11
1 Sáátɩ wenkí Yeésu wɛɛdɛ́ ɩwanbaaráa tɔ́mwá tɩna wɩlɩ́ɩ nɛ́, ngɛ wɛɛɖɛ́ɛ tɛ́ɛ́dɩwá‑daá Ɩsɔ́ɔ‑dɛ́ɛ tɔ́m wɩlɩ́ɩ, na waázu lám.
2 Anɖébi Yaayá wɛ ɩdɛ́ɛ sáráka‑daá nɛ́, waanɩ́ɩ bánŋmatɩ́ tɩmɛ́ Krísto wánlám yɛ nɛ́ adɔ́m. Ngɛ weedíri ɩwanbaaráa bɔbɔ́ɔ́zɩ yɩ sɩsɩ: 3 «Nyánáábɩ́lɛ́ weení sɩsɩ wɔ́ngɔnɩ́ nɛ́ yáá ɖándasɩ́ ɖɩɖám naárʊ?» 4 Ngɛ Yeésu woobúsi wɛ sɩsɩ: «Ibó ifééri Yaayá wenbí mɩ́ɩ́nɩ́ɩ na wenbí mɩ́ɩ́ná nɛ́. 5 Njɛma wánnaá bɩka gala‑gáálásɩ wánnʊŋɛ́, cɛnɩ́sɩ waawáa sɩlá ɖacɩrɩ‑cɩrɩ, ndamáa wánnɩɩ́, ɩsɩɖáa wénvém, bɩka bénveerím kadanbʊrʊ́sɩ Laabáárʊ Kífeńgi. 6 Wenbi‑niíni‑dʊ́ʊ gɛ weení ɩdɛbɛ́ɖɩ toovonúm waava ma nɛ́.»
7 Sáátɩ wenkí Yaayá‑dɛ́ɛ wanbaaráa wɛɛɖɛ́ɛ nɛ́, ngɛ Yeésu wɔɔgbɔ́ɔ wánŋmatɩ́ zamɔ́ɔ Yaayá‑rɔ sɩsɩ: «Wé gɛ mííbó ɩkɛ́bɛ́ɛ́m tɛɛwʊ́lɔ́ɔ‑daá? Ɖɩgɛrɛ́ fefelimá wónÿuúdi ɖɛ nɛ́? Aayɩ́. 8 Bɩlɛ́ nɛ́ wé gɛ mííbó ɩkɛ́bɛ́ɛ́m? Ɩrʊ́ izóóna tókowá kífeńdi nɛ́? Wenbá bónzuú tókowá kífeńdi nɛ́ bɔwɛ wúrowá‑dɛ́ɛ kowuro‑ɖɛ́ɛ́zɩ‑daá gɛ. 9 Bɩlɛ́ nɛ́ we gɛ mííbó ɩkɛ́bɛ́ɛ́m? Anɖébi? Ɩín, bɩlɛ́ gɛ ménveerím mɩ́ɩ́, hálɩ waagɩ́lɩ anɖébi. 10 Káma Yaayá‑dɛ́ɛ tɔ́m gɛ Ɩsɔ́ɔ‑dɛ́ɛ tɔ́m tákarɩɖá waaŋmátɩ sɩsɩ: «Méndiríi mɛ́dɛ́ɛ tɩndʊ́ʊ ɩtɛ nya bɩɩzá ɩnyɔ́ɔ́zɩ nya nɩ́bááwʊ.» 11 Ménveerím mɩ́ɩ́ toovonúm sɩsɩ ɩráa‑daá, anɖébi naárʊ tɔcɔ́ɔ waagɩ́lɩ Yaayá. Ngʊ́ nbɛ́ɛ́m nɛ́, weení ɩgɛ́ɛ kúmúu Ɩsɔ́ɔ‑dɛ́ɛ kowúrɔ́ɔ‑daá nɛ́ waagɩ́lɩ yɩ. 12 Kɔgbɔɔ anɖébi Yaayá‑dɛ́ɛ sáátɩ ngɔ́nɩ lɛlɛɛɖɔ́, Ɩsɔ́ɔ‑dɛ́ɛ kowúro‑ɖɔɔ́ wánnáa fúkúḿsi, fúkúḿsi‑dɩnáa wánjáádɩ sɩ bɛlɛ́ɛ kɛ. 13 Káma anɖébiwá rɩ́ŋa na anɖébi Múúsa‑dɛ́ɛ Mará waaŋmátɩ Ɩsɔ́ɔ‑dɛ́ɛ kowúrɔ́ɔ tɔ́m hálɩ anɖébi Yaayá. 14 A mɩ́zɔ́ɔlɛ́ɛ ɩnɩ́ɩ gɛ, Yaayá kɛ́ɛ́na Elíya weení baaŋmátɩ sɩsɩ wángabɩsɩ́ nɛ́. 15 Weení ɩwɛná nɩgbamɩ́nɩ nɛ́, ɩ́nɩ́ɩ.
16 Weení gɛ mánbɩɩzɩ́ mɛgɛɛzɩná zaamáánɩ kɩna kɩdɛ́ɛ ɩráa? Bɔjɔɔ́ɔ gɛ nyazɩ bíya bɔjɔɔ́ wɔnɔɔ́ kʊ́bɔńga‑daá bɔ́ndɔ́m baranáa sɩsɩ: 17 «Ɖáávʊ́lʊ mɩ́ɩ́ foyísi, amá mɩ́dábáa. Ɖéédée lííya yéńdi, mɩ́dɛ́mɛ́ɛ́dɩ iwíi» nɛ́. 18 Káma Yaayá wɔɔgɔ́nɩ nɛ́, ideɖi ɩdɔnyɔ́ɔ, ngɛ bɔɔdɔ́ sɩsɩ: «ɩwɛná zííni.» 19 Ɩrʊ́ Biyaalʊ́ wɔɔgɔ́nɩ nɛ́, wénɖíi wɔ́nnyɔɔ́. Ngɛ bɔɔdɔ́ sɩsɩ: «Ɩbɛ́ɛ ceení, ɖiirú na sʊlʊ́m nyɔɔrʊ́ gɛ ɩgɛ́ɛ; tikée mʊʊráa na alaháácɩ́ lanɖáa gɛ ɩɖɔndɩnáa.» Amá bɩlɛ́ ɩmʊ́ bɩdaá gɛ bánnanáa Ɩsɔ́ɔ‑dɛ́ɛ áséńsí.
20 Ńna gɛ Yeésu waabáázɩ tɛ́ɛ́dɩwá wentí waalá mamááciwá tɩdaá ɖabata nɛ́ yoonáa, káma tɩdɛkɛ́ɛ tɩlakásɩ tɩlá túúbá. 21 Yeésu wɔɔdɔ́ tɩ sɩsɩ: nbusú ɖamáa na nya Korazííni! Nbusú ɖamáa na nya Bɛtɩsayɩdáa! Káma mamááciwá tɩɩlá mɩ́dɛ́ɛ nɛ́, a baraalá tɩ Sɩdɔ́ɔnɩ na Tííri tɛ́ɛ́dɩwá‑daá, bɛlɛ́ baraajɔ́ɔ lííya bosúu kpetekíni tókowá bofuná badɩ tɔɔlɩmá bɩwɩ́lɩ sɩsɩ baalá túúbá bɛkɛ́ɛ lakásɩ. 22 Bʊrɔ gɛ ménveerím mɩ́ɩ́ toovonúm sɩsɩ tɔ́m fʊ́ʊ́dɩ wɩ́rɛ, bɛdɛ́ɛ fʊʊnáa wánlám sóncí na mɩ́ɩ́. 23 Bɩɩga nyɔ́ɔ Kapɛɛrnawúm, nyánmaazɩ́ sɩsɩ nyángbáa Ɩsɔ́ɔ‑jɔ yáa wé? Béndisí nya hálɩ ɩsɩɖáa‑daá. Káma maamááciwá tɩɩlá nyɛ́dɛ́ɛ nɛ́, a bayaalá tɩ Sodɔ́ɔm tɛ́ɛ́dɛ‑daá, tɛ́ɛ́dɩ tɩḿ tɩ́fʊ́nwɛ hálɩ na sinje. 24 Bʊrɔ gɛ ménveerím nya sɩsɩ: tɔ́m fʊ́ʊ́dɩ wɩ́rɛ, Sodɔ́ɔm‑dɛ́ɛ tɔ́m fʊʊnáa wálám sóncí na nya.»
25 Bɩdɛ́ɛ sáátɩ gɛ Yeésu wɔɔdɔ́ sɩsɩ: «Majaa, Mádʊ́ʊ Ɩsɔ́ɔ adɛ na ɩsɔ́ɔ́dáá lanɖʊ́, mɛ́nzɛ́ɛ nya kɩzɛɛwʊ ńŋɩnáa nyáámʊ́sɩ tɩlɩ́ɖa na áséńsí‑dɩnáa wentí nɛ́, nyééyéle bíya ɩtɩlɩ́ tɩ nɛ́. 26 Ɩɩ́n. Bɩlɛ́ gɛ nyɔ́ɔ́zɔ́ɔ́lɩ nɛ́, bʊrɔ gɛ bɩɩlá bɩlɛ́.
27 Majaa weejéle ma báa wenbí. Naárʊ fɛ́yɩ́ ɩnyɩ Biyaalʊ́ʊ, asée Caáwʊ́ʊ riké, ngʊ́ bɩlɛ́ gɛ naárʊ fɛ́yɩ́ ɩnyɩ Caáwʊ́ʊ aséé Biyaalʊ́ʊ na wenbá Biyaalʊ́ʊ wɔɔzɔ́ɔ́lɩ sɩsɩ batɩ́lɩ́ yɩ nɛ́.
28 Mɩ́nyɔ́ɔ́ wenbá mɩ́rɩ́ŋa bɩ́ńnɩ́ɩ mɩ́ɩ́ bɩka mɩ́zʊ́wáána nɛ́, ɩgɔ́nɩ mɔ́jɔ́ mánváa mɩ́ɩ fɛɛzɩrɛ. 29 Ɩgbɔ́ɔ mɛ́dɛ́ɛ ɖɛ́nɩ kɩ́kawʊ́ ɩtɩ́nɩ mɩ́rɔ́ bɩka ɩkɔ́nɩ mɛgbɛ́lɛ́m mɩ́ɩ́; káma mɛ́dɛ́ɛ fúu cɔɔ́ niíni bɩka mɔ́jɔ́ɔ ɖɔyɔɔyɔɔ. Ńna nɛ́, mínÿuú fɛɛzɩrɛ. 30 Ɩɩ́n, mɛ́dɛ́ɛ ɖɛ́nɩ kɩ́káwʊ́ fɛ́yɩ́ káálɛ sʊʊ́ bɩka mɛ́dɛ́ɛ sʊʊ́tɩ fɛ́yɩ́ yíni.»