22
1 Vinoga kuwa na sifa inogile kubanza ugoli,
unogelwa unoga kubanza shaba na zahabu.
2 Mgoli na mkiwa wose kinhu kimoja,
wose wabili Mndewa Imulungu ayo yawalumbile.
3 Munhu mbala yahagona gehile koifisa,
lakini mizozolo olawa kunze wakalumile.
4 Wahamdumba Mndewa Imulungu na kuwa muhole,
kopata nhunza na kutogoligwa na ugima.
5 Nzila ya wanhu wehile imema miba na mitego,
heyo yoika goya loho yake kokuwa kutali nayo.
6 Mfunze mwanago viilondeka kukala goya,
na heyo honda yaisemwe nzila ayo muuvele.
7 Tajili komtawala mkiwa,
munhu yokopa, mtumwa wa munhu yokopesha.
8 Yonogelwa na gehile kosenga magazo,
na udahi wake wa kusang'hana gehile omala.
9 Munhu yeli na moyo wa kulava komweda,
kwavija kowagwaa wakiwa ndiya yake.
10 Muwinge munhu yeli na bezi na ndwagi yosegela,
ugomvi na maligo vokuwa habule.
11 Yonogela moyo unogile na mbuli zake zogala ganogile,
kokuwa mbwiga wa mndewa.
12 Mndewa Imulungu kokaliza kutanga vinhu,
lakini kozigwisa mbuli za wanhu wavizi.
13 Munhu mnyeke kolonga,
“Sidaha kulawa kunze,
kuna simba ako konikoma.”
14 Mulomo wa mgoni kolongo tali,
yokwihiligwa na Mndewa Imulungu kotumbukila mumo.
15 Mwana konogelwa na mbuli za kibozi muumoyo wake,
lakini wahamzuma kwa mbalati komsegesela gago.
16 Yowadununza wakiwa ili yongeze ugoli wake,
na yowagwaa nhunza wagoli, wose wabili ohelela muukiwa.
Mbuli za wanhu weli na ubala
17 Tega gwiti uhulike mbuli za wanhu weli na ubala,
vugula moyo wako utange vinhu vangu.
18 Vinoga kamba kogeka mgati ya moyo wako,
na kugeka mmulomo wako.
19 Ili tamanilo jako diwe kwa Mndewa Imulungu,
lelo nikufundiza gweye gano, ona gweye.
20 Nikwandikila nongezi malongo madatu,
ulonzi wa magesa ganogile na kutanga vinhu,
21 ili kukufunza mbuli za ukweli,
umbwezele munhu yakutumile mbuli za ukweli.
Nongezi ya 1
22 Sikuumzulumu mkiwa kwavija heyo mkiwa,
na sikuumwime haki munhu yelibule kinhu mkitala.
23 Kwavija Mndewa Imulungu kowagombela,
kowaboka ugima wao awo owadununza.
Nongezi ya 2
24 Sikuutende umbwiga na munhu yogundumuka himahima,
na sikuuilumbe na munhu yogundumuka ng'hani,
25 sambi uifunze nzila zake,
na kuinamata mumtego.
Nongezi ya 3
26 Sikuuwe imoja wa kuika zamana,
hebu kuika lahani kwa madeni ga wanhu,
27 kamba kwabule kinhu cha kuliha,
hata lusazi lwako luuwasila olusola.
Nongezi ya 4
28 Sikuusegese zimbaka za umwaka,
zikigwe na iwahenga zako.
Nongezi ya 5
29 Tanhu mulole munhu mwene nzewele mzisang'hano zake.
Ayo kowasang'hanila wandewa, hawasang'hanila wasumbwa.