8
1 Yeésu weedí bʊ́ʊ nɛ́, zamɔ́ɔ kʊ́bɔńgɩ woovu yɩ. 2 Ńna gɛ cɛnɩŋa nɛkɛ́rɛ woogódúu ɩjɔ́ kokúu yɩ tɛ́ɛ́dɩ kɔtɔ́ sɩsɩ: «Kʊ́bɔnɩ́ mányɩ sɩsɩ a nyɔ́ɔ́zɔ́ɔ́lɩ, nyánbɩɩzɩ́ nÿéle mawáa malá ɖacɩrɩ‑cɩrɩ.» 3 Ngɛ Yeésu weedekiná yɩ na ɩnʊ́ʊ́nɩ ɩtɔ́ yɩ sɩsɩ: «Méédísi, waa nbɩ́sɩ ɖacɩrɩ‑cɩrɩ‑dʊ́ʊ.» Ńna‑ńna gɛ ɩrʊ́ ceení‑dɛ́ɛ cɛnɩ́tɩ waawáa. 4 Ngɛ Yeésu wɔɔdɔ́ yɩ sɩsɩ: «welesi nnɩ́ɩ ma kazɔ́ɔ. Nkefééri naárʊ wenbí bɩɩlá nɛ́. Amá bo Ɩsɔ́ɔ sarásɩ lanɖʊ́ ɩna wenbí nyɔ́jɔ́ɔ nɛ́, na nlá sarɔ́ɔ wenká Anɖébi Múúsá wɔɔdɔ́ sɩsɩ bála nɛ́, na báa weení ɩtɩlɩ́ sɩsɩ nyááwáa.»
5 Yeésu sɩ ɩsʊ́ʊ Kapɛrnawúm nɛ́, ngɛ Róóma ɩsɔ́ɔja kʊ́bɔnɩ́ naárʊ woogódúu ɩjɔ́ ɩtɔ́ yɩ sɩsɩ: 6 «Kʊ́bɔnɩ́, mɛ́dɛ́ɛ tɩmɛ́‑lanɖʊ́ lewáa ɖaána biilí yɩ ɩbá wɛ́nÿɛlɛ́m.» 7 Ngɛ yeésu woobúsi yɩ sɩsɩ: «Mónboɖé mangáwáázɩ yɩ.» 8 Ngɛ sɔ́ɔ́ja kʊ́bɔnɩ́ woobúsi yɩ sɩsɩ: «Kʊ́bɔnɩ́, mádátála nzʊ́ʊ máɖáána‑daá, amá ŋmatɩ tɔ́m‑bú kʊ́ɖʊḿ, mɛ́dɛ́ɛ tɩmɛ́‑lanɖʊ́ wánwaá. 9 Mádɩ́tɩŋa mɔ́wɛná mɛ́dɛ́ɛ kʊ́bɔnáa, bɩka mɔ́wɛná sɔ́ɔ́jawá mɛ́dɛ́ɛ́zɩ́ mɛ́dɛ́ɛ tɩmɛ́rɛ‑daá. A mɔ́ɔ́dɔ́ mɛ́dɛ́ɛ yoḿ sɩsɩ: ɖɛɛ, wɛ́nɖɛɛ́ gɛ, a mááyáa weení nɛ́, wɔ́ngɔnɩ́ gɛ, a mɔ́ɔ́dɔ́ naárʊ sɩsɩ la ɖɔ́, wánlám gɛ.» 10 Yeésu waaníɩ ɩrʊ́ ceení‑dɛ́ɛ ŋmatɩrɛ nɛ́, ngɛ bɩɩlá yɩ mááɖé ɩtɔ́ wenbá bovóó yɩ nɛ́ sɩsɩ: «Toovonúm gɛ ménveerím mɩ́ɩ́, mádánááta toovonúm‑fáa ńŋɩnáa ɩrʊ́ ceení‑dɛ́ɛ ńgɩ taká Israyɛ́ɛlɩ bíya‑daá. 11 Ménveerím mɩ́ɩ́ sɩsɩ ɩráa ɖabata wángalɩɩnáa wɩ́sɩ yaagalɩɩɖɛ́ na sɩyaagazalaɖɛ́ fáráńdɩ́ bána Ibrahím, Isaáka na Yaakúbu boyóózi bɔcɔ́ɔ beɖi Ɩsɔ́ɔ‑dɛ́ɛ kowúrɔ́ɔ‑daá. 12 Bɩka wenbá báta basʊ́ʊ kadaá nɛ́, bɛbɛ́ɖɩ wɛ asʊ temeenuú‑daá bewíi balá mányɩ lé.»
13 Ngɛ Yeésu wɔɔdɔ́ sɔ́ɔ́ja kʊ́bɔnɩ́ sɩsɩ: «Bo ngbé, nyɛ́dɛ́ɛ toovonúm‑fáa wénÿelíi nÿuú wenbí nyɔ́ɔ́bɔ́ɔ́zɩ nɛ́.» Ngɛ kʊ́bɔnɩ́‑dɛ́ɛ tɩmɛ́‑lanɖʊ́ waadáwáa sáátɩ kɩḿ nɔ́ɔ́.
14 Bʊwɔ́rɔ́ nɛ́, Yeésu woobó Pétro‑dɛ́ɛ ɖaána. Ngɛ wɔɔmɔɔná Pétro nɔɔzɔ́ɔ ɩvɩ́nɛ́ɛ wánnyaadɩ́ bɩka ɩdɔnʊʊ́ ɩbáázɩ kizoláa. 15 Yeésu weedekiná ɩnʊ́ʊ́nɩ, ngɛ waawáa ɩkʊrʊ́ ɩɖʊ yɩ kíɖíím.
16 Ɖaanɩ́ŋa waalá nɛ́, bɔɔgɔná Yeésu ɩráa ɖabata zííniwá wánjaarɩ́ wɛ nɛ́, na ɩdɛ́ɛ ŋmatɩrɛ gɛ wɔɔɖɔɔná zííniwá. Ngɛ waawáázɩ kʊdɔndɩnáa bɔɔgɔ́nɩ nɛ́ barɩ́ŋa. 17 Waalá bɩlɛ́ gɛ na wentí anɖébi Ezáya waaŋmátɩ sɩsɩ: «Wɔɔgbɔ́ɔ ɖɛ́dɛ́ɛ mádáfɩ́yátɩ ɩrɔ, bɩka ɩmʊ ɖágʊ́dɔmɩ́nɩ rɩ́ŋa» nɛ́ ikóódi.
18 Yeésu waana wenbí zamɔ́ɔ waalára kamɩlɩná yɩ nɛ́, ngɛ sɩsɩ bɛ́ɖɛ́ɛ́ná lɩɩrɛ́ kʊ́bɔńɖɛ‑dɛ́ɛ fúu lí ńgɩ‑rɔ. 19 Ńna gɛ Mará wɩlɩɖʊ́ naárʊ woogódúu ɩjɔ́ ɩtɔ́ yɩ sɩsɩ: «Kʊ́bɔnɩ́, báa lé gɛ nyɛ́nɖɛɛ́ móvóo nya gɛ.» 20 Ńna gɛ Yeésu woobúsi yɩ sɩsɩ: «Sɔɔlɛ́ɛ́rásɩ wɛná bɔ́ɔ́nɩ sɩ́nzʊʊ́, bɩka siḿsi wɛná ɖɛ́ndɛ́lá sɩ́nzʊʊ́, amá Ɩrʊ́ Biyaalʊ́ fɛ́yɩ́na lénlé sɩ ɩfɩ́nɩ ɩfɛ́ɛ́zɩ nɛ́.»
21 Bʊwɔ́rɔ́ gɛ Yeésu‑dɛ́ɛ wanbaaráa‑daá naárʊ wɔɔdɔ́ yɩ sɩsɩ: «Kʊ́bɔnɩ́, fa ma nɩ́bááwʊ mobó megébi majaa naanɩ́.» 22 Ngɛ Yeésu woobúsi yɩ sɩsɩ: «Kovu ma bɩka nÿéle ɩsɩɖáa ibí bɛdɛ́ɛ ɩsɩɖáa.»
23 Bɩlɛ́ bʊwɔ́rɔ́ gɛ Yeésu waagba kpɩ́ɩ́rʊ́ʊ‑daá, ngɛ ɩwanbaaráa waaláázɩ yɩ. 24 Ńna‑ńna gɛ fefelimá kʊ́bɔná waabáázɩ fɛtɩ́ lɩɩrɛ́ kʊ́bɔńɖɛ‑rɔ bɩka bɩ́ndańdɩ kpɩ́ɩ́rʊʊ́ hálɩ lɩ́m wánzʊʊ́ kɩdaá. Amá Yeésu wɛ wónɖóm. 25 Ńna gɛ ɩwanbaaráa woogódúu ɩjɔ́ beféézi yɩ bɔtɔ yɩ sɩsɩ: «Kʊ́bɔnɩ́, lɛɛ ɖáa, ɖánzɩ́m!» 26 Ngɛ Yeésu woobúsi wɛ sɩsɩ: «Ngbaalá gɛ mɩ́jɔ́ɔ nɩndáárɛ bɩlɛ́, yaraɖá buḿsi‑dɩnáa mɩ́ɩ́.» Ngɛ waagʊrʊ́ ɩkazɩ́ fefelimá na lɩ́m, ngɛ aazála bɩcɔ́ɔ ɖɛfɛɛ. 27 Ńna gɛ bɩɩlá ɩwanbaaráa rɩ́ŋa bítí hálɩ bɔ́nbɔɔzɩ́ badɩ sɩsɩ: «Ɩrʊ́ ceení gɛ weení gɛ bɩkpɛdɩ́na lɩ́m na fefelimá wánlám wenbí wɔɔbɔ́ɔ́zɩ nɛ́?»
28 Yeésu wɛɛdɛsɩná lɩɩrɛ́ kʊ́bɔńɖɛ‑dɛ́ɛ fúu li ńgɩ‑rɔ Gadaráa tɛ́ɛ́dɩ‑daá nɛ́, ngɛ ɩráá nɔwɔ́lɛ zííniwá wánjaarɩ́ wɛ nɛ́, waagálɩ́ɩ́ná bɔláánɩ‑daá bɛgɛgɛrɛŋɛ sɩ basɩ́ŋ yɩ. Bɛdɛ́ɛ bánlám ɩráa bidaavé nɛ́ weeyéle naárʊ tɔ́ngbɔɔná, nɩ́bááwʊ kɩḿ. 29 Ngɛ ɩráa bɛḿ baabáázɩ agogo sɩsɩ: «Ɩsɔ́ɔ Biyaalʊ́, we gɛ nyɔ́zɔ́ɔlɛ́ɛ na ɖáa? Yáá nyɔ́ɔ́gɔ́nɩ sɩ nva ɖáa fúkúḿsi naanɩ́ alɩwáátɩ Ɩsɔ́ɔ waazɩ́ɩ kɩ nɛ́ kɩtála?»
30 Afawá natɩ́rɩ cɔɔ́na wɛ bolíni cʊ́kɔ, tɩlɛ́ tɩwɛ tinɖíi kíɖíím. 31 Ngɛ zííniwá waavɩ́nɩ Yeésu sɩsɩ: «A bɩgɛ́ɛ sɩ nɖɔ́ɔ ɖáa, yele ɖáa ɖɩsʊ́ʊ afawá fuúre ɖɩna ɖɩdaá.» 32 Ngɛ Yeésu waava tɩ wɛ́ɖɛ sɩsɩ: «Ibó ɩɖɛ́ɛ!» Ngɛ zííniwá waalɩ́ɩ ɩráa nɔwɔ́lɛ bana bɔrɔ tibó tɩsʊ́ʊ afawá. Ngɛ afawá waalɩ́ɩ bʊ́ʊyɔ́ɔ kʊjʊʊ́‑daá na sewɔ́ɔ tɩsʊ́ʊ lɩɩrɛ́ kʊ́bɔ́nɖɛ‑daá lɩ́m iɖi tɩ tɩsɩ́. 33 Wenbá béngetí afawá tɩḿ nɛ́ beeze bobó tɛ́ɛ́dɩ‑daá batɩ́ wenbí bɩɩlá nɛ́ befééri, na wenbí bɩmɔɔná zííniwá‑dɩnáa nɔwɔ́lɛ bana nɛ́. 34 Ńna gɛ tɛ́ɛ́dɩ‑daá ɩráa rɩ́ŋa waagálɩ́ɩ sɩ bɛkɛ́tɩ Yeésu. Baana yɩ nɛ́, ngɛ baavɩ́nɩ yɩ sɩsɩ ɩ́lɩɩ bɛḿ balaadɔ́ɔ‑rɔ.