25
Nongezi ziyagwe za Sulemani
1 Zino azo nongezi ziyagwe za mndewa Sulemani ziduganyigwe na wanhu wa Hezekia, mndewa wa Yuda.
2 Imulungu kotogoligwa kwa kufisa mbuli,
lakini mndewa kotogoligwa kwa kugubula mbuli.
3 Kamba ulanga vuuli kutali na isi viili hasi,
vivo viili havidahika kutanga gose googelegeza mndewa.
4 Segesa dikwe mwiishaba yako,
na muhondaji kokulavila kiya kinogile.
5 Wasegese wanhu wehile kuulongozi wa mndewa,
na utawala wake okuwa wa haki.
6 Sikuuifeke feke kwa mndewa,
hebu kuitenda munhu mkulu,
7 vinoga kulongeligwa, “Izo kuno kuulongozi.”
Kubanza kuhulumusigwa hasi kuulongozi wa iwakulu.
Mbuli ziuzonile kwa meso gako,
8 sikuukimbilile kuzigala mkitala,
kotenda choni kamba msindila iyagwe yaheza kuhindula mbuli ziulongile?
9 Lamuleni kugomba kwenu gweye na miyago,
kila munhu sikuyalonge mbuli ya kinyelegezi ya miyage,
10 wanhu sambi watange kija kimfisa,
ili sambi munange matwaga genu.
11 Mbuli ilongigwa kipindi kinogile,
yoigala na shaba ihambigwe kwa zahabu.
12 Munhu yeli na ubala yahakuzuma,
vinoga kubanza pete hebu ushanga wa zahabu isunhigwe.
13 Msenga yotamaniligwa komnogeza ija yamtumile,
kamba mazi govega kipindi cha vuke da kipindi cha kusenga.
14 Kamba vija mingu na beho dilibule mvula,
vivo viili kwa munhu yoitapa kolava nhunza na honda yailave bule.
15 Kwa kusitamili mtawala kodaha kutewenzigwa,
na lulimi laini lobena zege.
16 Wahapata uki diya mbaka utosheke,
ili sambi ukukifu na kuudeka.
17 Sambi uchole kwa miyago baho kwa baho,
ili sambi yakudonhe na kukugevuzikila.
18 Kamba mbwego hebu sime hebu mgoha,
vivo viili kwa munhu yolava usindila wa uvizi kwa miyage.
19 Kumtamanila munhu hatamaniligwa kipindi cha madununzo,
kamba zino digedela hebu mgulu usiguke.
20 Kumwimbila lwila munhu yeli na lusikisiki,
kamba kuvula viwalo kipindi cha beho,
hebu kugela siki mkilonda.
21 Munhu yokwihila yahawa na nzala mgwee ndiya yaje,
yahawa na ng'hilu mgwee mazi yang'we.
22 Avo komtenda yapate kinyala,
kamba makala ga moto mdipala jake,
na Mndewa Imulungu kokugwaa nhunza.
23 Beho da kasikazini*Kwa Waizilaeli mvula kakala kolawa mwambu wa kasikazini dogala mvula,
vivo ili udetaji ogala ndwagi.
24 Vinoga kukala mumgwazo wa kiswili,
kubanza kukala na mtwanzi mgomvi.
25 Kamba vija mazi govega kwa munhu yeli na ng'hilu,
vivo viuli usenga unogile ulawa isi ya kutali.
26 Munhu yeli na haki yahatogola kukweleleza mbuli za wanhu wehile,
kamba nzasa itibuke hebu sima ditibuke.
27 Havinogile kuja ng'hani uki,
vivija havinogile kuifeka feka ng'hani.
28 Kamba buga dilibule ukalizi kipindi vidivamiligwa,
vivo viili kwa munhu yolemelwa kuikimila ng'hasiliki yake mwenyego.