1 Moyo wa mndewa wammakono ga Mndewa Imulungu,

koulongoza kamba muloka wa mazi, kokose koyolonda.

2 Munhu kokona nzila zake zose zinoga mgameso gake,

lakini Mndewa Imulungu ayo yopima gaja geli mmoyo wa munhu.

3 Kusang'hana ganogile na ga haki,

komnogeza Mndewa Imulungu kubanza nhosa.

4 Meso ga kibuli na zoyo da kuitapa,

volagusa nzambi ya wanhu wehile.

5 Magesa ga munhu yoiyoha kusang'hana gogala ugoli mkulu,

lakini kila munhu yopapalika kupata vinhu kopata ukiwa.

6 Ugoli upatika kwa uvizi,

kamba yosi dibita na mtego wa ifa.

7 Usede wa wanhu wehile owabananga,

kwavija olema kusang'hana mbuli za haki.

8 Nzila ya munhu yeli na kitala iha,

lakini tabiya ya munhu yelibule kitala inoga.

9 Vinoga kukala uchanha mumgwazo wa kiswili,

kubanza kukala mwiing'anda ya mtwanzi mgomvi.

10 Choogesa munhu yehile kusang'hana gehile,

kabule bazi hata kwa miyage.

11 Munhu yeli na bezi yahakobozigwa, zozolo kopata ubala,

munhu yeli na ubala yahafunzigwa kopata kutanga vinhu.

12 Imulungu mwene haki kogatanga gowosang'hana wehile mzing'anda zao,

kowagwisa wehile na kuwabananga.

13 Yosila magwiti ili sikuyahulike kililo cha mkiwa,

na heyo vivija vonda yalile honda yategelezigwe.

14 Ng'hasiliki yohozigwa na nhunza ya kinyelegezi,

hongo dilavigwa kwa kinyelegezi dohoza ng'hasiliki.

15 Haki yahatendeka wanhu wanogile odeng'helela,

lakini wanhu wehile odumba.

16 Munhu yokala kutali na nzila ya nzewele,

kobwihila mumting'hano wa wanhu wafile.

17 Yonogelwa kuhozoga kokuwa mkiwa,

yonogelwa na ugimbi na kuja honda yawe mgoli.

18 Msang'hana gehile kopata kubulo jake na honda dimpate munhu mwene haki,

mbananzi kotagusigwa hanhu ha munhu yatelele.

19 Vinoga kukala kuluwala,

kubanza kukala na mtwanzi mgomvi na yeli na ndwagi.

20 Ukae kwa munhu yeli na ubala muna vinhu va bei ng'hulu,

lakini mbozi komeza vinhu vake vose.

21 Yozahila haki na kuwa na bazi,

kokala siku nyingi na komweda na kugweleligwa ukulu.

22 Munhu yeli na ubala kovamila buga da wanhu wene nguvu,

na kobomola ngome ziwotamanila.

23 Munhu youkimila mulomo wake na lulimi lwake,

koinega na madununzo.

24 Munhu yeli na bezi na kuitapa twaga jake, “Mkuduzi”

Kosang'hana mbuli kwa kuitapa na kibuli kiyelinacho.

25 Kusulukila ng'hani kwa mnyeke kokuwa ifa yake,

kwavija mikono yake yolema kusang'hana.

26 Imisi ngima msang'hana gehile kosulukila kupata kinhu,

lakini yeli na haki kolava kwa unogelwa.

27 Nhosa ya msang'hana gehile, ngevuzo,

yogevuza ng'hani yahailava kwa gehile.

28 Msindila wa uvizi kobanangigwa,

ila munhu yahulike goya kolonga mbuli zizija.

29 Munhu yehile koilagusa kamba galu,

lakini munhu yotanga goya kogelegeza vinogile mbuli zake.

30 Haduhu ubala hebu nzewele hebu magesa ga wanhu,

godaha kumuhuma Mndewa Imulungu.

31 Falasi kotandigwa goya mbuli ya siku ya ng'hondo,

lakini mhumo yolawa kwa Mndewa Imulungu.