14
1 Bɩdɛ́ɛ sáátɩ kɩḿ, Eróódia14.1 Eróódi ceení gɛ bánÿaá sɩsɩ Antipásɩ, ɩjaa tɔ́m gɛ baagáŋmatɩ kʊjʊʊ́ 2.1‑daá. weení wénɖíi kowúrɔ́ɔ Galilée nɛ́ waanɩ́ɩ bánŋmatɩ́ Yeésu‑dɛ́ɛ tɔ́m. 2 Ngɛ wɔɔdɔ́ ɩdɛ́ɛ bɔwʊtá lanɖáa sɩsɩ: «Ɩrʊ́ ceení ɖɔ́, anɖébi Yaayá gɛ. Weevé ɩsɩɖáa lɔwʊ́táa‑rɔ gɛ ɩwɛná yíko wánlám mamááciwá.» 3 Wúro Eróódi waamáázɩ bɩlɛ́ káma waavʊ́ńÿélí bakpa anɖébi Yaayá baɖʊ yɩ agbaran‑gbára bɔtɔ sáráka; káma Wúro Eróódi wɔɔgbɔ́ɔ igoobú Filíípu ɖɛɛlʊ́ Erodiyáádɩ nɛ́, 4 Anɖébi Yaayá wɔɔdɔ́ yɩ sɩsɩ: «Ńdɔ́mɔ́ɔ́ná nlá bɩlɛ́." 5 Wúro Eróódi wɔɔzɔ́ɔ́lɩ sɩ ɩkʊ yɩ, amá wánnɩɩ́ zamɔ́ɔ nɩndáárɛ, káma kɩlɛ́ kiiɖéézi sɩsɩ Yaayá kɛ́ɛ anɖébi gɛ. 6 Ngʊ́ nbɛ́ɛ́m nɛ́, Wúro Eróódi‑dɛ́ɛ lʊrʊ́ʊ wɩ́rɛ tɔɔzɩ́‑dɛ́ɛ jíńgáárɩ́ wɩ́rɛ waadála nɛ́, ngɛ Erodiyáádɩ wɛɛlɛ́ɛ waabáa zamɔ́ɔ bayáa kɩ ɖíína nɛ́ kɩɩzá‑daá. Ɩdɛ́ɛ báárɛ waalá wúro kazɔ́ɔ. 7 Ngɛ Eróódi wooɖuuná sɩsɩ báa wé gɛ wɔɔbɔ́ɔ́zɩ, ɩmʊ́ wánváa yɩ. 8 Bɩnáa bú ɩgɔɔ waadásɩ yɩ tɔ́m sɩsɩ ɩ́tɔ sɩsɩ: «Fa ma cé anɖébi Yaayá kʊjʊʊ́ tɛ́lɛ́lɛ́‑daá.» 9 Wúro laakáárɩ waagʊrʊ́. Amá ńŋɩnáa wooɖuuná zamɔ́ɔ bayáa kɩ ɖíína nɛ́ ɩzá‑daá nɛ́, waava wɛ́ɖɛ sɩsɩ bɔ́kɔ́gɔná aléeré Yaayaá kʊjʊʊ́. 10 Ngɛ weedíri bɛkɛ́jɛ anɖébi Yaayá kʊjʊʊ́ sáráka‑daá. 11 Bɔɔgɔ́gɔná kʊjʊʊ́ tɛ́lɛ́lɛ́‑daá becéle aléeré, ngɛ ɩlɛ́ wooboná kɩ icéle ɩgɔɔ. 12 Ngɛ anɖébi Yaayá‑dɛ́ɛ wanbaaráa wɔɔgɔ́nɩ bɔkpɔ́ɔ ɩdɔnʊʊ́ bebí; ngɛ boobó bekéveeri Yeésu.
13 Yeésu waanɩ́ɩ tɔ́m tɩḿ nɛ́, ngɛ wɔɔgbɔ́ɔ kpɩ́ɩ́rʊʊ́ ɩɖɛ́ɛ faɖáma‑daá ɩgɔjɔɔ́ɔ ɩlanáa iráa bolíni. Zamɔɔ́ waanɩ́ɩ bɩlɛ́ nɛ́, ngɛ kɩɩlɩ́ɩ tɛ́ɛ́dɩwá‑daá kifu yɩ. 14 Yeésu weedí kpɩ́ɩ́rʊʊ́‑daá nɛ́, ngɛ waana zamɔ́ɔ kʊ́bɔńgɩ. Ngɛ kɩdɛ́ɛ tɔ́m waalá yɩ kʊnyɔḿ. Ngɛ waawáázɩ bɛdɛ́ɛ kʊdɔndɩnáa. 15 Ɖaanɩ́ŋa waalá nɛ́, ngɛ Yeésu‑dɛ́ɛ wanbaaráa woogóduu ɩjɔ́ bɔtɔ́ yɩ sɩsɩ: «Ɖɔ́jɔ́ɔna tɛ́ɛ́dɩ bolíni ngʊ́ kɩɩɖáánɩ, bɩlɛ́ nɛ́ feeri zamɔ́ɔ kɩɖɛ́ɛ tɛɛ‑bíízi‑daá kɩkámʊ́ kídíím kiɖi.» 16 Amá Yeésu woobúsi wɛ sɩsɩ: «Bɩdɔbɔ́ɔ́zɩ sɩsɩ bobó ɖeelí, mɩ́dɩ́tɩŋa ɩva wɛ kíɖíím beɖi.» 17 Ńna gɛ bɛlɛ́ bɔɔdɔ́ yɩ sɩsɩ: «Kpɔ́nɔ́wá natʊ́nʊ́wá na tiiná náálɛ gɛ ɖɔ́jɔ́ cé.» 18 Ngɛ Yeésu wɔɔdɔ́ wɛ sɩsɩ: «Ɩgɔná ma Kpɔ́nɔ́wá natʊ́nʊ́wá na tiiná náálɛ amʊ́ cé.» 19 Ngɛ waava wɛ́ɖɛ sɩsɩ zamɔ́ɔ ɩcɔ́ɔ adɛ nyɩ́ɩ́dɩ‑rɔ. Ngɛ wɔɔgbɔ́ɔ Kpɔ́nɔ́wá natʊ́nʊ́wá na tiiná náálɛ amʊ́, ɩsá Ɩsɔ́ɔ bʊrɔ. Bɩlɛ́ bʊwɔ́rɔ́ gɛ wɛɛbɛlɩ́ kpɔ́nɔ́wá, ɩkpɔ́ɔ tɩ icéle ɩwanbaaráa batára zamɔ́ɔ. 20 Barɩ́ŋa bɔɔdɔ́ɔ bɔfɔ́ɔ. Fɔɔlásɩ sɩɩga wanbaaráa wɔɔdɔ́ɔ́zɩ nɛ́ woozu ɖɔkɩ́nɩ fuú na natɩ́lɛ. 21 Abaaláa nyazɩ mííli nɔɔ́nʊ́wá bɩlɛ́ weeɖi ná kíɖíím bɩḿ, ngʊ́ badakála aláa na bíya.
22 Bɩlɛ́ bɩɩjáŋ bʊwɔ́rɔ́ gɛ Yeésu waajáárɩ ɩwanbaaráa sɩsɩ bákpá kpɩ́ɩ́rʊʊ́‑daá bɛtɛ ɩmʊ́ nɩ́bááwʊ bɛtɛsɩná fɔɔlʊʊ́ kɩɩganáa. Bɩdɛ́ɛ sáátɩ nɛ́, ɩmʊ́ iyéle zamɔ́ɔ ɩya ɖamá. 23 Weeyéle zamɔ́ɔ ɩya ɖamá bɩtɛ́ nɛ́, ngɛ waagba bʊ́ʊ‑daá sɩ ɩsʊ́lʊ Ɩsɔ́ɔ. Kɩɩɖáánɩ nɛ́, ɩwɛ ńna iriké. 24 Kpɩ́ɩ́rʊʊ́ wáńláná laadɔ́ɔ bolíni gɛ lɩ́m wángʊrʊ́ʊ bínÿoó kɩ, káma fefelimá wónÿoó kɩ. 25 Asʊbáa gɛ Yeésu wɔɔgɔ́nɩ ɩwanbaaráa‑jɔ́ wánganʊŋɛ́ lɩɩrɛ́ kʊ́bɔńɖɛ‑rɔ. 26 Wanbaaráa waana yɩ wánganʊŋɛ́ lɩ́m‑rɔ nɛ́, nɩndáárɛ waazʊ́ʊ wɛ bɔ́ndɔ́m sɩsɩ: «Asɩ́nálɩ́ɩ gɛ.» Ngɛ baabáázɩ agogo. 27 Ńna‑ńna Yeésu wɔɔdɔ́ wɛ sɩsɩ: «Ɩɖɔ́kɩ mɩ́dɩ, mɔ́ɔ́ gɛ, ɩ́kánɩ́ɩ nɩndáárɛ́.» 28 Ńna gɛ Pétro wɔɔdɔ́ yɩ sɩsɩ: «Ɖádʊ́ʊ a toovonúm nyánáábɩ́lɛ́, fa ma nɩ́bááwʊ manʊ́m lɩ́m‑rɔ mɔngɔ́nɩ nyɔ́jɔ́.» 29 Ngɛ Yeésu wɔɔdɔ́ yɩ sɩsɩ: «Kɔnɩ.» Ngɛ Pétro waalɩ́ɩ kpɩ́ɩ́rʊʊ́‑daá, wánnʊŋɛ́ lɩ́m‑rɔ wɛ́nɖɛɛ́ Yeésu‑jɔ́. 30 Amá waana fefelimá‑dɛ́ɛ ɖóni nɛ́, ngɛ nɩndáárɛ waazʊ́ʊ yɩ. Ńna gɛ waabáázɩ lɩ́m‑daá tím. Ngɛ woogóo sɩsɩ: «Ɖádʊ́ʊ, lɛɛ ma.» 31 Ńna‑ńna gɛ Yeésu wɔɔlɔ nʊ́ʊ́nɩ ɩɖɔ́kɩ Pétro, ngɛ wɔɔdɔ́ yɩ sɩsɩ: «Nyɛ́dɛ́ɛ toovomúm fáa tɔɖɔ́ɔ, ngbaalá nyáálá síka?» 32 Baabɩ́sɩ bakpa kpɩ́ɩ́rʊʊ́‑daá nɛ́, ngɛ fefelimá waazála. 33 Ngɛ wenbá bɔwɛ kpɩ́ɩ́rʊʊ́‑daá nɛ́ boogúu yɩ tɛ́ɛ́dɩ bɔtɔ́ sɩsɩ: «Toovonúm gɛ, nyɔ́ɔ́ gɛ Ɩsɔ́ɔ Biyaalʊ́.»
34 Bɛɛdɛ́sɩ lɩɩrɛ́ kʊ́bɔńɖɛ bɩtɛ́ nɛ́, ngɛ beedí Genezarɛ́ɛ́tɩ tɛ́ɛ́dɩ‑daá. 35 Tɛ́ɛ́dɩ tɩḿ tɩdaá ɩráa waadɩlɩ́ yɩ, ngɛ beegíli befééri ɩráa fáráńdɩ́ kɩḿ kɩrɩ́ŋa kɩdaá, ngɛ bɔɔgɔná yɩ kʊdɔndɩnáa rɩ́ŋa. 36 Ngɛ baavɩ́nɩ yɩ sɩsɩ íyele kʊdɔndɩnáa itekiná báa ɩdɛ́ɛ tóko njʊ́ʊ́rɛ riké. Ngɛ wenbá barɩ́ŋa beedekiná nɛ́, baawáa.