9
1 Ngɛ Yeésu waagba kpɩ́ɩ́rʊʊ́‑daá ɩtɛ́sɩ lɩɩrɛ́ kʊ́bɔńɖɛ ɩbɩ́sɩ ɩdɛ́ɛ́dɩ‑daá. Ńna gɛ bɔɔgɔná yɩ gaalɔ‑gáálɔ́ɔ kagavɩ́nɛ́ɛ kagɩgbɛ́lɛ́wʊ‑rɔ.a9.1 Kɩgbɛ́lɛ́wʊ kɩḿ kɩjɔɔ́ɔ gɛ nyazɩ ɖoo tará bánzʊʊnáa ɩrʊ́ nɛ́. 2 Yeésu waana nŋɩ́nɩ́ baava yɩ toovonúm nɛ́, ngɛ wɔɔdɔ́ gaalɔ‑gáálɔɔ́ sɩsɩ: «Ɖɔkɩ nyádɩ móbú, mɛ́ɛ́jɛ́ nya nyɛ́dɛ́ɛ alaháácɩ́wá.» 3 Ńna gɛ Mará wɩlɩɖáa nɛbɛ́rɛ wɔɔdɔ́ badaá sɩsɩ: «Ɩrʊ́ ceení wánŋmatɩ́ wɛ́ngbɛɛnáa Ɩsɔ́ɔ.» 4 Yeésu waadɩlɩ́ wentí bánmaazɩ́ nɛ́, ngɛ wɔɔdɔ́ wɛ sɩsɩ: «we‑rɔ gɛ mɩ́nmaazɩ́ wenbí bidaavé nɛ́ bɩlɛ́?» 5 Mɔdɔ́ sɩsɩ: «bɛɛjɛ́ nya nyɛ́dɛ́ɛ alaháácɩ́wá, na kʊrʊ́ nnʊ́m bɔlɔwʊtáá, wenbí fɛ́yɩ́na káálɛ? 6 Amá mɔ́zɔ́ɔlɛ́ɛ ɩtɩlɩ́ sɩsɩ Ɩrʊ́ Biyaalʊ́ wɛná yíko ɩcɛ́ ɩráa bɛdɛ́ɛ alaháácɩ́wá adɛ laadɔ́ɔ‑rɔ cé.» Ngɛ wɔɔdɔ́ gaalɔ‑gáálɔ́ɔ sɩsɩ: «Kʊrʊ́ ngbɔ́ɔ nyágɩgbɛ́lɛ́wʊ ngbé nyɛ́dɛ́ɛ.» 7 Ngɛ ɩlɛ́ waagʊrʊ́ ikpé ɩdɛ́ɛ. 8 Zamɔ́ɔ waana bɩlɛ́ nɛ́, ngɛ kɩɩnɩ́ɩ nɩndáárɛ bɩka kɩ́nzám Ɩsɔ́ɔ ńŋɩnáa waava ɩráa yíko ńŋɩnáa kɩna nɛ́.
9 Yeésu waalɩ́ɩ ńna wɛ́nɖɛɛ́ nɛ́, ngɛ waana abaalʊ́ naárʊ bánÿaá yɩ sɩsɩ Maatéwu, ɩjɔɔ́ wánmʊ́ʊ tikée ɩdɛ́ɛ tɩmɛ́rɛ‑daá. Ngɛ wɔɔdɔ́ yɩ sɩsɩ: «Kovu ma.» Ngɛ Maatéwu waagʊrʊ́ ikóvú yɩ. 10 Bɩɩgɔ́nɩ Yeésu ibó ɩsʊ́ʊ Maatéwu‑dɛ́ɛ ɖaána‑daá kíɖíím ɖíi. Tikée mʊʊráa na alaháácɩ́‑dɩnáa, bɔɔgɔ́nɩ bɔcɔ́ɔ ɩjɔ́ bána ɩwanbaaráa bénɖíi kíɖíím. 11 Farízi‑dɩnáa waana bɩlɛ́ nɛ́, ngɛ bɔɔdɔ́ Yeésu‑dɛ́ɛ wanbaaráa sɩsɩ: «Bɩyáásɩ́ gɛ mɩ́dɛ́ɛ kʊ́bɔnɩ́ na tikée mʊʊráa na ɩráa badaavé nɛ́ booyóózi bénɖíi kíɖíím?» 12 Yeésu waanɩ́ɩ bánŋmatɩ́ bɩlɛ́ nɛ́ gɛ sɩsɩ: «Kʊdɔndɩnáa wánjáádɩ kʊ lɔ́kʊ́ta, alaafɩ́ya‑dɩnáa baafɛ́yɩ́na yɩ. 13 Ibó ɩcáa Ɩsɔ́ɔ‑dɛ́ɛ tɔ́m waaŋmátɩ sɩsɩ: "Kʊnyɔnɩɩrɛ́ waagɩ́lɩ ma fʊ́ńdɩ kpɩná mɩ́ngʊ́ʊ sɩsɩ mɩ́ɩ́lá ma sarɔ́ɔ nɛ́" tugutoluú, káma mɔ́dɔ́kɔ́nɩ sɩ mayáa wenbá bazɩɩzɛ́ɛ nɛ́, amá alaháácɩ́‑dɩnáa‑rɔ gɛ mɔ́ɔ́gɔ́nɩ.»
14 Yeésu waaŋmátɩ bɩlɛ́ bɩtɛ́ nɛ́, ngɛ anɖébi‑dɛ́ɛ Yaayá wanbaaráa woogódúu ɩjɔ́ bɔbɔ́ɔ́zɩ yɩ sɩsɩ: «We‑rɔ gɛ ɖɔ́ɔ́ ɖána Faríízi‑dɩnáa ɖɔ́nvɔkɩ́ nɔɔ́ gɛ nyɛ́dɛ́ɛ wanbaaráa tɔ́nvɔkɩ?» 15 Yeésu woobúsi wɛ sɩsɩ: «Mɩ́nmaazɩ́ sɩsɩ wetáhárʊ ɖɔndɩnáa mɔɔ́na bɔcɔ́ɔ ɩzányɩ́ŋɩ́rɛ‑daá sáátɩ bána wetáhárʊ nɛ́? Bɩdánlaḿ bɩlɛ́. Sáátɩ nakɩ́rɩ wɔ́ngɔnɩ́, bɔ́ngɔnɩ́ bɔkpɔ́ɔ wetáhárʊ bɔjɔ́ bɛɖɛɛná. Bɩdɛ́ɛ sáátɩ gɛ bɔ́nvɔkɩ́ nɔɔ́.»
16 Yeésu waadásɩ ɩtɔ́ wɛ sɩsɩ: «Naárʊ fɛ́yɩ́ wɔ́ngbɔwʊ́ʊ bɩsaawʊ́ kedeyɔ́ɔ kɩ́falɔɔ́ ɩtɔná tóko kɩ́bɩńgɩ. Tɩ́fa bɩsaawʊ́ kɩ́falʊʊ́ wánjɩrɩ́ɩ tóko kɩ́bɩńgɩ gɛ bɔɔwʊ́ ɩnyɔ́ɔ́zɩ kɩwála. 17 Ngʊ́ bɩlɛ́ gɛ bodónzuú sʊlʊ́m kɩ́fábɩ bɩdabɩɩtá bɩtɛ́ nɛ́ tɔ́nɖɛ furuú kɩ́bɩńgɩ‑daá, tɩ́fa kɩ́nÿáa gɛ sʊlʊ́m ɩbɩ́rɩ adɛ tɔ́nɖɛ furuú ɩlá ásáráwʊ́. Amá bónzuú sʊlʊ́m kɩ́fábɩ bɩdabɩɩtá bɩtɛ́ nɛ́ tɔ́nɖɛ furuú kɩ́fálʊʊ́‑daá gɛ na bɩrɩ́ŋa bɩcɔ́ɔ ɖéyí‑ɖéyí.»
18 Yeésu bamáa ŋmatɩrɛ bɩlɛ́ nɛ́ gɛ Yahúɖúwá‑dɛ́ɛ kʊ́bɔnɩ́ naárʊ wɔɔgɔ́nɩ ɩká ɩɖʊná‑rɔ ɩnʊvɔ́‑daá ɩtɔ́ sɩsɩ: «Lɛlɛɛkɩna gɛ mɛwɛɛlɛ́ɛ weevéti. Amá kɔnɩ ngádɩ́nɩ nʊ́ʊ́nɩ ɩrɔ, wénvém.» 19 Ńna gɛ Yeésu waagʊrʊ́ ɩ́na ɩwanbaaráa batɩ́nɩ ɩwɔ́rɔ́.
20 Ngɛ alʊ́ naárʊ azimá wéndináa yɩ bɩwɛná bɩ́ɩ́zɩ fuú na nasɩ́lɛ nbɩlɛ́ nɛ́ woogódúu itekiná Yeésu‑dɛ́ɛ tóko njʊ́ʊ́rɛ na ɩwɔ́rɔ́. 21 Alʊ́ ɩmʊ́ waamáázɩ sɩsɩ: «A ɖé máábɩ́ɩ́zɩ medekiná idóko, mánwaá.» 22 Yeésu wɛɛgɛ́ɛ́zɩ ɩdɩ ɩbɛ́ɛ́m yɩ, ngɛ wɔɔdɔ́ yɩ sɩsɩ: «Ɖɔkɩ nyádɩ, mɛwɛɛlɛ́ nyɛ́dɛ́ɛ toovonúm fáa wɛɛlɛ́ɛ nya.» Sáátɩ kɩḿ nɔ́ɔ́ gɛ alʊ́ ɩmʊ́ waajáŋ ɩwáa.
23 Yeésu woobó ɩtála Yahúúɖúwá‑dɛ́ɛ kʊ́bɔnɩ́ ɩmʊ́ ɩdɛ́ɛ. Ngɛ wɔɔmɔɔná foyísi‑dɩnáa bángbɩɩrɩ́ sɩ bɛɖɛ́ɛ ɩrʊ́ bím, bɩka ɩráa zamɔ́ɔ wɛ ɖaána‑daá bénwií bóngoó.c9.23 Bɩdɛ́ɛ sáátɩ, Yahúɖúwá‑dɛ́ɛ nɛ́, a ɩrʊ́ waazɩ́, bɔ́ngbɔwʊ́ʊ wiiráa gɛ bɔkɔ́nɩ lííya‑daá bénwií, wiiráa bɛḿ nɛ́, bána foyísi‑dɩnáa gɛ. 24 Ńna gɛ Yeésu wɔɔdɔ́ wɛ sɩsɩ: «Ɩlɩ́ɩ, káma aléeré tasɩ́, wónɖóm gɛ.» Ngɛ bɛlɛ́ baamʊ́m yɩ. 25 Baalɩzɩ́ zamɔɔ́ asʊ nɛ́, Yeésu waazʊ́ʊ ɖaḿ‑daá ɩɖɔ́kɩ aléeré ɩmʊ́ ɩnʊ́ʊ́nɩ‑daá, ngɛ aléeré waagʊrʊ́. 26 Ngɛ tɔ́m tɩḿ tɩɩnɩ́ɩ fáráńdɩ́ kɩḿ kɩrɩ́ŋa kɩdaá.
27 Yeésu waalɩ́ɩ ńna wɛ́nɖɛɛ́ nɛ́ gɛ njɛma nɔwɔ́lɛ waalɩ́ɩ batɩ́nɩ ɩwɔ́rɔ́ bóngoó sɩsɩ: «Ɖáwʊɖa Biyaalʊ́, nɩɩ ɖágʊnyɔḿ.»
28 Yeésu waadála ɖaána nɛ́, njɛma woogódúu ɩjɔ́. Ngɛ wɔɔbɔ́ɔ́zɩ wɛ sɩsɩ: «Mɩ́ɩ́vá toovonúm sɩsɩ mánbɩɩzɩ́ mawáázɩ mɩ́ɩ́?» Ngɛ bɛlɛ́ boobúsi yɩ sɩsɩ: «Ɩɩ́n kʊ́bɔnɩ́.» 29 Ńna gɛ Yeésu weedekiná baazá ɩtɔ́ sɩsɩ: «Bɩ́la mɩ́ɩ́ ńŋɩnáa wenbí mɩ́ɩ́vá toovonúm nɛ́.» 30 Ngɛ baabáázɩ náa. Ngɛ waabá ɩbásɩ wɛ sɩsɩ békéyele naárʊ ɩnɩ́ɩ tɩ. 31 Amá bɛlɛ́ boobó gɛ bekiliná tɩ fáráńdɩ́ kɩ́m kɩrɩ́ŋa kɩdaá.
32 Sáátɩ wenkí njɛma wánlɩɩ́ nɛ́ gɛ bɔɔgɔná Yeésu ɩrʊ́ naárʊ zííni waabɩsɩná yɩ komóómúŋa nɛ́. 33 Yeésu wɔɔɖɔ́ɔ zííni kɩḿ nɛ́, ngɛ komóómúŋa waabáázɩ ŋmatɩrɛ. Ngɛ bɩɩlá zamɔ́ɔ bítí bɩka kɩ́ndɔ́m sɩsɩ: «Kɛtɛngɛrɛ ɖádánááta bɩna bɩdaká Israyɛ́ɛ́lɩ tɛ́ɛ́dɩ‑daá cé.» 34 Amá faarízi‑dɩnáa bɛlɛ́ sɩsɩ zííniwá‑dɛ́ɛ wúro wánváa kʊ yɩ yíko wɔ́nɖɔɔnáa zííniwá.
35 Yeésu wɛ wéngilím tɛ́ɛ́dɩwá na tɛɛ‑bíízi‑daá wánwɩlɩ́ɩ ɩráa Ɩsɔ́ɔ‑dɛ́ɛ tɔ́m Ɩsɔ́ɔ yaazɛɛɖɛ́, wénveerím wɛ Ɩsɔ́ɔ‑dɛ́ɛ kowúrɔ́ɔ‑dɛ́ɛ Laabáárʊ Kífeńgi, wánwaazɩ́ kʊdɔḿ báa wenkí na mádáfɩ́yátɩ báa wentí. 36 Waana ɩráa zamɔ́ɔ nɛ́, ngɛ bɩɩlá yɩ kʊnyɔḿ, káma bɩ́ńnɩ́ɩ ɩráa bɩka balaakáárɩ kʊráa ńŋɩnáa fééni tɩvɛ́yɩ́na ketirú nɛ́. 37 Ńna gɛ wɔɔdɔ́ ɩwanbaará sɩsɩ: «Kíɖíím sɩ bakʊ́ nɛ́ bɩɩɖɔ́ɔ, amá kʊmɖáa tɔɖɔ́ɔ. 38 Ɩzʊ́lʊ fɔɔ́‑dʊ́ʊ ikédíri kʊmɖáa bʊɖɔ́ɔ bɔkɔ́nɩ bakʊ́.»