24
Nongezi ya 19
1 Sikuuwonele migongo wanhu wehile,
na sikuusulukile kuwa hamoja nao,
2 kwavija magesa gao gose ga muusede,
habule mbuli yoyose inogile ilawa mmilomo yao.
Nongezi ya 20
3 Ng'anda yozengigwa kwa ubala,
na yogangamala kwa nzewele.
4 Kwa kutanga vinhu magati gomemezwa,
gomemezwa vinhu va bei ng'hulu na vinogile.
Nongezi ya 21
5 Munhu mwene ubala kana nguvu,
munhu yotanga vinhu kogangamala.
6 Kwavija kwa ulongozi unogile kodaha kuitowa ng'hondo,
na mhumo yopatikana kwa kuwa na walava magesa wengi.
Nongezi ya 22
7 Kwa munhu mbozi vidala kuutanga ubala,
mumting'hano halonga mbuli.
Nongezi ya 23
8 Yogesa kusang'hana gehile,
kokemigwa galu wa gehile.
9 Chochose choogesa mbozi kusang'hana nzambi,
na munhu yeli na bezi, ngevuzo kwa wanhu.
Nongezi ya 24
10 Wahabwela kuchugu mmagazo,
nguvu zako ndodo.
Nongezi ya 25
11 Wakombole wanhu ogaligwa kukomigwa,
sambi usinhagile kumkombola munhu yonda kukomigwa bila kitala.
12 Kumwande sambi ulonge, “Hatutangile,”
kwavija Imulungu ayo yopima gaja geli mmizoyo ya wanhu,
heyo ayo yokaliza ugima wako,
komuliha kila munhu kwa sang'hano zake.
Nongezi ya 26
13 Mwanangu, diya uki, uki unoga,
uki ulawa mdilala wamulile mmulomo.
14 Vivo vonda uwe ubala muumoyo wako,
wahaupata kokuwa na siku zinogile ako kumwande,
na tamanilo jako honda jage bule.
Nongezi ya 27
15 Sikuusepe kamba munhu yehile yovamila ukazi wa munhu mwene haki,
hebu kuinanga ng'anda yake.
16 Kwavija hamoja munhu mwene haki kogwa miyanza mingi ila kokwinuka kabili,
lakini munhu yehile kobwanhigwa hasi na magazo.
Nongezi ya 28
17 Sambi udeng'helele kugwa kwa ija yokwihila,
moyo wako sambi udeng'helele yahaikwala.
18 Mndewa Imulungu yahagona ago honda yanogelwe,
na koisegesa kutali na heyo ng'hasiliki yake.
Nongezi ya 29
19 Sambi ugevuzike mbuli ya wasang'hana gehile,
hebu kuwonela migongo wanhu wehile,
20 kwavija yehile honda yawe na ganogile ako kumwande,
mulenge wa ugima wake ozimika.
Nongezi ya 30
21 Mwanangu, mdumbe Mndewa Imulungu na mndewa,
sambi uilumbe na waja hawawategeleza.
22 Kwavija nhaguso yao yowapata kwa kusinhukiza,
habule yotanga madununzo gonda wagapate.
Mbuli ziyagwe za wanhu weli na ubala
23 Zino nongezi za wanhu weli na ubala.
Kutagusa kwa kulola kihanga cha munhu hakunogile bule.
24 Munhu yoyose yomulongela munhu yabanange, “Gweye hubanange bule,”
koduwiligwa na wanhu wose,
na kokwihiligwa na wanhu wa isi zose.
25 Lakini wanhu owakoboza wasang'hana gehile opata deng'ho,
na ganogile gowezila.
26 Waja owedika wayagwe kwa ukweli,
olagusa hewo mbwiga wa ukweli.
27 Tanhu sang'hana sang'hano zako kunze,
tanda migunda yako,
abaho zenga ng'anda yako.
28 Sikuulave usindila kwa miyago kwa mbuli haitendile,
hebu kumulonga kwa uvizi.
29 Sambi ulonge, “Nomtendela kamba heyo viyanitendele!
Nombwelezela kamba viyanitendele.”
30 Nibita behi ya mgunda wa mnyeke,
mgunda wa mizabibu wa munhu hagelegeza goya.
31 Nikanganya kona ota miba,
mijani igubika mgunda wose,
na luwa lwake lwa mabwe lubomoka.
32 Ndola na kugelegeza ng'hani,
mhata mafundizo.
33 Wasa kidogo, kukila kidogo,
kunza mkono wako uhumule kidogo,
34 avo, ukiwa wako okuvamila kamba mbokaji,
na kuhungukilwa kokukweleleza kamba munhu mwene mgoha.