yolema kufunzigwa koibezeli mwenyego,

lakini yotogola kuzumwa kolonda nzewele.

33 Kumdumba Mndewa Imulungu ago mafundizo ga ubala,

ung'hali ukulu haunakwiza tanhu olongola uhole.